ၜါသွာၚ်၊ ဂျာန္နဝါရဳ ၂၅
တွဵုရးဍုၚ်မန် ပ္ဍဲပွိုၚ်ဍုၚ်ၜါသွာၚ် တ္ကအ်ခၟာၚ်ဂှ် ကောန်ကောကောန်ဒေံ ဒေံဗြဴသ္ကိုပ်ဝန်ဇၞော်တွဵုရးဍုၚ်မန် ဥူအံၚ်ကျဳတုၚ် ကံၚ်ဇြဳပၞာန်ခါန်ကၞက်လဝ်ဂှ် ဒေံဗြဴညး ဍိုက်ဍိုပ်တုဲ ပံက်ဒၟံၚ်ဝိုၚ်ဝေၚ်တံ ဇၞော်ကဵုဇြဟတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒေံဗြဴ ဥူအံၚ်ကျဳတုၚ်ဂှ်ဝွံ ကေတ်လဝ်ကာန်ထရာ်တုဲ ပံက်လဝ်ဝိုၚ်ဝေၚ် ပ္ဍဲကွာန်သက္ကော ပွိုၚ်ဍုၚ်ၜါသွာၚ်ဂှ်တုဲ ပ္ဍဲကဵုကွာန်သှ်ေတံဂှ်လေဝ် ပါလုပ်သီုကဵုသ္ဘၚ်ကျာ်ဂှ် နကဵုဟိုတ်နာနာသာ် ပံက်ဒၟံၚ်ဝိုၚ်ဝေၚ်တံရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး ပ္ဍဲကဵုဝိုၚ်ဝေၚ်တံဂှ် (အနီထောၚ်)၊ ဖေဝ်၊ အာန်ဂလုၚ်၊ ပေါဲစာၚ်တံ ဒှ်တမ် ကဵုလဝ်အခေါၚ်ပံက်တုဲ တန်တဴကဵုလ္တူဂကူဝိုၚ်ဝေၚ်ဂှ်တုဲ ကံက်ဒၟံၚ်အခေါန် အောန်အိုတ် နူကဵုမွဲကိုဋ်ဘာ် စဵုကဵုစှော်ကိုဋ်ဂှ် ဂွံတီကေတ်ရ။
သြန်အကံက် ဂွံနၚ် နူကဵုဝိုၚ်ဝေၚ်တံဂှ် ဂကောံအုပ်ဓုပ်ပွိုၚ်ဍုၚ်ၜါသွာၚ်၊ ဂကောံ ဒေံဗြဴဥူအံၚ်ကျဳတုၚ် ဍိုက်ဍိုပ်ဂှ်ကဵု ဂကောံဂီုကၠီုစပ်ကဵုလ္ပာ်ပၞာန် စရဖ ကိုဝ်ဖျဵုတံ ဂိုၚ်ဒၟံၚ်လှုဲဂှ် သြၚ်လောန်တိုၚ်(မ်) ဂၠိုက်ဂၠါဲဂွံတီကေတ်ရ။
သ္အာၚ်နူဂှ်ပၠန် အကံက်ခေါန်ဂွံနၚ်တံဂှ် ဒေံဗြဴဥူအံၚ်ကျဳတုၚ်ဂှ်ကီု သၞာဲဒဴဂကောံဒပ်ဗၠာဲသၟိၚ်၊ ဒပ်ပၞာန်တံသၟးဟွံက ညးတာလျိုၚ်ဂကောံအုပ်ဓုပ်တံ ပါ်ပရအ်ညးသ္ကအ်တုဲ ဂီုကၠီုဝိုၚ်ဝေၚ်တံဂှ် ဂကောံဒပ်ဗၠာဲသၟိၚ်တံ ဒးရေၚ်တၠုၚ်ကဵုဒၟံၚ်ရောၚ် သ္ဂးရ။
