ပဠဝ်၊ ဂျာန္နဝါရဳ ၂၆
ကရောၚ်ပၞာန်ပံၚ်ကောံမဟာမိတ် အာဗ္တိုက်ဒပ်ကံၚ်ဇြဳပၞာန် ပ္ဍဲကွာန်(ဆယ်အိမ်စု) ပွိုၚ်ဍုၚ်ပဠဝ်၊ ရးတၞၚ်သဳဂှ် ဒးဒုၚ်ကၠတ်ဗ္တိုက်လဝ်တုဲ ကောန်သ္ဂံၚ်ပၠန်ဂတး ၂ တၠ ပြဟ်လလုဲအာလဝ်ဂှ် တမ်ဒပ်စၟတ် (၁) ခရိုၚ်ဗိက် လလောၚ်ပ္တိတ်လဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၃ တေံ ကရောၚ်ပၞာန်ပံၚ်ကောံမဟာမိတ် တမ်ဒပ်စၟတ် (၁) ခရိုၚ်ဗိက်၊ ဂကောံဒပ်ဒရုၚ် ကေုာံ ဂကောံဒပ်စဵုဒၞါကောန်ဂကူကရေၚ် KNDO ဒပ်စြေက် (၅) တံပါလုပ်ဂှ် ပ္တိတ်ကၠုၚ်ဇြဟတ် သွက်ဂွံဗ္တိုက် ဒပ်ကံၚ်ဇြဳပၞာန် ဗ္ဒါဲကွာန်(ဆယ်အိမ်စု) နကဵုဒရုၚ်ရ။
သွက်ဂွံဗ္တိုက် ကဵုဒရုၚ်သာ်ဏံ အခိၚ်ရဲအာဂတးတံဟွံမွဲဂှ် ဟိုတ်နူဒးဒုၚ်ကၠတ်ဗ္တိုက်လဝ် ကဵုဒပ်ကံၚ်ဇြဳပၞာန်တုဲ သ္ဂံၚ်ဥူဥူ နူကဵုတမ်ဒပ် စၟတ် (၁) ကေုာံ သ္ဂံၚ်ပညာ နူကဵုဒပ်စြေက် (၅) KNDO တံ ပြဟ်လလုဲအာလဝ်ဂှ် ညးဒုၚ်တာလျိုၚ် လလောၚ်ပရိုၚ် တမ်ဒပ်စၟတ် (၁) ခရိုၚ်ဗိက် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်သ္ဂံၚ်ပြဟ်လလုဲအာတံဂှ်ဝွံ ဒှ်ကောန်သ္ဂံၚ်သ္ပပဓာန်ဂွံတံတုဲ သွက်ကောန်သ္ဂံၚ်ပြဟ်လလုဲအာတံဂှ် ကေတ်ဒၟံၚ်ဂုဏ်စရာဲလၟိုန်ရောၚ် သ္ဂးရ။
အလုံဒေသပဠဝ်မွဲဂှ် အပ္ဍဲကာလခြာဟွံလအ်ဏံ ပေါဲဗ္တိုက်တံ က္တဵုဒှ်ကၠုၚ် ဗွဲမသ္ကာတ်မြဟ်မာန်ဂှ်ရ နကဵုညးဍုၚ်ကွာန်တံ လိက်တၞးစၟတ်သမ္တီပၟိက်ဇၞော်တံကဵု ကပေါတ်ကညောတ်ၚုဟ်မးမၞုံတံဂှ် သွက်ဂွံသီဂိုၚ်လဝ် ဗွဲမစှ်ေကဵုသၞောတ်ဂှ်ကီု သွက်ဂွံၜံက်ခါဲလဝ်ဥမၚ်တံဂှ် ကဵုကသပ်ဖ္တိုက်ဖ္အောဝ်လဝ်ရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Tanintharyi ဂှ်မ္ဂး အပ္ဍဲသၞာံ ၂၀၂၃ တုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် က္တဵုဒှ်လဝ် ဟွံအောန်နူကဵု ၅၀၀ ဝါဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−တမ်ဒပ်စၟတ် (၁) ခရိုၚ်ဗိက်