မတ်မလီု၊ ဂျာန္နဝါရဳ ၂၈
တွဵုရးဍုၚ်မန် အပ္ဍဲပွိုၚ်ဍုၚ်ဗွဲမဂၠိုၚ် သ္ၚိဒၟံၚ်ဟွံကဵုၚုဟ်ပၟတ်တံဂှ် စနူဂိတုဏံတုဲ ကံၚ်ဇြဳပၞာန် ပလှ်သီကဠာမဳတာတံကဵု ထပိုတ်ဇုက်ပၟတ်တံဂှ် ကၠောန်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ စဵုကဵုဂိတုနဝ်ဝေမ်ဗာ သၞာံတုဲကၠုၚ်တေံ သ္ၚိဒၟံၚ်ဟွံကဵုၚုဟ်ပၟတ်တံကဵု သ္ၚိဒးကဵုခတှ်ပၟတ် သှ်ေဒၟံၚ်လ္တူ ၅ ကိုဋ်တံဂှ် ပလှ်ကဠာမဳတာ ထပိုတ်ဇုက်ပၟတ်တံဂှ် ကၠောန်ကၠုၚ်ရ။
ဒဒှ်မပလှ်ကဠာမဳတာဂှ် သၞာဲဒဴဌာနဓာတ်လလဳ သၟဝ်တဲကံၚ်ဇြဳပၞာန်တံ၊ ကောန်ဒပ်ဗၠာဲသၟိၚ်တံ ကေုာံ ဂကောံပၞာန်ပျဳတုသေတ် သၟဝ်သြဇဴကံၚ်ဇြဳပၞာန်တံဂှ် ဗက်ကၠောန်ၜိုတ်ဒၟံၚ်တုဲ ပ္ဍဲကဵုဒေသလ္ၚဵုတံဂှ် ဟီုဂးဘပဠဒၟံၚ်တံ နွံဒၟံၚ်ဂှ် ဂွံတီကေတ်ရ။
ညးဒေသကျာ်ထဝ် ဒးဒုၚ်ကၠုၚ်စိုပ်ပလှ်လဝ် ကဠာပၟတ်မဳတာ ကုကံၚ်ဇြဳပၞာန်မွဲတၠဂှ် အကာဲအရာညးဒးဂဗလဝ်ဂှ် ဟီုလဴလဝ် သာ်ဏံရ။
“နူဏေံတေံ ဍေံတံကၠုၚ်ဂှ် ဗြဲဂူဒၟံၚ်။ မုဒှ်ရောဟီုတှ်ေ ကၠုၚ်ပလှ်မဳတာဂးရ။ ပေၚ်အာ မသုန်ကိုဋ်ကဵု တြဴဠက်တုဲ ကၠုၚ်ပလှ်ကဠာမဳတာရဂး။ ပိုယ်တံလေဝ် ဒၟါနူဟိုတ်နာနာတုဲ ဟွံဒှ်ကဵု လ္ပပလှ်ညိဟီုတိုန်ဂှ် အဂှ်ေတှ်ေလေဝ် အာဟီုပ္ဍဲရုၚ်ဂးတုဲ ကဵုဆက်ဖုၚ်တုဲ ကဵုလှုဲၜါကိုဋ်ဏောၚ်၊ မသှ်ေတံဂှ် မွဲဂိတုမွဲကိုဋ်ဂးတုဲ အာကဵုထောံလဝ်ပ္ဍဲရုၚ်တုဲ ဟွံပလှ်ဟဂှ်။ ဗွဲမဂၠိုၚ်ဂှ်တှ်ေ ပ္ဍဲကျာ်ထဝ်ဂှ် ဗက်ပလှ်ဒၟံၚ်အိုတ်ယျ” သာ်ဝွံ သ္ဂးရ။
ပ္ဍဲကဵုပွိုၚ်ဍုၚ်လ္ၚဵုတံဂှ် သၞာဲဒဴဌာနဓာတ်လလဳ သၟဝ်တဲကံၚ်ဇြဳပၞာန်တံဂှ် သ္ၚိကဵုလဝ်ၚုဟ်ပၟတ်တုဲတုဲတံဂှ် ခတှ်သှ်ေဒၟံၚ်ဂးတုဲ ထပိုတ်ထောံပၟတ်ဓာတ်လလဳတံ နွံဒၟံၚ်ဂှ် ဂွံတီကေတ် အတိုၚ်ဂလာန် ညးဒေသတံရ။
