မတ်မလီု၊ ဂျာန္နဝါရဳ ၂၅
ဟိုတ်နူပေါဲဗ္တိုက်အလုံဍုၚ်မွဲတုဲ ကံၚ်ဇြဳပၞာန် မကျဒၟံၚ်ပၞာန်ဂှ် နကဵုဗော်ပရေၚ်ဍုၚ်ကွာန်ဂမၠိုၚ် စန်ဒက်ဂကောံဇြဟတ်ဗော်တံတုဲ သွက်ဂွံပံၚ်တောဲပါလုပ်ရေၚ်တၠုၚ် ပ္ဍဲပရေၚ်ဂီုကၠီုညးဍုၚ်ကွာန်တံ နကဵုကောန်ဗော်တံဂှ် ဖ္တိုက်ဖ္အောဝ်ကၠုၚ်ရ။
အပ္ဍဲကာလသီအဝဵု ပွိုၚ်ပိသၞာံဏံ ဟိုတ်နူပရေၚ်ဗ္တိုက်ပၞာန်ထ္ပက် ဂကောံဇြဟတ်ပၠန်ဂးတတံတုဲ ကရောံဇြဟတ်ဒပ်လေၚ်ဒိုက်ဂှ် ဒးဗလးလဝ်တဲ ဆောံလေၚ်လဝ် ဟွံအောန်နူကဵု ၃၀ ဍုၚ်၊ ဗ္ဒိုပ်ဒပ်ကံၚ်ဇြဳပၞာန် ဂၠိုၚ်ကဵုကၠံတုဲဂှ် ဗော်ပရေၚ်ဍုၚ်ကွာန်ဂမၠိုၚ် သွက်ဂွံပါလုပ်ကၠုၚ် ပ္ဍဲပရေၚ်ဂီုကၠီုညးဍုၚ်ကွာန်တံဂှ် လ္ပာ်ကံၚ်ဇြဳပၞာန် ပံက်တိုန်ကျာပါၚ်ရ။
အတိုၚ်လိက်ပရိုၚ်တြးဝါဒ ကံၚ်ဇြဳပၞာန် မျာန်မအလေန် ကေုာံ ကျေမုၚ်တံ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၁ ကဵု ၂၂ ဂှ်မ္ဂး အခိၚ်ကာလလၟုဟ်ဝွံ ဟိုတ်နူဇီုကပိုက်ကၠုၚ်ကဵု အဝဵုအပိုၚ်အခြာကၟိန်ဍုၚ်တုဲ နကဵုဗော်ဂမၠိုၚ် ဒှ်အခိၚ်အခါ ဒးဘိုၚ်ရီုဗၚ်ရေၚ်တၠုၚ်ဏောၚ်ဂှ် သ္ဂးရ။
သ္အာၚ်နူဂှ်ပၠန် နကဵုကောန်ဗော်ပရေၚ်ဍုၚ်ကွာန်ဂမၠိုၚ် ညံၚ်ဒှ်ရဲကဵုဇြဟတ်ဗော်ဂှ်ကီု နွံပၟိက်ဒးဒှ်ညးကဵုဇြဟတ် ဒဳမဝ်ကရေဇြဳကီုဏောၚ်ဂှ်ရ ဇြဟတ်ဗော်ဂှ် ဒဒှ်ရနွံပၟိက် ဒးရပ်စပ်သွက်ကၟိန်ဍုၚ် ညံၚ်ဂွံဒှ်ဖဵု ဍာံဍာံပြပြဂှ် ဖ္တိုက်ဖ္အောဝ်ကၠုၚ် ကောန်ဗော်ပရေၚ်ဍုၚ်ကွာန်ဂမၠိုၚ် သွက်ဂွံပါလုပ် ပ္ဍဲပရေၚ်ဂီုကၠီုညးဍုၚ်ကွာန်ရ။
