ဗြဝတဳ၊ ဂျာန္နဝါရဳ ၂၇
ဒပ်မၚ်ပယျဵုကရေၚ် BGF ပံၚ်ကၠုၚ်တောဲ ကုဒပ်ပၞာန်ဗၟာ ပွိုၚ်စှ်သၞာံပြၚ် သ္ဂုတ်သွာတ်ထောံ သွက်ဂွံပါ်ဍာန် ကုကံၚ်ဇြဳပၞာန်ဂှ်ရ ဍုၚ်ဇၞော် မၞုံတွဵုရးဍုၚ်မန် ကဵု တွဵုရးကရေၚ်လ္ၚဵုတံ ကံၚ်ဇြဳပၞာန် ဒးဗလးတဲမာန်ဂှ် ညးခါတ်အကာဲပရေၚ်ပၞာန်တံ သ္ၚဳဂၠိပ်လဝ်အိုတ်ရ။
ဒပ်မၚ်ပယျဵုကရေၚ် BGF ဝွံ စနူဂိတုတုဲကၠုၚ်တေံတုဲ နူကဵုကံၚ်ဇြဳပၞာန် ဟွံကေတ်ဇွောံမသြန်ဂိတုမွဲသာ် ပါ်တိတ်နူကဵုဟယံက်ဒပ်ပၞာန်တုဲ ဒတူလိုၚ်အာတၞဟ်ခြာရဏောၚ်ဂးတုဲ ပ္တိုန်လဝ်လိက် ကုကံၚ်ဇြဳပၞာန် မဒးဂိဒၟံၚ် ပ္ဍဲပရေၚ်ပၞာန်တံဂှ်ရ။
ပ္ဍဲဂိတုဂျာန္နဝါရဳ ၁၅ ဂှ် သ္ကိုပ်ရးဌာန်ဂအုပ်ပၞာန်ရးအဂၞဲ၊ ပ္ဍဲဂိတုဂျာန္နဝါရဳ ၁၉ ဂှ် ဂကောံသ္ကိုပ်ဝန်ဇၞော်တွဵုရးကရေၚ်တံ ဍိုက်ဍိုပ်ဂှ် ကၠုၚ်စိုပ်သဳကၠဳလဝ် ဇရေၚ်ညးအုပ်ကာနာနာ BGF သ္ကိုပ်ဗိုလ်ဇၞော် သဝ်ချေတ်တူကီုလေဝ် ဟွံပြေပြံၚ်လဝ်ရ။
ကြဴနူဂှ်တုဲ ပ္ဍဲဂိတုဂျာန္နဝါရဳ ၂၃ ဒုသ္ကိုပ်ပၞာန်ဇၞော် သဵုဝေန် ညးအဝဵုနွံ ပ္ဍဲကံၚ်ဇြဳပၞာန် ကဆံၚ်ဒုတိယဂှ် ကၠုၚ်စိုပ်ဒဵုကဵုတွဵုရးကရေၚ်တုဲ သဳကၠဳလဝ် ကုညးတာလျိုၚ်ကဆံၚ်လ္တူ BGF တံဂှ်ကီုလေဝ် ပြံၚ်လှာဲကၠေံ တၚ်သ္ဂုတ်သွာတ် BGF ကရေၚ်ဂှ် ဟွံမာန်ရ။
သ္ကိုပ်ဗိုလ်ဇၞော် သဝ်ချေတ်တူဂှ် ဟွံကေတ် အထံက်အပၚ်ဒပ်ပၞာန်ရတုဲ ကရေၚ်ရေၚ်သ္ကအ်လေဝ် ဟွံဗ္တိုက်ရပုဟ် ဖျေံလဝ်သ္ဂုတ်သွာတ်ယျဂှ်ရ ကဵုအာက္ဍိုပ် ကုပရေၚ်ၜိုဟ်လလမ် တွဵုရးကရေၚ်သၟးရဏောၚ်ဂှ် ဟီုဂးလဝ်ရ။