ညးဒေသမွဲတၠဂှ် ပ္ဍဲကဵုပွိုၚ်ဍုၚ်ၜါသွာၚ်ဂှ် တပ်စုတ်က္ဍိုပ်လိက်နာနာတုဲ ပံက်ကၠုၚ်ဝိုၚ်ဝေၚ်တံ ဇၞော်ကဵုဇြဟတ်ဂှ်ရ ပရေၚ်ကၠတ်ဂၠံက်ပၠံၚ်ၜးတံ မွဲတ္ၚဲတုဲမွဲတ္ၚဲ ဂၠိုၚ်ကၠုၚ်မံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲၜါသွာၚ်ဂှ် ဒၞါဲပြးဇး ပံက်ဒၟံၚ်ဝိုၚ်ဝေၚ်တံ ဇၞော်ကဵုဇြဟတ်ရ။ ဍေံတံ (ကောန်ကောကောန်ဒေံ ဒေံဗြဴဥူအံၚ်ကျဳတုၚ်) ဂှ် သ္ဘၚ်ဟွံမွဲတှ်ေ မံၚ်မးမးဂှ် ကဵုဒၟံၚ်ဝိုၚ်ဝေၚ် (အာဝါဒေ)တံ အတိုၚ်ဏံရ။ ဝိုၚ်ဝေၚ်တံ ဂၠိုၚ်ကၠုၚ်ဗက် ဒုစရိုတ်တံဂှ် ဂၠိုၚ်ကၠုၚ်ဟဂှ်ရ။ ညအ်ဂှ် တီကၠးဒၟံၚ်ရ။ တုဲပၠန် ကွဳလိုန်ဓာတ်ကၠေံဂၠိုၚ်ဂှ်လေဝ် ကၠေံဒၟံၚ် အခိၚ်အာဝိုၚ်ဝေၚ်တံဂှ်ရဏောၚ်“ သာ်ဝွံ သ္ဂးရ။
အတိုၚ်သြၚ်လောန်တိုၚ်(မ်) ဂၠိုက်ဂၠါဲသၟာန်သၟုက်လဝ် ညးဒေသၜါသွာၚ် ၁၀ တၠဂှ်မ္ဂး ဝိုၚ်ဝေၚ်အပ္ဍဲပွိုၚ်ဍုၚ်ၜါသွာၚ်ဂှ် ဒေံဗြဴဥူအံၚ်ကျဳတုၚ် မဂၠိုက်ဂၠါဲဒၟံၚ်ယၟုဖိုဟ်ဂှ် ဍိုက်ဒၟံၚ်ဍိုပ်ရောၚ် သ္ဂးလဝ် ဗွဲမခိုၚ်ကၠိုက်ရ။
ဝိုၚ်ဝေၚ်တံဂှ် ဒေံဗြဴသ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ်ဂှ် သ္ကိုပ်သ္ကတုဲ ကၠောန်ဒၟံၚ်ဂှ်ရ နကဵုညးဒေသတံ ဟွံဂံၚ်တေၚ်တုဲ ယဝ်အာတေၚ်မ္ဂးလေဝ် သွက်မၞိဟ်အာတေၚ်ဂှ် အန္တရာယ်လမျီုနွံမာန်တုဲ ဒးသ္ၚိတ်ဒၟံၚ်ရောၚ် သ္ဂးရ။
ညးဒေသၜါသွာၚ်မွဲတၠဂှ်လေဝ် ဟိုတ်နူဝိုၚ်ဝေၚ်တံဂှ်တုဲ စိုတ်ဓာတ်ညးသၟတ်အပ္ဍဲဒေသ လီုလာ်ကၠုၚ်နွံတုဲ ပ္ဍဲကဵုသ္ၚိကၟိန်လ္ၚဵုတံမ္ဂး က္တဵုဒှ်ကၠုၚ် သီုကဵုပဋိပက္ခအပ္ဍဲသ္ၚိတံဂှ် ဟီုရ။
“ဝိုၚ်ဝေၚ်တံဂှ်တှ်ေ နွံဒၟံၚ်စၟအ်ဒၞါဲရဏောၚ်။ သ္ဘၚ်ဒှ်လေဝ် နွံ။ သ္ဘၚ်ဟွံမွဲလေဝ် အာဝါဒေတံ မုတံ နွံဒၟံၚ်ဏောၚ်။ သၟတ်တံဂှ်တှ်ေ မၞိဟ်ကေၚ်ဝေၚ် ရဲလ္ပာ်ဝေၚ်ဇြဟတ်တံဂှ်လေဝ် စိုတ်လုပ်စအာ လ္ပာ်ဝိုၚ်ဝေၚ်ဂှ် ဂၠိုၚ်အာရ။ ကၠာတေံဂှ်တှ်ေ စိုတ်လုပ်စ ပ္ဍဲဝေၚ်ဇြဟတ်သၟးရ။ ဗွဲကြဴဏံ ဝိုၚ်ဝေၚ်ဂှ် ဂၠိုၚ်ကၠုၚ်ကွေံကွေံတုဲ သၟတ်စိုတ်ပါအာ လ္ပာ်ဝိုၚ်ဝေၚ်တံဂှ်လေဝ် နွံရ။ ဝေၚ်သာ်ဏံတုဲ အိုတ်အာ ၜိုတ် ၂၀၀ ကိုဋ်ပြၚ်တုဲ လၟုဟ် မၞိဟ်ဒးတိတ်ဍုၚ်မ္ၚးတံလေဝ် နွံရ“သာ်ဝွံ သ္ဂးရ။
အပ္ဍဲပွိုၚ်ဍုၚ်ၜါသွာၚ် ဟိုတ်နူဝိုၚ်ဝေၚ်တံတုဲ မွဲဏှမွဲဏှဟီုဂွံ ပရေၚ်ကၠတ်ဂၠံၚ်ကွဳလိုန်ဓာတ်တံ ဂၠိုၚ်ကၠုၚ်တီတီတုဲ လုပ်စိုပ်အပ္ဍဲသ္ၚိဒၟံၚ်တုဲ ကၠတ်ဂၠံၚ်ကပေါတ်ကညောတ်တံလေဝ် နွံကၠုၚ်ဂှ်ရ ဒှ်ဒၟံၚ်အကာဲအရာ ဂီုကၠီုဇကု ဇကုဒးကေတ်ဒၟံၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၂ ဂှ်မ္ဂး အပ္ဍဲဒေသမန် နကဵုသ္ကိုပ်အုပ်ဓုပ် လက်ထက်ကံၚ်ဇြဳပၞာန်ဏံ ရပ်စပ်အဝဵု ဟွံဗဗွဲကဵုဒၞါဲတုဲ ပံၚ်ကဵုရဲမၞုံကဵုအဝဵုတံဂှ်တုဲ ကၠောန်သ္ပကၠုၚ် သၞောဝ်ဥပဒေတံကြာန်န်တုဲ ပ္ဍဲကဵုအုံအရာပ်ညးတံဂှ်လေဝ် ပံက်ဝိုၚ်ဝေၚ်တုဲ ကၠောန်စကၠုၚ် ညံၚ်သ္ဘၚ်ဂှ် သ္ဂးရ။
သ္အာၚ်နူဂှ်ပၠန် စပ်ကဵုကၠောန်ဗဒှ်ဝိုၚ်ဝေၚ်တံဂှ်တုဲ တေၚ်မ္ဂးလေဝ် ထ္ပက်လှုဲတုဲ ကေတ်ဇၞးဂဗုတ်တံလေပ်တုဲ မၞိဟ်အာတေၚ်ဂှ်ဟေၚ် ဒှ်ဒဒိုက်တုဲ ဒးဒုၚ်အုပ်ဓုပ်ဒၟံၚ် နကဵုဓဝ်ဖေက်တုဲ နကဵုညးဒေသတံ ပါဲနူကဵုအေၚ်ဒုၚ်တုဲ ကလေၚ်ပၠန်တဲဟွံမာန်ပုဟ်ဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ပ္ဍဲကဵုပွိုၚ်ဍုၚ်ၜါသွာၚ်၊ မတ်မလီု၊ ၜဳကလေၚ် ကေုာံ ပွိုၚ်ဍုၚ်ပံၚ်တံဂှ် ကၠောန်ကၠုၚ်ဝိုၚ်ဝေၚ် ဇၞော်ကဵုဇြဟတ်တုဲ ပ္ဍဲကဵုပွိုၚ်ဍုၚ်လ္ၚဵုတံဂှ် ပံက်ကၠုၚ်ဒၟံၚ် ဝိုၚ်ဝေၚ်တံ နကဵုအခေါၚ်ကံၚ်ဇြဳပၞာန် နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