ဖက်ဆောညးအုပ်ကာ−၂ ဃောန်ထောန်ယှိုဲ ဗော်ဂအုပ်ကောန်ဂကူပအိုဝ် PNO ကံၚ်ဇြဳပၞာန် ဖျေံကဵုလဝ်အခေါၚ်ဒက်ပ္တန်ဗော်ဂှ် နကဵုဗော်ဂမၠိုၚ် ညံၚ်ဒေသဂွံဂီုကၠီု သွက်ဂွံသောၚ်ကလး နကဵုပရေၚ်ဍုၚ်ကွာန်ရဟေၚ် ဖ္တိုက်ဖ္အောဝ်မာန်တုဲ ပရေၚ်ဂီုကၠီုဘဝညးဍုၚ်ကွာန်တံဝွံ ဂကောံဒပ်ရပ်လွဟ်တံသၟးရ တာလျိုၚ်နွံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နကဵုဗော်ပိုယ်တံ ခိုဟ်ပရေံဂှ် ဟွံမိက်ဟီုပုဟ်။ ညံၚ်ကၟိန်ဍုၚ်ဏံ ဂွံၜိုဟ်သြိုဟ်ညိၚ်ဝတ်ဂှ် ဗော်သၟးဟွံကပုဟ်။ ဇၟာပ်ကောန်ဍုၚ်ဗၟာ တာလျိုၚ်နွံဒၟံၚ်ဏောၚ်။ ညအ်ဂှ် နကဵုဗော် ကၠောန်ကဵုမာန်ဂှ်တှ်ေ ညံၚ်ဒေသဂွံဂီုကၠီု သွက်ဂွံသောၚ်ကလး နကဵုပရေၚ်ဍုၚ်ကွာန်တုဲ ပသောၚ်ကဵုပရေၚ်ရပ်လွဟ်ပကီုပရာပ်ဂှ်တှ်ေ ပ္ဍဲကဵုအခိုက်ကၞာဍုၚ်ပိုယ်တံဂှ်လေဝ် ဟွံခိုဟ်ပုဟ်။ သွက်ဍုၚ်ကွာန်ဂှ် မုဖဵုဟွံမွဲပုဟ်။ ဗော်ပရေၚ်ဍုၚ်ကွာန်ဂှ်တှ်ေ သွက်ဂွံဂၠါဲဂၠံၚ်ဍာန်ပရေၚ်ဍုၚ်ကွာန် ဒးဖ္တိုက်ဖ္အောဝ်ဏောၚ်။ ညံၚ်ဘဝဂီုကၠီုညးဍုၚ်ကွာန်ဂွံနွံဟီုဂှ် တာလျိုၚ်နွံ ပ္ဍဲဂကောံဒပ်ရပ်လွဟ်တံရဏောၚ်။ ဗော်ပရေၚ်ဍုၚ်ကွာန်တံဂှ် ပသောၚ်ကဵုပရေၚ်ဍုၚ်ကွာန်ရဏောၚ်။ ပသောၚ်ကဵုပရေၚ်စန်ဒက်တံရဏောၚ်။ ဒးကၠောန် ညံၚ်ညးဍုၚ်ကွာန် ဂွံပါလုပ်တံရဏောၚ်” ဂှ် သ္ဂးရ။
ကံၚ်ဇြဳပၞာန် သီကေတ်လဝ်အဝဵုကၟိန်ဍုၚ် နကဵုတၚ်စောဲစပ်စရၚ်မာဲဗၠေတ်မှာ ပေါဲရုဲမာဲ ၂၀၂၀ ဂှ်ဝွံ ကလေၚ်ကၠောန်ဗဒှ်ကဵု ပေါဲရုဲမာဲဏောၚ်ဂးတုဲ သၞာံတုဲကၠုၚ်တေံ ပ္ဍဲဂိတုဂျာန္နဝါရဳ ၂၆ ဂှ် စၞောန်ပျးလဝ် သၞောဝ်ဒက်ပ္တန်ဗော်ပရေၚ်ဍုၚ်ကွာန်တၟိရ။
