မတ်မလီု၊ ဂျာန္နဝါရဳ ၂၆
ကြဴနူပၞာန်သီအဝဵုတုဲ ဟိုတ်နူအကာဲအရာပရေၚ်ဂီုကၠီုတုဲ နူကဵုဘာတန်သၟဝ်တဲကံၚ်ဇြဳပၞာန် ပြံၚ်လှာဲပအပ်ကၠုၚ်ဘာ ပ္ဍဲဘာကောန်ဂကူမန် စဵုကဵုသၞာံဗ္တောန်ပညာဏံမ္ဂး ကွးဘာ ၁၅၀၀ ပြၚ် နွံကၠုၚ်ဂှ် လိက်ဒုၚ်စဳရေၚ်မွဲ ထ္မံက်ထ္ၜးလဝ်ရ။
ပ္ဍဲကဵုလိက်ဒုၚ်စဳရေၚ် “တၚ်လ္ၚတ် အခိၚ်ကာလအကြေပ်ဂြတ် ပရေၚ်ဒုၚ်ကာညးဍုၚ်ကွာန် အပ္ဍဲတွဵုရးဍုၚ်မန်” ဂှ် ကြဴနူဒပ်ပၞာန်သီအဝဵုတုဲ အကာဲအရာပရေၚ်ဒုၚ်ကာညးဍုၚ်ကွာန် ပ္ဍဲကဵုတိဍာ်ထိၚ်ဒဝ်နာနာ အပ္ဍဲတွဵုရးဍုၚ်မန်ဂှ် ဇြဟတ်ရာမညဖေဝ်ဒရာခေတ်တၟိ (NRFF) သ္ပသုတေသနတုဲ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၂ တေံရ။
ပ္ဍဲကဵုကဏ္ဍပရေၚ်ဒုၚ်ကာညးဍုၚ်ကွာန်တံဂှ် စပ်ကဵုပရေၚ်ပညာတုဲ အကာဲအရာပရေၚ်ဒုၚ်ကာ ပရေၚ်ပညာကောန်ဂကူမန် ဗော်ဍုၚ်မန်တၟိဂှ်လေဝ် ပါလုပ် ပ္ဍဲလိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိရ။
ဟိုတ်နူပရေၚ်ပၞာန်သီအဝဵုတုဲ ညးဍုၚ်ကွာန် ဟွံမိက်ကေတ် ပရေၚ်ပညာ ကံၚ်ဇြဳပၞာန်တံဂှ် ထ္ပက်ကၠုၚ်အဇာ ကုပရေၚ်ပညာတၞဟ်သ္အာၚ်တံတုဲ မွဲလ္ပာ်ပၠန်ဂှ် သ္ပပဓာန်ကၠုၚ် လ္တူပရေၚ်ပညာကောန်ဂကူမန် ဗော်ဍုၚ်မန်တၟိ ဒေါအ်လဝ်ပန်ပှော် ကုကံၚ်ဇြဳပၞာန်ဂှ် ဂၠိုၚ်နူကဵုကၠာတေံရောင် သ္ဂးရ။
အတိုၚ်လိက်ဒုၚ်စဳရေၚ်ဂှ်မ္ဂး ကြဴနူဒပ်ပၞာန်သီအဝဵုတုဲ နူကဵုဘာဗ္တောန်လိက် သၟဝ်တဲကံၚ်ဇြဳပၞာန်ဂှ် မွဲကွာန် ကွးဘာ နူ ၂၀ စဵုကဵု ၅၀ တၠ ပြံၚ်ကၠုၚ် လ္ပာ်ဘာကောန်ဂကူမန်တံ ဂၠိုၚ်ကၠုၚ်ရ။
စဵုကဵုသၞာံဗ္တောန်ပညာ ၂၀၂၃−၂၀၂၄ ကွးဘာ ၁၅၀၀ ပြၚ် ပြံၚ်ကၠုၚ် ဘာကောန်ဂကူမန်ဂှ်ဝွံ နူကဵုတန်လဵု ပြံၚ်ပအပ်ကၠုၚ်ဘာဟီုဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ် ဟွံမွဲရ။