နကဵု BGF ကရေၚ် ဇြဟတ်ဒပ် ၜိုတ် ၁၀၀၀၀ နွံဂှ် ယဝ်ရပါလုပ်ကၠုၚ် ပ္ဍဲပၠန်ဂတးဂကူကရေၚ်မ္ဂး သွက်ကံၚ်ဇြဳပၞာန် ဇြဟတ်ဍိုန်လျစှ်ေဒၟံၚ် ဒၟါနူပရေၚ်ပၞာန် ၁၀၂၇ ဂှ် တၠုၚ်လအာဒးဗလးကၠေံတဲ သ္ကုတ်သၠုၚ်ကျာကၟိန်ဍုၚ် နကဵုပေါဲကျတံ ဂၠိုၚ်ဒၟံၚ်ဏောၚ်ဂှ် ညးခါတ်အကာဲပရေၚ်ပၞာန်တံ သ္ၚဳဂၠိပ်လဝ်အိုတ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် “လၟုဟ်မ္ဂး သၠုၚ်ကျာဗြဝတဳကီု၊ သၟဝ်ကျာကီုဂှ် အခိၚ်ပရေၚ်ချဳဒရာၚ်ပရေၚ်ပၞာန်တံ သ္ကာတ်မြဟ်ကၠုၚ်ဒၟံၚ်ဂှ် မံၚ်အကြာဟွံဂွံရတုဲ ဒးရုဲကၠေံမွဲမွဲဏောၚ်။ တၚ်ရုဲစှ်ဏံဂှ်လေဝ် ရံၚ်ကဵုဂလာန် ဟီုဂးလဝ်လၟုဟ်တံဂှ်မ္ဂး လစွံစိုတ် မိက်ဂွံပံၚ်တောဲရေၚ်တၠုၚ် ကုဗော်သွးကောန်ဂကူကရေၚ် နွံဂှ် ပိုယ်တံ ဂွံဆဵုကေတ်ရ။ လၟေၚ်ဒဒှ်ဏံလေဝ် ခြာဟွံလအ် ထ္မံက်ကၠုၚ်ရုပ်ရဴဏောၚ်ဂှ် အဲချိၚ်ခယျကေတ်ရ” သာ်ဝွံ သ္ဂးရ။
သ္ကိုပ်ဗိုလ်ဇၞော် သဝ်ချေတ်တူဂှ် သွက်ဂွံပံၚ်တောဲကဵု ဂကောံရပ်လွဟ်ကရေၚ်တံဂှ် ပြဟ်ဟ်ဏံ ဟွံဖျေံသ္ဂုတ်သွာတ်ဏီပုဟ်ဂှ် သှ်ကဵုလဝ် ပ္ဍဲကဏ္ဍသၟာန်သှ် BBC ဗၟာရ။
ကံၚ်ဇြဳပၞာန်ဂှ် စပ်ကဵုကိစ္စ ဂကောံ BGF ကရေၚ် ပါ်တိတ်နူသၟဝ်တဲဇကုတံဂှ်တုဲ ဟီုပ္တိတ်ကၠုၚ်မွဲမွဲ ဟွံမွဲဏီတုဲ ပ္ဍဲကဵုလိက်ပရိုၚ်တြးဝါဒဒပ်ပၞာန် ပ္ဍဲသဵုယှေဝ်မဳဒဳယျာတံဂှ်လေဝ် လလောၚ်ပ္တိတ်ကဵုလဝ်သမ္တီဂှ် ဟွံဂွံဆဵုကေတ်ဏီရ။
အခိၚ်လၟုဟ် ကံၚ်ဇြဳပၞာန်ဝွံ နကဵုလွေဟ်ပၞာန်ဒုၚ် တြးလဝ်မုက်ပၞာန်အလုံဍုၚ်မွဲတုဲ ဒးတဝ်စၞေဟ်ဒၟံၚ် ကုဂကောံဒပ်ပၠန်ဂတးတံဂှ်တုဲ သ္ကုတ်သၠုၚ်ကျာကၟိန်ဍုၚ်ဂှ် ဒးဆေၚ်ဒၟံၚ်မုက် ကုဂကောံဒပ်ပံၚ်ကောံ ဂကောံဒပ်စဵုဒၞါညးဍုၚ်ကွာန် PDF ပါလုပ်သီုကဵု ဗော်သွးကောန်ဂကူကရေၚ် KNU တံဂှ်ရ။
