ဇြပ်ဗု၊ ဂျာန္နဝါရဳ ၂၅
တွဵုရးဍုၚ်မန်၊ ပွိုၚ်ဍုၚ်ကျာ်ထဝ်၊ ပ္ဍဲကဵုဂၠံၚ်ဒုၚ်ဇြယိတ် စပ်ကဵုပရေၚ်သမ္ဘာသ္ကိုပ်တမ်ဒပ် ဒပ်အမၠံက်ကံၚ်ဇြဳပၞာန် စၟတ် (၃၁၅) ဖျေံသ္ဇိုၚ်ပွိုၚ်ဍုၚ်ဇြပ်ဗု ဒးဒုၚ်ဂစိုတ်ဂှ် ဂၠိုက်ဂၠါဲစၟဳတ်အာဏောၚ် ညးတာလျိုၚ် ခရိုၚ်သဓီု PDF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုဂျာန္နဝါရဳ ၂၂ တေံ သမ္ဘာသ္ကိုပ်တမ်ဒပ် မၞုံယၟု ဒဝ်အိသဳရဳကျဝ် ကေုာံ ညးဗြဴပါကၠုၚ်သ္ကအ်မွဲတၠတံဝွံ သွက်ဂွံဗက်ခတှ် ပ္ဍဲဒုၚ်ဇြယိတ် အခိၚ်ကၠုၚ်ကဵုကွဳစက်မွဲဖ္ဍိုက်ဂှ် ဒးဒုၚ်ရပ်လဝ်ကဵု ဂကောံဒပ်စဵုဒၞါဒေသတံရ။
ကြဴနူဂှ်တုဲ အခိၚ်ရပ်ဒက်စၟဳတ်ဒၟံၚ်ဂှ် သမ္ဘာသ္ကိုပ်တမ်ဒပ် ဒဝ်အိသဳရဳကျဝ်ဂှ်ဝွံ ပၠံၚ်သေနာတ်ဇရေၚ်ကောန်သ္ဂံၚ်မွဲတၠတုဲ ဂြိပ်တိတ်အာဂှ်ရ အခိၚ်ပန်ပှော်ရပ်ဒက် ချိုတ်အာလဝ်ဂှ် ထ္မံက်ထ္ၜးဒၟံၚ် ပ္ဍဲကဵုပရိုၚ်အပ္ဍဲဒေသတံရ။
ဇွသမ္ဘာသ္ကိုပ်တမ်ဒပ် ကေုာံ ညးဗြဴပါကၠုၚ်သ္ကအ် မချိုတ်အာတံဂှ် ဖဳဖျေံဏာ ပ္ဍဲၜဳသက်တိုၚ်တုဲ သီကေတ်လဝ် ဖုၚ်၊ ကွဳစက် ကေုာံ လှုဲလှာ်တံဂှ် ဂကောံ LDF ကျာ်ထဝ် မၞုံယၟု(ဗိုလ်သော်) သ္ပလဝ်သၟာန်သှ် ကုပရိုၚ်မဳဒဳယျာလ္ၚဵုတံရ။
ညးဒုၚ်တာလျိုၚ် ခရိုၚ်သဓီု PDF ကိုဝ်အေမေန်ထောန်ဂှ် စပ်ကဵုလၟေၚ်ဒဒှ် သမ္ဘာသ္ကိုပ်တမ်ဒပ် ဒးဒုၚ်ဂစိုတ်ဂှ်တုဲ ဂကောံဒပ်စဵုဒၞါညးဍုၚ်ကွာန်တံ ကၠောန်လဝ်ဍာံ၊ ဟွံဍာံ ဂၠိုက်ဂၠါဲစၟဳတ်ဒၟံၚ်တုဲ ယဝ်ရဍာံပြမ္ဂး ညးမကလိလောန်ဒုဟ်ဒဏ်ဂှ် ကေတ်အာအရေဝ် ဗွဲမသ္ကာတ်မြဟ်ဏောၚ် ဟီုရ။
ခရိုၚ်သဓီု ဗော်သွးကောန်ဂကူကရေၚ် KNU ဂှ်လေဝ် ပရိုၚ်သမ္ဘာသ္ကိုပ်တမ်ဒပ် ဒးဒုၚ်ဂစိုတ်ဂှ် ပြးထၞာန်ကၠုၚ် ပ္ဍဲဇာဇၞိက်ပရေၚ်မၞိဟ်ဂှ်ရ သွက်ဂွံဂၠိုက်ဂၠါဲစၟဳတ်ဗွဲလစှ်ေ ဂှ် စၞောန်ပ္ညုၚ်လဝ်ရောၚ် ဂွံတီကေတ် အတိုၚ်ဂလာန် ညးတာလျိုၚ်တံရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် သမ္ဘာသ္ကိုပ်တမ်ဒပ် ဒဝ်အိသဳရိကျဝ် ဒးဒုၚ်ဂစိုတ်ဂှ်ဝွံ တုဲကၠုၚ်ပ္ဍဲဂိတုဂျာန္နဝါရဳ ၁၇ တေံ ပြးအာလဝ် ကဵုတၠသ္ၚိညး ဗွဲမလုပ်သၞောဝ်တုဲ အခိၚ်ဒးဒုၚ်ရပ် သွက်ဂွံသ္ပဒတန် ဒဒှ်ရပြးအာညးသ္ကအ်ဂှ် တက်လဝ်ကျာ ကဵုသ္ကိုပ်တမ်ဒပ် ဒုသ္ကိုပ်ဗိုလ်ဇၞော် ညဳညဳအံၚ် အလန်လက္ကရဴအိုတ်ဂှ် ချူထ္မံက်ထ္ၜးဒၟံၚ်တံလေဝ် နွံဒၟံၚ်ရ။
ပ္ဍဲတွဵုရးဍုၚ်မန် ခရိုၚ်သဓီုဂှ် ဗော်သွးကောန်ဂကူကရေၚ် KNU ၊ ဒပ်ပၞာန်စဵုဒၞါညးဍုၚ်ကွာန် PDF တံပါလုပ်ဂှ် ဂကောံဒပ်ပၠန်ဂတးရပ်လွဟ် ဟွံအောန်နူကဵု ၂၆ ဂကောံ ချဳဒရာၚ်ဒၟံၚ်ပရေၚ်ပၞာန်ရ။
ယာယဳသမ္မတ ဒူဝါလယှဳလ အလဵုအသဳညဳသၟဟ်ဂကူ NUG ဂှ် နကဵုဂကောံပၠန်ဂတးရပ်လွဟ်ဂမၠိုၚ် ညံၚ်ဂွိုအ်ဖံက်ပ္ကဝ်ဒ္ဂေတ်စေဝ်ပၞောန် စပ်ကဵုလ္ပာ်ပၞာန်တံဂှ် အပ္ဍဲကောံဓရီုအလဵုအသဳ မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၃ တေံ ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု− Social media