သဓီု၊ ဂျာန္နဝါရဳ ၂၈
ညးဍုၚ်ကွာန်ပါဲဒဴဘဲပၞာန် မ္ဒးဂြိပ်ဒဴပါဲဒလေတ်ဒၟံၚ် ပ္ဍဲကဵုပွိုၚ်ဍုၚ်ၜဳကလေၚ် ကေုာံ ပွိုၚ်ဍုၚ်သဓီု ခရိုၚ်သဓီု တွဵုရးဍုၚ်မန်တံဂှ်ဝွံ ဟိုတ်နူကံၚ်ဇြဳပၞာန် ကၟာတ်လဒဵုလဝ် အခေါၚ်ယိုက်ဏာနၚ်သ္ၚုတံဂှ်တုဲ ဒှ်ဒၟံၚ်အခက်အခုဲဏောၚ်ဂှ် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးဍုၚ်ကွာန်ပါဲဒဴဘဲပၞာန်တံဝွံ စနူကၞောတ်သၞာံတုဲကၠုၚ်တေံတုဲ ကြပ်အရိုဟ်တ္ၚဲ ဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော်ကီု၊ ဟိုတ်နူပေါဲဗ္တိုက် ဗ္ဒိုပ်ဝေန်တာပါန်ၜဳကလေၚ်တုဲ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
ညးဍုၚ်ကွာန်ပါဲဒဴဘဲပၞာန် ထောံလသာသ္ၚိဌာန် မ္ဒးဂြိပ်ဒဴပါဲဒလေတ်ဒၟံၚ်တံဂှ်ဝွံ ကံၚ်ဇြဳပၞာန်ဂှ် မ္ၚးနူကဵုလ္ပာ်ဂၠံၚ် နာတ်ကျဳ ကေုာံ ဂၠံၚ်အကြာကွာန် ဒုၚ်သုက်−လေဝ်ကေတံဂှ် လ္ပာ်ဂၠံၚ်(ဝါးဘိုးတော) တံဂှ် ကၟာတ်လဝ်အခေါၚ်ယိုက်ဏာနၚ်ဇွောံမ သီုကဵုသ္ၚုတံဂှ်တုဲ ဒးဂဗဒၟံၚ်အခက်အခုဲရ။
အတိုၚ်ဂလာန် ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံဂှ်မ္ဂး ယဝ်ရယိုက်ဏာနၚ်သ္ၚုမ္ဂး မၞိဟ်သွံရာန်ဒၟံၚ်သ္ၚုမွဲတၠဝွံ မွဲဂိတုမ္ဂး သ္ၚုပိရိုက်ရ ကဵုအခေါၚ်ပၠောပ်တုဲ ယဝ်ရပၠောပ်ဂၠိုၚ်နူဂှ်မ္ဂး ဖျေံလဝ် ပ္ဍဲကဵုသၞေဟ်ကၚ်စၟဳတ်ကံၚ်ဇြဳပၞာန်တံဂှ် သ္ဂးရ။
ဟိုတ်နူကၟာတ်လဒဵုလဝ် အခေါၚ်ပၠောပ်သ္ၚုတံဂှ်တုဲ ပ္ဍဲကဵုကွာန်ရး လ္ပာ်အပ္ဍဲပွိုၚ်ဍုၚ်ၜဳကလေၚ်တံကဵု သဓီုတံဂှ် သ္ၚုကြံၚ်ၚ်မွဲရိုက်ဂှ် ၚုဟ်တိုန်ဒၟံၚ် စဵုကဵုပွဳပွူမွဲကိုဋ်တုဲ သ္ၚုခိုဟ်မွဲရိုက်ဂှ် ၚုဟ်မၞုံဒၟံၚ် စဵုကဵုမွဲကိုဋ် ပန်ဠက်ဒ္ကေဝ်ရ။
သ္အာၚ်နူဂှ်ပၠန် ဟိုတ်နူဗြဲဂူ ဟွံသေၚ်ကဵုအခိၚ်တံဂှ်တုဲ သွက်ညးပါဲဒဴဘဲပၞာန်တံဂှ် ထပ်နွံပၟိက်ဒၟံၚ် ဖ္ဍာန်ဒဒၚ်တံတုဲ ပွမက္တဵုဒှ်ယဲဇွဟ်ဂစေံ၊ ယဲဇွဟ်ဗက်ကဵုရာသဳတံလေဝ် နွံဒၟံၚ်ဏောၚ် ဂွံတီကေတ်ရ။
ပြဟ်ဟ်ဏံလေဝ် ပွဳပွူဗ္ဒါဲဗ္ဒိုပ်ဝေန်တာပါန်ဂှ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်တုဲ တမ်ဒပ်ကံၚ်ဇြဳပၞာန်တံဂှ် ဟိုတ်နူပန်ပှော်ဒၟံၚ်လွဟ်ဇၞော်တံ ကြပ်အရိုဟ်တ္ၚဲဂှ်ရ ညးဍုၚ်ကွာန်ပါဲဒဴဘဲပၞာန်တံ စဴဌာန်ဒၟံၚ်ဟွံဂွံဏီရ။
ဟိုတ်နူပေါဲဗ္တိုက်ဗ္ဒိုပ်ဝေန်တာပါန်ကဵု ပရေၚ်ပန်ပှော်လွဟ်ဇၞော် လ္ပာ်ကံၚ်ဇြဳပၞာန်တံဂှ်တုဲ ညးပါဲဒဴဘဲပၞာန် နူပွိုၚ်ဍုၚ်သဓီု ကေုာံ ပွိုၚ်ဍုၚ်ၜဳကလေၚ် ၜိုတ် ၃၀၀၀ ဒးဂြိပ်ဒဴဒၟံၚ် ဂၠိုၚ်ကဵုဂိတု နွံဒၟံၚ်ယျ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