ၜဳကလေၚ်၊ ဂျာန္နဝါရဳ ၂၇
ပ္ဍဲကဵုရုၚ်ဌာနမဆေၚ်စပ် အပ္ဍဲပွိုၚ်ဍုၚ်ၜဳကလေၚ် တွဵုရးဍုၚ်မန်တံ သွက်ဂွံၜံက်ခါဲလဝ်ကတိုၚ်ပါဲဗုမ်အိုတ်ဂှ် ဌာနက္ဍိုက်ပ်ကာအုပ်ဓုပ်နာနာပွိုၚ်ဍုၚ် ကံၚ်ဇြဳပၞာန် စၞောန်ပ္ညုၚ်ကၠုၚ်ဂှ် ဂၠိုက်ဂၠါဲဂွံတီကေတ် နူကဵုဗွိုၚ်သၞာဲဒဴတံရ။
အတိုၚ်လိက်စၞောန်ကၠုၚ် နကဵုစၟတ်တ္ၚဲ ဂိတုဂျာန္နဝါရဳ ၁၉ ဂှ်မ္ဂး အပ္ဍဲရုၚ်ဌာနမဆေၚ်စပ်တံဂမၠိုၚ် သွက်ဂွံၜံက်ခါဲလဝ်ကတိုၚ်ပါဲဗုမ်တံ ဗွဲမပြဟ်ဂှ်ကီု ကၠောန်တုဲမ္ဂး သွက်ဂွံကလေၚ်ပ္တိုန်ထ္ၜး မွဲဒမြိပ်အခိၚ်အိုတ်ဂှ် ပါလုပ်ရ။
ကြဴနူလလောၚ်ပ္တိတ်လိက်စၞောန်ဂှ်တုဲ လ္ပာ်ဒိုဟ်ပလိုတ်ရုၚ်ဌာနက္ဍိုက်ပ်အုပ်ဓုပ်ကာနာနာပွိုၚ်ဍုၚ်ဂှ် ဒပ်ပၞာန်၊ ဗၠာဲသၟိၚ် ကေုာံ သၞာဲဒဴဌာနအုပ်ဓုပ်ကာနာနာတံ ၜံက်ခါဲဒၟံၚ် ကတိုၚ်ပါဲဗုမ်တံဂှ်တုဲ ပ္ဍဲကဵုဗ္ဒိုပ်ဗၠာဲသၟိၚ်ၝောံဍုၚ်ၜဳကလေၚ်ဂှ်လေဝ် ပပ္တံနူကဵုဗာန်ကာတံဂှ် ကလေၚ်ပလေဝ်ဒၟံၚ်တၟိနွံဒၟံၚ်ရ။
ဆ္ဂး ပ္ဍဲအရာၜံက်ခါဲကတိုၚ်ပါဲဗုမ်တံဂှ် လ္ပလိၚ်မၞိဟ်မ္ၚး သွက်ဂွံၜံက်ခါဲအလဵုဇကုအိုတ်ဂှ် စၞောန်ပ္ညုၚ်လဝ်ဂှ်ရ ဒဵုကဵုအခိၚ်လၟုဟ် ရုၚ်ဟွံဂွံၜံက်ခါဲကတိုၚ်ပါဲဗုမ်တံ နွံဒၟံၚ်တၟာဂလိုၚ်ဏီဂှ် သၞာဲဒဴ သ္ပလဝ် CDM မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲပွိုၚ်ဍုၚ်ၜဳကလေၚ်ဂှ် ဂကောံဗိုလ်အေဝ်သေဝါ လ္ပာ်ဒပ်မဟာ ၆ KNU တံသ္ကိုပ်သ္ကဂှ် စိုပ်ဒၟံၚ်တုဲ ပံၚ်တောဲကဵု PDF ပ္ဍဲတိဍာ်ဒပ်မဟာ ၁ တံဂှ်တုဲ ပရိုၚ်လုပ်စိုပ်ဗ္တိုက် ရုၚ်ဌာနမဆေၚ်စပ် လ္တူဍုၚ်ၜဳကလေၚ်တံကဵု ဗ္ဒိုပ်သၞေဟ်ကၚ်ကံၚ်ဇြဳပၞာန်တံ မွဲအခိၚ်ဓဝ်ဏောၚ်ဂှ် မံက်တိတ်ဒၟံၚ်ရ။
အပ္ဍဲကာလသီအဝဵုဏံ ရုၚ်ဌာနက္ဍိုက်ပ်အုပ်ဓုပ်ကာနာနာ ကံၚ်ဇြဳပၞာန် လ္တူပွိုၚ်ဍုၚ်ၜဳကလေၚ်၊ ဗ္ဒိုပ်ဗၠာဲသၟိၚ်တံပါလုပ်ဂှ် သၞေဟ်ကၚ်စၟဳတ်ကံၚ်ဇြဳပၞာန် ကေုာံ ရုၚ်ဌာနမဆေၚ်စပ်တံဂှ် ဂကောံဇြဟတ်ပံၚ်ကောံပၠန်ဂတးတံ လုပ်စိုပ်ဗ္တိုက်ဒၟံၚ် မွဲဏှမွဲဏှရ။
ဟိုတ်နူလၟေၚ်ဒဒှ်ဏံတုဲ ကံၚ်ဇြဳပၞာန်ဝွံ ပ္ဍဲပွိုၚ်ဍုၚ်ၜဳကလေၚ် မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်ဟွံဂွံဂှ်ကီု အမိၚ်တိတ်ဗ္တံဟွံဂွံတံဂှ် လလောၚ်ပ္တိတ်လဝ် အမိၚ်ဒေသန္တရ စေဝ်ပၞောန်တေၚ်ဂြေတ်တံဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ/Social Media