စၞောန်ပျးသၞောဝ်ဏံတုဲ အပ္ဍဲပွိုၚ် ၆၀ တ္ၚဲ ဗော်ပရေၚ်ဍုၚ်ကွာန် ၆၃ ဗော် ပ္တိုန်လဝ်စရၚ်တုဲ ဗော်ပရေၚ်ဍုၚ်ကွာန် ဟွံဂွံပ္တိုန်စရၚ် ၄၀ တံဂှ် ကံၚ်ဇြဳပၞာန် ဒဒှ်ရပလီုထောံနဒဒှ်ဗော်ဂှ် လလောၚ်တြးလဝ်ရ။
ပ္ဍဲကဵုဗော်ပရေၚ်ဍုၚ်ကွာန် မပ္တိုန်လဝ်စရၚ်ဗော်တံဂှ် သီုကဵုဗော်ကျခိုၚ်ယျေ ဒပ်ပၞာန်မၞုံလက္ကရဴဂှ်ပါလုပ်ဂှ် ဖျေံကဵုလဝ်အခေါၚ်ဒက်ပ္တန်ဗော် ကုဗော်ပရေၚ်ဍုၚ်ကွာန် ၄၇ ဗော်ဓဝ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ဗော်ပရေၚ်ဍုၚ်ကွာန်ဂမၠိုၚ်ဝွံ ဟိုတ်နူအာဒၟံၚ် သၟဝ်သၞောဝ်သ္ဇိုၚ် ၂၀၀၈ ဂှ်ရ သွက်ဂွံကၠောန်ပရေၚ်ဂီုကၠီုညးဍုၚ်ကွာန်ဂှ် တာလျိုၚ်ဟွံမွဲတုဲ ဂလာန်ကံၚ်ဇြဳပၞာန်ဝွံ ရိုဟ်ကၞက်ဟွံမွဲပုဟ်ဂှ် ပါ်ပါဲလဝ်ရ။
“သွက်ဂီုကၠီုညးဍုၚ်ကွာန်ဂှ်တှ်ေ နကဵုဗော်ဂမၠိုၚ် ပံၚ်တောဲရေၚ်တၠုၚ်အာ နနဲသာ်လဵုရော။ ဗော်ဟီုဂှ် သၟဝ်သၞောဝ်သ္ဇိုၚ် ၂၀၀၈ ဂှ် ပ္ဍဲညးတံ အခေါၚ်ကၠောန်ဗဒှ် ဂှ် မုဟွံမွဲပုဟ်ဂှ် ဟီုဂွံရ။ အေ ဂှ်တှ်ေ သွက်ဂွံရေၚ်တၠုၚ်ဂီုကၠီုညးဍုၚ်ကွာန်ဂှ် နကဵုဗော်ဂမၠိုၚ် အခိၚ်တုဲကၠုၚ်တေံလေဝ် တာလျိုၚ်ဟွံမွဲပုဟ်။ စၞောန်ပျးလဝ်လေဝ် ဟွံမွဲပုဟ်။ အခိၚ်လၟုဟ်ဂှ်လေဝ် နကဵုဗော်ဂမၠိုၚ် သ္ပလေံဒုက်ကံၚ်ဇြဳပၞာန်တုဲ ဗော်လဵုမွဲမှ ဒတူလိုၚ်ဂတတုဲ ကံၚ်ဇြဳပၞာန်ခိုဟ်ဒၟံၚ်ဏောၚ်၊ စဵုဒၞါကံၚ်ဇြဳပၞာန်ညိဂှ် စန်ဒက်ဒၟံၚ်ညးဍုၚ်ကွာန်တံဟွံသေၚ်ပုဟ်။ အေ ဂှ်တှ်ေ ဍေံတံဟီုဒၟံၚ်ဂှ် ရိုဟ်ကၞက်ဟွံမွဲပုဟ်” သာ်ဝွံ သ္ဂးရ။
