ကျံက်ကျဳ၊ ဂျာန္နဝါရဳ ၂၆
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကဵုပွိုၚ်ဍုၚ်ကျံက်ကျဳ တိဍာ်ဗော်သွးကောန်ဂကူကရေၚ် KNU ဂှ်တုဲ ညးဍုၚ်ကွာန်ကောန်အရာပ် ၁ တၠ ချိုတ်တုဲ သီုကဵုကောန်ၚာ်ပါလုပ်ဂှ် ၇ တၠ ကလိဂွံလဝ်ဝပ်ရောၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၅ တေံရ။
နူကဵုတမ်ဒပ်ကံၚ်ဇြဳပၞာန် စၟတ် (၂၆၄) ဖျေံသ္ဇိုၚ်ပုၚ်ဇလုက်ဂှ် တုဲကၠုၚ်ပ္ဍဲဂိတုဂျာန္နဝါရဳ ၂၂ တေံ ပန်ပှော်လဝ်လွဟ်ဇၞော် ပ္ဍဲပွိုၚ်ဍုၚ်ကျံက်ကျဳ ကွာန်ကျံက်ကုန်၊ ပံက်ကုန်၊ တမေန်အေန်ကုန်၊ အေန်နက် ကေုာံ ကွာန်(ကျို့ကုန်း) တံ လွဟ်ဇၞော် ၁၂ မရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ သီုကဵုကောန်ၚာ်အာယုက် ၃ သၞာံ မၞုံယၟုမာၚ်နေဇြဝ်လေန် ဒၟံၚ်ကွာန်ကျံၚ်ကုန်ဂှ် ညးဍုၚ်ကွာန်ဒေသ ၅ တၠ ဒးမကမ်လွဟ်ဇၞော် ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
သ္အာၚ်နူဂှ်ပၠန် ပ္ဍဲဂိတုဂျာန္နဝါရဳ ၂၃ ဂှ်လေဝ် ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန် ပ္ဍဲကွာန်ကညေန်ကျိုဝ် ကေုာံ ကွာန်ဒံၚ်မိုအ်ဂှ်တုဲ ဥူမျေတ်လှာၚ် အာယုက် ၆၅ သၞာံ ချိုတ်အာတုဲ ညးဒေသ ၂ တၠ ဇီုကပိုက်ကလိဂွံလဝ်ဝပ်ရ။
အပ္ဍဲပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ဂှ် သ္ၚိဒၟံၚ်ညးဒေသ ၄ မ ဇီုကပိုက်လီုလာ်အာလဝ်တုဲ ဂၠဴ ၃ ဒးကဝေက်မကမ် ချိုတ်အာလဝ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ရ။
တုဲကၠုၚ် ပ္ဍဲဂိတုဂျာန္နဝါရဳ ၂၁ ဂှ်လေဝ် ပ္ဍဲကဵုကွာန်လိန်ပေန် ပွိုၚ်ဍုၚ်ကျံက်ကျဳ ဟိုတ်နူလွဟ်ဇၞော်ဒတုံဗ္တိုဟ်ထ္ကးတုဲ ညးဒေသ ၃ တၠ ဇီုကပိုက်ကလိဂွံလဝ်ဂှ် ဂွံတီကေတ် အတိုၚ်တၚ်လလောၚ်တြး KNU ရ။
ပရိုၚ်−သြၚ်လောန်တိုၚ်(မ်)
ဗီု−KNU