သွက်အခေါၚ်အုပ်ဓုပ်အပိုၚ်ဂှ်ဒးကေတ်တၚ်သ္ပဒတန်ကၠတ်ထဝ်ဏောၚ်က္ဍိုပ်သ္ကိုပ်ပၞာန်ဟီု

နေဗျဳဒဝ်၊ ဂျာန္နဝါရဳ ၂၈

ကံၚ်ဇြဳပၞာန် ဒးဗလးလဝ်တဲ ဒေသကောန်ဍုၚ်အရၚ်လ္ၚဵုတံဂှ် အခေါၚ်အုပ်ဓုပ်အပိုၚ်၊ အခေါၚ်စၞောန်ပျးအပိုၚ်တံဝွံ အာတ်ကေတ်နကဵုဂၠံၚ်တရဴရပ်လွဟ်ဟွံဂွံတုဲ ဒးသ္ပဒတန် ပ္ဍဲကၠတ်ထဝ်ဏောၚ်ဂှ် က္ဍိုပ်သ္ကိုပ်ပၞာန်သီအဝဵု ဟီုရ။

ပ္ဍဲကဵုကောံဓရီု ပရေၚ်ဂီုကၠီု၊ ပရေၚ်ညိၚ်ဝတ်ၜိုဟ်သြိုဟ် ကေုာံ ပရေၚ်သၞောဝ်အုပ်လဒံ မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၆ ဂှ် က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် ဟီုဂးဏာလဝ်ရ။

ဂလာန်က္ဍိုပ်သ္ကိုပ်ပၞာန်ဝွံ ဒပ်မၚ်ပယျဵုကရေၚ် BGF ဇြဟတ်ဒပ် မွဲဠက်ပြၚ်နွံဂှ် ပါ်တိတ်နူသၟဝ်တဲကံၚ်ဇြဳပၞာန်တုဲ ကြဴနူအာတ်ကၠုၚ်အခေါၚ်အုပ်ဓုပ်အပိုၚ်တုဲဂှ် ရမျာၚ်တိတ်ကၠုၚ်သာ်ဏံရ။

က္ဍိုပ်သ္ကိုပ်ကောန်ဍုၚ်အရၚ် ပါလုပ်ဒၟံၚ် ပ္ဍဲကဵုပေါဲဗ္တိုက်ပလှ်ဖျေံသၞောတ်တၠအဝဵုပၞာန်လ္ၚဵုတံဂှ် အလဵုကံၚ်ဇြဳပၞာန်ရ ပလီုကၠေံကၠတ်ထဝ်သီုဖအိုတ် နကဵုလွဟ်လက်နက်တုဲ သီကေတ်လဝ်အဝဵုကၟိန်ဍုၚ်ဂှ်တုဲ ဟီုဂးကၠုၚ်သာ်ဏံဂှ်ဝွံ ညံၚ်ရဴကၠဵု ကလေၚ်ခၟက်ဒၟံၚ်မၞိဟ်ဏောၚ်ဂှ် ခၠေဝ်ပလန်လဝ်ရ။

အပ္ဍဲကာလသီအဝဵုဏံ နကဵုကံၚ်ဇြဳပၞာန် ဟိုတ်နူပရေၚ်ပၞာန် ၁၀၂၇ ဂကောံမဟာမိတ်ကောဒေံပိဂကောံတံတုဲ ပါလုပ်သီုကဵုရးသေံသ္ကုတ်သၟဝ်ကျာဂှ် ပ္ဍဲကဵုရခေၚ်၊ ချေၚ်၊ သက်ကိုၚ် ကေုာံ ကရေၚ်ဍာဲတံဂှ် အပံၚ်ဍုၚ် ၃၀ ပြၚ်ကဵု ဗ္ဒိုပ်ဒပ် ဂၠိုၚ်ကဵုကၠံ ဒးဆောံလေၚ်လဝ်ရ။

