ကျာ်မြဟ်၊ ဂျာန္နဝါရဳ ၂၇
သ္ၚိဒၟံၚ်ညးဍုၚ်ကွာန် ပွဳပွူဗ္ဒိုပ်ဗၠာဲသၟိၚ်ၜါသွာၚ်၊ ကွာန်ၜါသွာၚ်၊ ပွိုၚ်ဍုၚ်ကျာ်မြဟ်၊ တွဵုရးဍုၚ်မန်တံဂှ် ဒပ်ကံၚ်ဇြဳပၞာန် လုပ်စိုပ်စံၚ်ပလီုပလာ်ဒၟံၚ်တံ ကၠောန်ၜိုတ်ဒၟံၚ်ရောၚ် ညးဒေသတံ ဟီုရ။
ပ္ဍဲကဵုဒေသၜါသွာၚ် ဒပ်ကံၚ်ဇြဳပၞာန် ကလေၚ်ထိၚ်ဒက်လဝ်တံဂှ် စနူဂိတုဂျာန္နဝါရဳ သတ္တာဟတတိယတုဲကၠုၚ်တေံတုဲ သ္ၚိဒၟံၚ်မၞုံပွဳပွူဗ္ဒိုပ်ဗၠာဲသၟိၚ်တံဂှ် လုပ်စိုပ်ကၠတ်ဂၠံက် ကပေါတ်ၚုဟ်မးမၞုံတံဂှ်တုဲ စံၚ်ပလီုပလာ်လဝ်ရ။
အတိုၚ်ဂလာန် ညးဒေသတံဂှ်မ္ဂး ဟိုတ်နူဒးဒုၚ်စံၚ်ပလီုပလာ်လဝ်တုဲ သ္ၚိဒၟံၚ် ဟွံအောန်နူကဵု ၃၀ မ ပၟတ်တူလီုလာ်အာလဝ်တုဲ ကပေါတ်ၚုဟ်မးမၞုံ အပ္ဍဲသ္ၚိတံဂှ် ဒပ်ကံၚ်ဇြဳပၞာန် ကေတ်ဏာပ္ဍဲဗ္ဒိုပ်ဗၠာဲသၟိၚ် ဂွံဆဵုကေတ်ဂှ် သ္ဂးရ။
စံၚ်ပလီုကၠေံသ္ၚိဒၟံၚ် ပွဳပွူဗ္ဒိုပ်ဗၠာဲသၟိၚ်ၜါသွာၚ်ဂှ်ဝွံ ညံၚ်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ကၠတ်ဗ္တိုက်ပန်ပှော်ဟွံဂွံ လ္ပာ်ကံၚ်ဇြဳပၞာန် စံၚ်ပလီုပလာ်လဝ်ဒှ်မာန်ဏောၚ်ဂှ် သ္ၚဳဂၠိပ်ဟီုဂးဒၟံၚ်တံလေဝ် နွံဒၟံၚ်ရ။
ကၠာဂွိုအ်စံၚ်သ္ၚိဒၟံၚ်တံဂှ် ဒပ်ကံၚ်ဇြဳပၞာန်ဝွံ ကပေါတ်ၚုဟ်မးမၞုံ အပ္ဍဲသ္ၚိဒၟံၚ် ညးဍုၚ်ကွာန်ပါဲဒဴဘဲပၞာန်တံဂှ်ကီု၊ ကပေါတ်အရပ်စပ်သ္ၚိတံ၊ ကွဳလိုန်ဓာတ်တံဂှ်လေဝ် ကၠတ်ဂၠံက်ကေတ်ဏာလဝ်တုဲ ပ္ဍဲအရာပ်မျသဳတာ ဒၞါဲဗ္ဒိုပ်ဗၠာဲသၟိၚ်နွံဂှ် သ္ၚိဌာန်ဂမၠိုၚ် ဒးဒုၚ်စံၚ်လဝ်ဂှ်ရ က္တဵုဒှ်လဝ် ကြပ်အိုတ်အးဂှ် ဂွံတီကေတ် ဇရေၚ်ညးဒေသတံရ။
အပ္ဍဲပေါဲဗ္တိုက်ၜါသွာၚ်ဂှ် ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်တံကီု သီုကဵုပရေၚ်ဗ္တိုက်ကဵုလွဟ်ဇၞော် ကေုာံ ကဵုက္ၜၚ်ကျာတံဂှ်တုဲ သ္ၚိဒၟံၚ် ဗ္ဒါဲ ၁၀၀ ပၟတ်တူလီုလာ်အာလဝ်ရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုဒဳဇြေမ်ဗာ ၂၉ တေံ ကလေၚ်ထိၚ်ဒက်လဝ် ညးဒေသၜါသွာၚ်တံဂှ်တုဲ သ္ၚိဒၟံၚ်ညးဒေသ နူကဵုကွာန် ၅ ကွာန် ပါလုပ်သီုကဵုကွာန်ၜါသွာၚ်၊ တၟအ်ဗြဴ၊ လှာဂဇိုၚ်တံ ဟွံအောန်နူကဵု ၁၀၀၀ ဂှ် ကလိလောန်လဝ် အရာမကၠတ်ဂၠံက်တံရ။
ဟိုတ်နူပေါဲဗ္တိုက်ၜါသွာၚ်တုဲ ညးဍုၚ်ကွာန်ပါဲဒဴဘဲပၞာန် ၃၀၀၀၀ ပြၚ်ဝွံ ဒဵုကဵုအခိၚ်လၟုဟ် ဟွံဂံၚ်စဴသ္ၚိဌာန်ဏီတုဲ တ္ၚဲပါဲဒဴဘဲပၞာန် ဂၠိၚ်သ္ၚောဲကၠုၚ်ဗက် အရီုဗၚ်ပရေၚ်ဗ္စာရဏာမၞိဟ် ကာတၟေၚ်တံ နွံပၟိက်ကၠုၚ်ဂှ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−Social Media