ပ္ဍဲကဵုဌာနပရေၚ်ပညာကောန်ဂကူမန်ဂှ် မ္ၚးနူကဵုတန်သ္ဇိုၚ်ပညာဂမၠိုၚ် တန်မူလ၊ တန်ဒေါဝ်၊ တန်သၠုၚ်တံဂှ် ပံက်လဝ် စဵုကဵုတန်ပရေၚ်ပညာကဆံၚ်သၠုၚ် ကဝ်လိက်တုဲ ဗ္တောန်ကဵုဒၟံၚ်ရ။
အတိုၚ်လိက်ဒုၚ်စဳရေၚ်ဂှ်မ္ဂး ကြဴနူဒပ်ပၞာန်သီအဝဵုတုဲ ဌာနပရေၚ်ပညာကောန်ဂကူမန်ဝွံ ဆဵုဂဗကဵုညးဍုၚ်ကွာန်တံတုဲ ဆဝ်မ္ၚုဟ် သွက်ဂွံပူဗိုၚ်ထံက်ပၚ်ကဵု ပရေၚ်ပညာကောန်ဂကူမန်တံဂှ် ရေၚ်တၠုၚ်ကၠုၚ် ဗွဲမသၠဲလးရ။
ပရေၚ်ပညာကောန်ဂကူမန်ဝွံ ဒးဂေတ်ဒၟံၚ် နကဵုမဒါန် ညးဍုၚ်ကွာန်မန်တံကဵု မဒါန်ဍုၚ်သ္အာၚ်တံတုဲ ပ္ဍဲကဵုကွာန်မန် အပ္ဍဲဒေသကံၚ်ဇြဳပၞာန်အုပ်ဓုပ်တံဂှ် သွက်ဂွံဗပေၚ်တၚ်နွံပၟိက်ပရေၚ်ပညာဂှ် သိုၚ်ခၞံကၠုၚ်ဘာဗ္တောန်လိက် နကဵုသြန်ဗွဝ်တံအိုတ်ရ။
ပ္ဍဲကဵုဏံ ပ္ဍဲသၞာံဗ္တောန်ပညာ ၂၀၂၂−၂၀၂၃ နဒဒှ်ပရေၚ်ပညာကဆံၚ်သၠုၚ် သၟဝ်ဌာနပရေၚ်ပညာကောန်ဂကူမန် ဗွဲကိုပ်ကၠာအိုတ် ပံက်လဝ်ကဝ်လိက်ကောန်ဂကူမန် ပ္ဍဲဗ္ဒိုပ်ညဳသာ ဒေသကၞောတ်ၜဳရေဝ် တိဍာ်ဗော်ဍုၚ်မန်တၟိအုပ်ဓုပ်လဝ် မဒှ်ရ။
ပ္ဍဲဘာကောန်ဂကူမန်တံဂှ် ၜိုန်ရဒးဆေၚ်ဒၟံၚ်မုက် ကုအခက်အခုဲ စပ်ကဵုဇြဟတ်မၞိဟ်တံဂှ် ဗွဲမလအ်လကီုလေဝ် ကြဴနူသီအဝဵုတုဲ ညးဒုၚ်ကာ CDM မံၚ်ဒၟံၚ် ပ္ဍဲတိဍာ်အုပ်ဓုပ်ဗော်ဍုၚ်မန်တၟိတံ လုပ်စိုပ်ဗပေၚ်ဇြဟတ် ပ္ဍဲပရေၚ်ပညာကောန်ဂကူမန်တံ နွံဂှ် လိက်ဒုၚ်စဳရေၚ်ဂှ် သ္ဂးရ။
ဘာကောန်ဂကူမန်ဂမၠိုၚ်ဝွံ ပ္ဍဲတွဵုရးဍုၚ်မန်၊ တွဵုရးကရေၚ် ကေုာံ ရးတၞၚ်သဳတံဂှ် ဘာဗ္တောန်လိက် ၁၃၀ ပြၚ် နွံဒၟံၚ်တုဲ ကွးဘာမွဲဠက်ပြၚ် တိုန်စိုပ်ကတ်ဗ္တောန်ဒၟံၚ်ဂှ် ဂွံတီကေတ် အတိုၚ်တၚ်နၚ် ကမ္မတဳပရေၚ်ပညာကောန်ဂကူမန်ရ။
ပရိုၚ်−သြၚ်လောန်တိုၚ်(မ်)
ဗီု−Twitter