က္ဍိုပ်သ္ကိုပ်ပၞာန်ဂှ် ပြသၞာက္တဵုဒှ်ဒၟံၚ်လၟုဟ်တံဂှ်ဝွံ အခေါၚ်စၞောန်ပျးအပိုၚ်၊ အခေါၚ်အုပ်ဓုပ်အပိုၚ် ကေုာံ သွက်ဂွံဂွံဒေသ၊ တွဵုရးတံဂှ်တုဲ အာတ်မိက်ကၠုၚ် နူကဵုမ္ၚးဗွိုၚ်သၞောဝ်ဂှ်ရ စပ်ကဵုပရေၚ်ဍုၚ်ကွာန်တုဲ ဗွဲမဗဗွဲကဵုသၞောဝ်ဥပဒေ၊ စေဝ်ပၞောန်တံဂှ် ဒးရေၚ်တၠုၚ်လေပ် နွံပၟိက်ဒၟံၚ်ဏီဏောၚ်ဂှ် သ္ဂးရ။

နကဵုကံၚ်ဇြဳပၞာန် ထိၚ်ဒက်ဒၟံၚ် ကၟိန်ဍုၚ် ဗွဲမဗဗွဲကဵုသၞောဝ်သ္ဇိုၚ် ၂၀၀၈ ဂှ်တုဲ စပ်ကဵုအခေါၚ်စၞောန်ပျးအပိုၚ်၊ အခေါၚ်အုပ်ဓုပ်အပိုၚ်တံဂှ်တုဲ သဳကၠဳကေတ် နကဵုပရေၚ်ဍုၚ်ကွာန်တုဲ ဒးသ္ပဒတန် ပ္ဍဲကၠတ်ထဝ်ဏောၚ်ဂှ် ဟီုဏာလဝ်ရ။

နကဵု MNDAA ကလေၚ်ကေတ်လဝ်အလုံဒေသကဝ်ကမွဲ နူကဵုတဲကံၚ်ဇြဳပၞာန်ဂှ် အာတ်မိက်ဒၟံၚ် သွက်အခေါၚ်အုပ်ဓုပ်အပိုၚ်ဟွံသေၚ်ပုဟ်ဂှ် ညးမၞုံအခေါၚ်ဟီုဂး ဂကောံကဝ်က လဳကျာဝေန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“ပိုယ်တံဂှ် အာတ်မိက်ဒၟံၚ်ဟွံသေၚ်ပုဟ်။ ကလေၚ်ဒက်ပ္တန်ဒၟံၚ်ဏောၚ်။ အရာနွံဒၟံၚ်တုဲတုဲဂှ် ကလေၚ်ဒက်ပ္တန်ဒၟံၚ်ဏောၚ်။ ကၠတ်ထဝ် ဒပ်ပၞာန်ဗၟာ ပါလုပ်ဒၟံၚ် ၂၅ တၟံကၠံဂှ်ဂှ် ဆလအ်မှ ဒှ်ကၠုၚ်ကၠတ်ထဝ်ဗဗွဲဓဝ်မွဲဟွံသေၚ်ပုဟ်။ ယဝ်ရအာကဵုကၠတ်ထဝ်မ္ဂး နကဵုဒပ်ပၞာန်ဗၟာ ဒးနုက်တိတ်နူကဏ္ဍပရေၚ်ဍုၚ်ကွာန်ကၠတ်ထဝ်ဂှ်ဏောၚ်” သာ်ဝွံ သ္ဂးရ။

သ္အာၚ်နူဂှ်ပၠန် သွက်အခေါၚ်စၞောန်ပျး၊ အခေါၚ်အုပ်ဓုပ်အပိုၚ်တံဂှ် မွဲအခိၚ် အလဵုအသဳညးဍုၚ်ကွာန် ရုဲစှ်ပ္တိုန်လဝ်တံ တိုန်ကၠုၚ်မ္ဂး ဆက်သဳကၠဳအာဏောၚ်တုဲ နကဵုဒပ်ပၞာန် ကွာ်အာ အတိုၚ်မူဝါဒ ပါလုပ်ပ္ဍဲပရေၚ်ဍုၚ်ကွာန်ဟွံဂွံဂှ်ညိဂှ် လဳကျာဝေန် သ္ပလဝ်တၚ်စၟတ်ရ။

နကဵုဂကောံကဝ်က ဂကောံမဟာမိတ်ကောဒေံပိဂကောံ MNDAA ဂှ် အပ္ဍဲပရေၚ်ပၞာန် ၁၀၂၇ ဏံ သီဂွံလဝ် အလုံဒေသကဝ်က ဂွံအခေါၚ်အုပ်ဓုပ်အပိုၚ်ဂှ် သီုကဵုကပေါတ်လွဟ်လက်နက်ပၞာန် ဂၠိုၚ်ကဵုဠက်ရ။