ညးဒေသမတ်မလီုမွဲတၠဂှ်လေဝ် လ္ပာ်ကံၚ်ဇြဳပၞာန် တၞးလိက်မဳတာတံဂှ် မွဲဂိတုမွဲဝါ ဟွံကဵုမွဲသာ် အရၚ် ၅ ဂိတုဂှ် ကဵုစုတ်ဒၟံၚ်မွဲအခိၚ်ဓဝ်ဂှ်တုဲ ပၠောပ်ဟွံမာန်ဂှ်ရ ဒးဒုၚ်ထပိုတ်ပၟတ်ဓာတ်လလဳတံ နွံဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“မုဒှ်ပြသၞာရောဟီုတှ်ေ ရဲကဵုလဝ်ၚုဟ်ပၟတ်တုဲတုဲတံဂှ်လေဝ် ခတှ်သှ်ေဒၟံၚ်ဏီဂးတုဲ မၞိဟ်ထပိုတ်ဂှ်ထပိုတ် ဒှ်ဒၟံၚ်သာ်ဏံရ။ တုဲပၠန် တၞးလိက်မဳတာဂှ် မွဲဂိတုမွဲဝါ ဟွံတြးကဵုပုဟ်။ မွဲဂိတုမွဲဝါ ဟွံကဵုမွဲသာ် သ္ပသာ်လဵုရောဟီုတှ်ေ သ္ၚိမွဲသ္ၚိဂှ် ကၠုၚ်ကဵု ကွက် ၃၊ ၄၊ ၅ ဂိတု မွဲတဲဓဝ်။ ကၠုၚ်ကဵုမွဲတဲဓဝ်တုဲ တၠသ္ၚိဂှ်တှ်ေ လျိုၚ်ဇြိုၚ်အာဟဂှ်ရ။ ဗီုလဵုဂွံအာပၠောပ်ဂှ်ရော။ သ္ၚိဗွဲမဂၠိုၚ်ဂှ် ဒးဒုၚ်ဒၟံၚ်ဗီုဏံရ” သာ်ဝွံ သ္ဂးရ။
သ္အာၚ်နူဂှ်ပၠန် သၞာဲဒဴဌာနဓာတ်လလဳ သၟဝ်တဲကံၚ်ဇြဳပၞာန်တံဝွံ ဟွံရံၚ်မဳတာတိုန်ဂှ်မွဲသာ် ဗီုဒးစိုတ် ချူကေတ်ယူနေတ်တံဂှ်တုဲ အာတ်မိက်ၚုဟ်ပၟတ်တံဂှ်ကီု၊ တၞးလိက်မဳတာတံဂှ် အခိၚ်ၜက်မှ ကၠုၚ်ကဵုတုဲ အာတ်ဒၟံၚ်သီုၚုဟ်တ္ၚဲလောန်အာတံ နွံဒၟံၚ်ဂှ် ညးဒေသတံ ဟီုဂးလဝ်အိုတ်ရ။
မွဲလ္ပာ်ပၠန်ဂှ် ညးဍုၚ်ကွာန်တံဝွံ ကြဴနူဒပ်ပၞာန်သီအဝဵုတုဲ အခေါၚ်အရာကမၠောန်ကၟိတ် အောန်စှ်ေကၠုၚ်ကီု၊ ကရောံၚုဟ်ဗၞိက်သၠုၚ်တိုန်ကၠုၚ်ဂှ် ဟိုတ်နူဒးပသောၚ်ဒၟံၚ် အခက်အခုဲ ပရေၚ်စသုၚ်မံၚ်စံၚ် သ္ၚိဒၟံၚ်တံဂှ်ရ သွက်ဂွံကဵုၚုဟ်ပၟတ်ဂှ် ဒှ်ဒၟံၚ်ဒဒိုက်ရ။
ဆ္ဂး ဌာနဝန်ဇၞော်ဓာတ်လလဳ ကံၚ်ဇြဳပၞာန် မတြးကဵုဒၟံၚ်ပၟတ် နကဵုသၞောတ်ဒးအလန်ဂှ် ခတှ်ပၟတ်သှ်ေဒၟံၚ် အလုံဍုၚ်မွဲတံဂှ် အပ္ဍဲအခိၚ်စၟတ်လဝ် ညံၚ်ဂွံဂွံဖအိုတ် ဂကောံဆက်စပ်ဂမၠိုၚ် စှ်ေဗလးတိတုဲ သွက်ဂွံဗက်ကံက်ကပှ်အိုတ်ဂှ် စၞောန်ပ္ညုၚ်ကၠုၚ်ရ။
အလဵုအသဳညဳသၟဟ်ဂကူ NUG ဂှ် ကဵုလဝ်အခေါၚ်ဗၠးၜး ၚုဟ်ပၟတ်အရပ်စပ်သ္ၚိတံဂှ်ကီု ပွမဗက်ၚုဟ်ပၟတ်အရပ်စပ်ကမၠောန်တံဂှ် ဒေါအ်လဝ်တုဲ ညံၚ်ဟွံကဵုဒးၚုဟ်ပၟတ် ပၞော်ကံၚ်ဇြဳပၞာန် ဂွံဂွံသြန်လုပ်တံဂှ် လလောၚ်ပ္တိတ်လဝ် တၚ်လလောၚ်တြးရ။
ပရိုၚ်−သြၚ်လောန်တိုၚ်(မ်)
ဗီု−CJ