ကအ်ကြိက်၊ ဂျာန္နဝါရဳ ၂၈
ဒပ်ကံၚ်ဇြဳပၞာန်ဝွံ အလုံဍုၚ်ကအ်ကြိက်မွဲ ညံၚ်ဂွံလီုလာ်အာ နကဵုတၚ်ရန်တၟံနွံနွံ ကၠောန်သ္ပဒၟံၚ် ပရေၚ်ဗ္တိုက်လွဟ်ဇၞော် ကေုာံ ကဵုက္ၜၚ်ကျာတံ ဟွံပိုတ်သ္ကုတ်ဂှ် ကရောၚ်ပၞာန်ကၠဗု မဒှ်ဂကောံဇြဟတ်ပၠန်ဂတးမွဲဂကောံ လလောၚ်ပ္တိတ်လဝ်ရ။
တွဵုရးကရေၚ် လ္တူဍုၚ်ကအ်ကြိက်ဂှ် လလအ်ပွိုၚ်ၜါဂိတု အကြာဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ပရေၚ်ပၞာန်တံ ဆက်သ္ကာတ်မြဟ်ဒၟံၚ်တုဲ ဂိတုဂျာန္နဝါရဳ ၂၆ စနူဗ္တံ ၉ နာဍဳတုဲ ဒပ်ကံၚ်ဇြဳပၞာန် ပန်စုတ်လဝ် လ္တူဍုၚ်ကအ်ကြိက် နကဵုလွဟ်ဇၞော် ဟံၚ်ဝေတ်ဇြာရ။
စနူဂိတုဂျာန္နဝါရဳ ၂၇ အခိၚ်နူဂယးပြဟ် ၁ နာဍဳဝိုက်ဂှ်တုဲ ဒပ်ကံၚ်ဇြဳပၞာန် ထောံဒၟံၚ်မခတိုဟ် ၆၀ တံ လ္တူဍုၚ်ကအ်ကြိက် နကဵုက္ၜၚ်ကျာ Y-12 Military Transport ၂ ဖ္တိုက် ၈၁ မတုဲ ညံၚ်ဍုၚ်ကအ်ကြိက် ဂွံလီုလာ်အိုတ်အးအာဂှ် ဒပ်ကံၚ်ဇြဳပၞာန် နကဵုတၚ်ရန်တၟံနွံနွံ ကၠောန်ၜိုတ်ပလီုဒၟံၚ်ရောၚ် ကရောၚ်ပၞာန်ကၠဗု လလောၚ်ပ္တိတ်လဝ်ပရိုၚ်ရ။
“စကစ (ကံၚ်ဇြဳပၞာန်) ဂှ် ဒၞါဲဆေၚ်စပ်ကဵုပၞာန်ကဵုဒှ် ဟွံဆေၚ်စပ်ကဵုဒှ် ဗ္တိုက်ဒၟံၚ်ကြာန်န်ရဂှ်တုဲ ဒှ်သဘဴပ္တဝ်ဒၟံၚ်က္ဍိုပ် ညံၚ်ဍုၚ်ဂွံလီုလာ်အိုတ်အးရဏောၚ်ဂှ် သ္ၚဳဂၠိပ်ကေတ်ရ” သာ်ဝွံ ညးဒုၚ်တာလျိုၚ်လလောၚ်ပရိုၚ် ကရောၚ်ပၞာန်ကၠဗု ဟီုရ။
ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်ကဵု ဒၟါနူဗ္တိုက်ဂြာတ်မခတိုဟ် နူကဵုက္ၜၚ်ကျာတံဂှ်တုဲ ဍုၚ်ကအ်ကြိက် လ္ပာ်(ချောၚ်းတောၚ်) ပၟတ်တူဒၟံၚ်တုဲ ကၠောန်သ္ပဗ္တိုက်ဂြာတ်ဒၟံၚ်မခတိုဟ် ဟွံပိုတ်သ္ကုတ်သာ်ဏံဂှ်ဝွံ လ္ပာ်ဒပ်ကံၚ်ဇြဳပၞာန် ဒးဂိဒၟံၚ် ဒှ်မာန်ဂှ် ဂွံတီကေတ် ဇရေၚ်ညးဒေသကအ်ကြိက်တံရ။