က္ဍိုပ်သ္ကိုပ်ပၞာန်ဂှ် သွက်ကၟိန်ဍုၚ် ဂွံညိၚ်ဝတ်ၜိုဟ်သြိုဟ်ဂှ် ကောန်ဗော်ဂမၠိုၚ် သွက်ဂွံပံၚ်တောဲပါလုပ်ရေၚ်တၠုၚ်ကဵုဂှ်ကဵု သွက်ဂွံအာ သၞောဝ်ဒဳမဝ်ကရေဇြဳဂှ် နွံပၟိက်ဒးကေတ်ပရေၚ်ၜိုဟ်လလမ်ညိၚ်ဝတ်တံဂှ်တုဲ ဒးရေၚ်တၠုၚ် သၞောတ်ဂီုကၠီုညးဍုၚ်ကွာန်တံသီုဖအိုတ်ပါလုပ်ဏောၚ်ဂှ် ဟီုဂးလဝ် အခိၚ်ဆဵုဂဗကဵုဗော်ပရေၚ်ဍုၚ်ကွာန် မဖျေံကဵုလဝ်အခေါၚ်ဒက်ပ္တန်ဗော် ပ္ဍဲဂိတုဂျာန္နဝါရဳ ၁၆ တေံရ။
ဂလာန်ကံၚ်ဇြဳပၞာန် ဟီုဂးလဝ် ဗော်ပရေၚ်ဍုၚ်ကွာန်ဂမၠိုၚ် သွက်ဂွံပါလုပ် ပ္ဍဲကဵုပရေၚ်ဂီုကၠီုညးဍုၚ်ကွာန်တံဂှ်ဝွံ ကဵုကောန်ဗော်ဂမၠိုၚ် ရပ်လွဟ်တုဲ ယိုက်ဂၠေၚ်တာလျိုၚ် ပ္ဍဲအရာစပ်ကဵုပရေၚ်ဂီုကၠီုကွာန် ဟွံသေၚ်မ္ဂး ပၞာန်ပျဳတုသေတ်တံဂှ်ဏောၚ်ဂှ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်တံ သ္ဂးအိုတ်ရ။
ပ္ဍဲလက်ထက်ကံၚ်ဇြဳပၞာန် မသီလဝ်အဝဵုကၟိန်ဍုၚ် နကဵုဇြဟတ်လွဟ်ဂှ် ၜိုန်ရကလေၚ်ပ္တိုန်လဝ်စရၚ်ကီုလေဝ် အခန်ကဏ္ဍဗော်ပရေၚ်ဍုၚ်ကွာန်တံဂှ် ဒှ်ဒၟံၚ်သဗုၚ်သ္ပာကၠေံခၞၚ်ဒၟံၚ်တုဲ ညံၚ်ဂွိုအ်ဒးဒုၚ်စကာကဵု ကံၚ်ဇြဳပၞာန်ဂှ် နွံပၟိက်ရောၚ် ထံက်ထ္ၜးဒၟံၚ်တံလေဝ် နွံဒၟံၚ်ရ။
အခိၚ်လၟုဟ်လေဝ် ဟိုတ်နူစေဝ်ပၞောန် သၞောဝ်ဒက်ပ္တန်ဗော်ပရေၚ်ဍုၚ်ကွာန် ကံၚ်ဇြဳပၞာန်စၞောန်ပျးလဝ်တၟိ မပတေၚ်ဂြတ်လဝ်ဂှ်တုဲ ဗော်ပရေၚ်ဍုၚ်ကွာန် ပ္တိုန်လဝ်စရၚ်တံ စိုပ်ဒၟံၚ်ဍာ် ထပ်ဒးဒုၚ်ပလီုဒၟံၚ်ဏောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−MOI