ကအ်ကြိက်၊ ဂျာန္နဝါရဳ ၂၇
ပ္ဍဲဍုၚ်ကအ်ကြိက် ပေါဲဗ္တိုက်ဆက်က္တဵုဒှ်ဒၟံၚ်ဂှ် ဒပ်ကံၚ်ဇြဳပၞာန် ရပ်ဒက်ညးဍုၚ်ကွာန်ဒေသတံတုဲ ရပ်စပ်ဒၟံၚ်နဒဒှ်ဇွောံစဵုဒၞါပၞာန် ထ္ပက်ဒၟံၚ်ကရောၚ်ပၞာန်ဂှ် ကရောၚ်ပၞာန်ကၠဗု ဂကောံဇြဟတ်ပၠန်ဂတးတံ ကဵုသမ္တီလလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၆ တေံရ။
အကြာဒပ်ကံၚ်ဇြဳပၞာန်ကဵု ဂကောံဇြဟတ်ဒပ်ပၠန်ဂတးတံ လလအ်ပွိုၚ်ၜါဂိတု က္တဵုလဝ်ပေါဲဗ္တိုက် လ္တူဍုၚ်ကအ်ကြိက် တွဵုရးကရေၚ်ဂှ်တုဲ စနူသၞာံဏံမံက်တုဲ ပ္ဍဲကဵုဒၞါဲကရောၚ်ပၞာန်ကၠဗုထိၚ်ဒက်လဝ်တံဂှ် ပေါဲဗ္တိုက်ၜါလ္ပာ်တံ က္တဵုဒှ်ဒၟံၚ်လၟေၚ်ဒဒှ်တ္ၚဲရောၚ် သ္ဂးရ။
ဂိတုဂျာန္နဝါရဳ ၂၂ စဵုကဵု ၂၆ ဒပ်ကံၚ်ဇြဳပၞာန် ရပ်ဒက်ညးဒေသဍုၚ်ကွာန် အပ္ဍဲပွိုၚ်ဍုၚ်ကအ်ကြိက်တံဂှ်တုဲ သ္ပဇွောံစဵုဒၞါပၞာန်တုဲ လၟေၚ်ဒဒှ်ထ္ပက်ကၠုၚ်ကရောၚ်ပၞာန်တံ က္တဵုဒှ်ဒၟံၚ်လၟေၚ်ဒဒှ်တ္ၚဲရောၚ် ပါလုပ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန်ဂှ် ၜိုန်ရသုၚ်စောဲဇွောံစဵုဒၞါပၞာန်၊ အရီုဗၚ်ပန်ပှော်လွဟ်ဇၞော်၊ ဒရုၚ်တံ ကီုလေဝ် ဒးဂိဒၟံၚ်လၟေၚ်ဒဒှ်တ္ၚဲတုဲ ပလီုပလာ်ဒၟံၚ် စမြိုၚ်သ္ၚိဒၟံၚ်ညးဍုၚ်ကွာန်တံဂှ် ကရောၚ်ပၞာန်ကၠဗု ဟီုဂးလဝ်ရ။
သ္အာၚ်နူဂှ်ပၠန် အပ္ဍဲလၟေၚ်ဒဒှ်ပေါဲဗ္တိုက်တံဂှ် လ္ပာ်ဒပ်ကံၚ်ဇြဳပၞာန် အောန်အိုတ် ၁၅ တၠ ချိုတ်တုဲ ဟွံအောန်နူကဵု ၁၀ တၠ ကလိဂွံလဝ်ဝ်တုဲ လ္ပာ်ဂကောံဇြဟတ်ပၠန်ဂတးတံလေဝ် ကောန်သ္ဂံၚ်မွဲတၠ ပြဟ်လလုဲအာလဝ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
နကဵုညးဍုၚ်ကွာန်ဒေသကအ်ကြိက်ဂမၠိုၚ် ၜိုန်ဂွံမိၚ်ကေတ်ပရိုၚ်ဂမၠိုၚ်ကီုလေဝ် ဟွံဂၠိုက်ဂၠါဲသၟာန်သၟုက် ဇရေၚ်ဂကောံပၠန်ဂတးတံမွဲသာ် ညံၚ်ဂွိုအ်ကလေၚ်စဴကၠုၚ် အပ္ဍဲဍုၚ်ကအ်ကြိက်ဂှ်ကဵု ပ္ဍဲကဵုဒၞါဲဂီုကၠီုဗၠးဘဲတံဂှ်ဟေၚ် သွက်ဂွံမံၚ်စံၚ်အိုတ်ဂှ် လ္ပာ်ကရောၚ်ပၞာန်ကၠဗု လလောၚ်ပ္တိတ်ကဵုလဝ်သမ္တီရ။
ဟိုတ်နူပေါဲဗ္တိုက်ကအ်ကြိက် မစက္တဵုဒှ်လဝ် သၞာံတုဲကၠုၚ် ပ္ဍဲဂိတုဒဳဇြေမ်ဗာ ၁ တေံဂှ်တုဲ ညးဍုၚ်ကွာန်ဒေသဂၠိုၚ်ကဵုဠက် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ အခိၚ်အကာဲအရာပေါဲဗ္တိုက် ကလေၚ်ညိၚ်ဝတ်အာညိဂှ် ညးဒေသလ္တူဍုၚ်တံ ကလေၚ်လုပ်စိုပ်လ္တူဍုၚ်ကအ်ကြိက်တုဲ ရံၚ်စံၚ်သ္ၚိဒၟံၚ်တံကီု ကလေၚ်ကေတ်ကပေါတ်ကညောတ်တံ နွံလဝ်ရ။
ညးဍုၚ်ကွာန်ဒေသ ကလေၚ်လုပ်စိုပ်ကၠုၚ် အပ္ဍဲဍုၚ်ကအ်ကြိက်ဂှ်ဝွံ ဟိုတ်နူဒးဒုၚ်ပန်လဝ်ကဵုသေနာတ်နွံဂှ်ရ လမျီုဒးအိုတ် ဇီုကပိုက်ကလိဂွံလဝ်ဝပ်တံ နွံလဝ်တုဲ အပ္ဍဲပေါဲဗ္တိုက်ၜါလ္ပာ်ဂှ် စမြိုၚ်သ္ၚိဒၟံၚ် ညးဍုၚ်ကွာန်ဒေသတံ ဂၠိုၚ်ကဵုကၠံ ပၟတ်တူလီုလာ် ဒးဆောံလေၚ်အာလဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