စပ်ကဵုဒပ်မၚ်ပယျဵု BGF ကရေၚ် ပါ်တိတ်နူကံၚ်ဇြဳပၞာန်ဂှ်တုဲ ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် အကာဲအရာ က္တဵုဒှ်ဒၟံၚ်အပ္ဍဲဍုၚ်တံဂှ်ဝွံ ဒတူလိုၚ်တၞဟ်ခြာဟွံဂွံရတုဲ ဒးရုဲစှ်မွဲမွဲလ္ပာ်ရဏောၚ်ဂှ် သ္ၚဳဂၠိပ်လဝ်ရ။
“ပ္ဍဲပဋိပက္ခ ပရေၚ်ပၞာန်၊ ပရေၚ်ဍုၚ်ကွာန် မက္တဵုဒှ်ဒၟံၚ် ပ္ဍဲဍုၚ်ဗၟာလၟုဟ်ဂှ်မ္ဂး ဒတူလိုၚ်တၞဟ်ခြာဂှ် ဟွံဂွံပုဟ်။ ဒးရုဲစှ်မွဲမွဲလ္ပာ်ဏောၚ်။ ရံၚ်အာလ္ပာ် ညးတံရုဲစှ်လဝ်မ္ဂးတှ်ေ သွက်ဂွံပံၚ်တောဲပါလုပ် ပ္ဍဲပၠန်ဂတးကောန်ဂကူကရေၚ်ဂှ် ချပ်လဝ်နွံဏောၚ် ထေၚ်ကေတ်ရ။ ဆ္ဂး ပြဟ်ဟ်ဏံလွာဲဂှ်ဂှ် ဒှ်ဟွံသေၚ်ပုဟ်။ ပရေၚ်ချဳဒရာၚ် ကောန်ဂကူကရေၚ်တံ ဗ္ၜတ်တုပ်ကဵု ကံၚ်ဇြဳပၞာန် ဒးကျဗြံဒၟံၚ်ဂှ်ဝွံ သၟဝ်အကာဲအရာ လၟေၚ်ကမၠောန်ပ္တန်ဖေဝ်ဒရာဒဳမဝ်ကရေဇြဳ သၞောတ်တၠအဝဵုပၞာန် ဂွံပြဟ်လလုဲအာဂှ် ဍေံတံ BGF ချပ်ကၠုၚ် သွက်ဂွံပံၚ်တောဲပါလုပ်ဂှ် အဲထေၚ်ကေတ်ရ” သာ်ဝွံ ညးသ္ဂးရ။
ဒပ်မၚ်ပယျဵုကရေၚ် BGF ဝွံ ကေတ်တာလျိုၚ် သွက်ပရေၚ်ဂီုကၠီုပယျဵုကီုလေဝ် အပ္ဍဲကာလသီအဝဵုဏံ ပ္ဍဲပေါဲဗ္တိုက်တွဵုရးကရေၚ်ကဵု တွဵုရးဍုၚ်မန်တံဂှ် ဒးပါလုပ်ရေၚ်တၠုၚ်ဒၟံၚ် ဂတအိုတ်ရ။
အကာဲအရာပရေၚ်ပၞာန် တွဵုရးကရေၚ်လၟုဟ် ဍုၚ်ကအ်ကြိက်၊ ဘာပန်၊ ဗြဝတဳ၊ လှာဒကှ်၊ ကြုၚ်ဒဵု ကေုာံ ဍုၚ်ကျာ်ပိတံဂှ်ဝွံ ဒှ်ဒၟံၚ်အကာဲအရာ ဒးဒုၚ်ဗိုၚ်ကၟာတ်လဒဵုလဝ်တုဲ ပွိုၚ်ဍုၚ်ရေဝ်၊ ၜဳကလေၚ်၊ ကျာ်မြဟ် ကေုာံ ပွိုၚ်ဍုၚ်ကျာ်ထဝ် တွဵုရးဍုၚ်မန်တံဂှ်လေဝ် သွက်ဂွံထ္မံက်ပေါဲဗ္တိုက်သီဍုၚ်တံဂှ် လ္ပာ်ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ပလေဝ်ပလေတ်ဒၟံၚ်အိုတ်ရ။