လ္တူဍုၚ်ကအ်ကြိက်ဂှ် ဂိတုဂျာန္နဝါရဳ ၂၇ နူပယျာံဂယး စဵုကဵုအခိၚ်တ္ၚဲစေၚ် ၂ နာဍဳဝိုက်ဂှ် အကြာဂကောံဇြဟတ်ပၠန်ဂတးတံကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်တုဲ အကာဲအရာဇီုကပိုက်ဒးဂှ် ပြဟ်ဟ်ဏံ ဟွံဂွံတီကေတ်ဏီရ။
ပ္ဍဲကဵုပေါဲဗ္တိုက် မက္တဵုဒှ်ဒၟံၚ် အပ္ဍဲဍုၚ်ကအ်ကြိက်တံဂှ် ဒပ်ကံၚ်ဇြဳပၞာန် ရပ်ဒက်စကာဒၟံၚ် ညးဍုၚ်ကွာန်ဒေသတံ နဒဒှ်ဇွောံစဵုဒၞါပၞာန်တုဲ ထ္ပက်ကၠုၚ်ဒၟံၚ်ကရောၚ်ပၞာန်တုဲ လုပ်စိုပ်ဂၠိုက်ဂၠါဲ ပ္ဍဲသ္ၚိဌာန်ညးဍုၚ်ကွာန်တံဂှ်တုဲ ကေတ်ဏာကပေါတ်ကညောတ်တံတုဲ စံၚ်ပလီုပလာ်ဒၟံၚ်သ္ၚိဒၟံၚ်တံရောၚ်ဂှ် ကရောၚ်ပၞာန်ကၠဗု ဟီုဂးလဝ်ရ။
ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်လဝ်တံဂှ်တုဲ အခိၚ်ပေါဲဗ္တိုက် အပ္ဍဲပွိုၚ် ၂ ဂိတုဂှ် သ္ၚိဒၟံၚ်ညးဒေသ အပ္ဍဲဍုၚ်ကအ်ကြိက် ဗွဲမဂၠိုၚ်ဂၠေၚ် ပၟတ်တူလီုလာ် ဒးဆောံလေၚ်အာရ။
ပ္ဍဲဍုၚ်ကအ်ကြိက်ဂှ် ပ္ဍဲကဵုပေါဲဗ္တိုက် မက္တဵုဒှ်လဝ် ပွိုၚ် ၅ တ္ၚဲ နူဂိတုဂျာန္နဝါရဳ ၂၂ စဵုကဵု ၂၆ ဂှ် လ္ပာ်ဒပ်ကံၚ်ဇြဳပၞာန် ၁၅ တၠ ချိုတ်တုဲ ဟွံအောန်နူကဵု ၁၀ တၠ ဇီုကပိုက်ကလိဂွံလဝ်ဝပ်တုဲ လ္ပာ်ဂကောံဇြဟတ်ပၠန်ဂတးတံဂှ်လေဝ် ကောန်သ္ဂံၚ် ၁ တၠ ပြဟ်လလုဲအာလဝ်ဂှ် ကရောၚ်ပၞာန်ကၠဗု လလောၚ်ပ္တိတ်လဝ်ပရိုၚ်ရ။
ဟိုတ်နူပေါဲဗ္တိုက်ဍုၚ်ကအ်ကြိက်တုဲ နကဵုညးဍုၚ်ကွာန်ဂမၠိုၚ် ပရိုၚ်ဂကူလဵုဒှ်ဒှ် ၜိုန်ဂွံမိၚ်ကေတ်ဒၟံၚ်ကီုလေဝ် ဟွံဂၠိုက်ဂၠါဲသၟာန်သၟုက် ဇရေၚ်ဂကောံပၠန်ဂတးတံမွဲသာ် လ္ပစဴကၠုၚ် ဍုၚ်ကအ်ကြိက်ဂှ်ကီု သွက်ဂွံမံၚ်ဒၟံၚ် ပ္ဍဲဒၞါဲဂီုကၠီုဗၠးဘဲတံသၟးရဂှ်ကီုဂှ် ကရောၚ်ပၞာန်ကၠဗု လလောၚ်ပ္တိတ်ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု− အရှၚ်ကောသာရ