သ္ကိုပ်ဗိုလ်ဇၞော် သဝ်ချေတ်တူဝွံ ကြဴနူဆဵုဂဗသဳကၠဳကဵု ကံၚ်ဇြဳပၞာန်တုဲဂှ် ကလေၚ်ကော် ကောန်ဒပ် BGF စိုပ်ဒၟံၚ်အပ္ဍဲဒေသဘာပန် ကမမံၚ် တိဍာ်ဒပ်မဟာ ၅ KNU တုဲ ကလေၚ်ဖျေံလဝ်ဒၞါဲ ပ္ဍဲဍုၚ်ယှိုဲကုက္ကိုလ်ဂှ် ဂွံတီကေတ် နူကဵုပရိုၚ်တမ်ရိုဟ် BGF တံရ။
ဒပ် BGF ကရေၚ် ပါ်တိတ်နူသၟဝ်တဲကံၚ်ဇြဳပၞာန်ဂှ်တုဲ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ပဒိုဝ်သဝ်ဂလာသေ သ္ပလဝ်တၚ်စၟတ်ရ။
“ က္ဍိုပ်သ္ကိုပ် ဂကောံ BGF တံကဵု ကောန်ဂကောံတံဂှ် အာဒၟံၚ် နကဵုလညာတ်ပရေၚ်ပၠန်ဂတးဏောၚ်။ မွဲလ္ပာ်ပၠန်ဂှ် တၠအဝဵုပၞာန်ဂှ် ကေမ်ၛာပ်လဝ်အဝဵုတုဲ ဒပ်ပၞာန်ရဟေၚ် ထိၚ်လဝ်အရာရာအိုဿီုတုဲ ဒှ်ဒၟံၚ်ဂကောံ တၠအဝဵုဒက်ပ္တန်လဝ်ဂှ်တုဲ အရာဟွံတုပ်သၟဟ်တံဂှ် ဒှ်အဓိကဏောၚ် ပိုယ်တံ မိက်ဂွံဟီုသာ်ဏံရ” သာ်ဝွံ သ္ဂးရ။
မွဲလ္ပာ်ပၠန်ဂှ် ပ္ဍဲဂိတုဒဳဇြေမ်ဗာကြပ်အိုတ်တုဲကၠုၚ်တေံ နူကဵုဒပ်ပၞာန်သေံ သ္ကိုပ်စၞောန်ပ္ညုၚ် သ္ကိုပ်ဗိုလ်ဂျက်ကာပံၚ် ဂျာန်ဗါန်ပါန် ကၠုၚ်ဆဵုကဵုက္ဍိုပ်သ္ကိုပ်ပၞာန်တုဲ အာတ်မိက်လဝ် သွက်ဂွံဖအိုတ်ကၠေံ ကမၠောန်ကျာဖျ ပယျဵုဗြဝတဳ BGF ကရေၚ်ဂှ်ဏီရ။
ပ္ဍဲဂိတုဂျာန္နဝါရဳ ၁၂ ဂှ်လေဝ် သ္ကိုပ်ပၞာန်ဇၞော် မေန်အံၚ်လှာၚ်ကဵု သ္ကိုပ်က္ဍိုက်ပ်ကာစဵုဒၞါ အလဵုအသဳသေံ Songwit Noonpackdee တံ သွက်ဂွံပံၚ်တောဲဗ္တိုက်သရိုဟ်အာ ကမၠောန်ကျာဖျ ဗ္ဒါဲဍုၚ်ဗြဝတဳဂှ် သဳကၠဳလဝ် နကဵု Video Conferencing ရ။
ကြဴနူဂှ်တုဲ BGF ကရေၚ် တမ်ဒပ်မၞုံ စဵုကဵု ၁၃ တမ်ဒပ်ဂှ် ရမျာၚ်ပါ်တိတ် နူကဵုသၟဝ်သၞောတ်ကဵုအမိၚ် ကံၚ်ဇြဳပၞာန်တံ ဗြုထက်ကၠုၚ်သိုက်က်တုဲ စိုပ်ကၠုၚ်အကာဲအရာ ဒတူလိုၚ်အာတၞဟ်ခြာဏောၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