နကဵု MNDAA တိဍာ်သီဂွံလဝ်တံဂှ် ဒက်ပ္တန်အာ နကဵုသၞောဝ်သ္ဇိုၚ် နဒဒှ်ဒေသတၟေၚ်လၟိဟ် (၁) ရးသေံ ဍုၚ်ဗၟာဏောၚ်ဂှ် သ္ကိုပ်က္ဍိုက်ပ်ပၞာန် MNDAA ဥူဖုၚ်တေဝ်ရေန်ဂှ် ကဵုလဝ်သမ္တီလလောၚ်တြးလဝ် ညးဍုၚ်ကွာန်တံ ပ္ဍဲကဵုလိက်သဝဏ်ကၠောံသၞာံ ၂၀၂၄ ရ။

ကံၚ်ဇြဳပၞာန်ဂှ် ပ္ဍဲဍုၚ်ဇကုတံ ဂကူမၞိဟ် ၁၃၅ ဂကူနွံတုဲ ကောန်ဍုၚ်အရၚ် ဂကောံမၞိဟ်ဂၠိုၚ်တံနွံတုဲ ကောန်ဍုၚ်အရၚ် ဂကောံမၞိဟ်အောန်တံလေဝ် နွံဂှ်ရ ကောန်ဍုၚ်အရၚ်တံသီုဖအိုတ် သွက်ဂွံဂွံအခေါၚ်အရာကဆံၚ်တုပ်သၟဟ်ဂှ် သဳကၠဳဒၟံၚ် သွက်ဂွံကၠောန်ပေါဲရုဲမာဲ နကဵုသၞောတ်သ္ပစၞးခဠပ်ဆ သၞောတ် PR ရောၚ်ဂှ် သ္ဂးရ။

နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF မပါလုပ်ဒၟံၚ် ပ္ဍဲပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် သွက်ကံကုသိုလ်ဇကု ဇကုဂွံဒက်ပ္တန်ဂှ် ခၠေဝ်ပလန်လဝ် လ္တူသၞောတ် PR က္ဍိုပ်သ္ကိုပ်ပၞာန် ဟီုလဝ်ဂှ်ရ။

“အာကဵုသၞောတ် PR ဏောၚ်ဟီုတှ်ေ ၜိုတ်ထ္ၜးစ ညံၚ်စကစဍေံတံအာယုက်ဂွံဂၠိၚ် ဟီုဒၟံၚ်ဗီုလၟုဟ်တံဂှ် သွက်ပိုယ်တံ သ္ဇက်ဒးစိုတ်လုပ်စ ဟွံမွဲပုဟ်ဂှ် ညာတ်ရ။ ပလဳပလန်ဒၟံၚ်သာ်ဏံဂှ်လေဝ် နကဵုညးဍုၚ်ကွာန်တံ ညးမွဲမှ ဟွံပတှ်ေပုဟ်ဟီုဂှ် ပိုယ်တံ ဟီုဂွံရ” သာ်ဝွံ သ္ဂးရ။

က္ဍိုပ်သ္ကိုပ်ပၞာန်ဂှ် ပါ်ပရအ်ကဵုလဝ် အဝဵုအာဏာအခေါၚ်ကၠောန် ဗက်ကဵုရးဒေသ ကေုာံ တွဵုရးတံဂှ်တုဲ နကဵုဇကုတံ ညံၚ်ပရေၚ်ဍုၚ်ကွာန် ဂွံညိၚ်ဝတ် ဆဵုဂဗသဳကၠဳဒၟံၚ်ကဵု ဗော်ပရေၚ်ဍုၚ်ကွာန်ဂမၠိုၚ်၊ ဂကောံရပ်လွဟ်ကောန်ဍုၚ်အရၚ်ဂမၠိုၚ်တံဂှ် သ္ဂးလဝ်ရ။

အခိၚ်လၟုဟ် နူကဵုကမ္မယှေန်ပေါဲရုဲမာဲကၟိန်ဍုၚ် ကံၚ်ဇြဳပၞာန် ခါန်ကၞက်လဝ်ဂှ် ဗော်ပ္တိုန်လဝ်စရၚ်အခေါၚ်ဒက်ပ္တန်ဗော် နဒဒှ်ဗော်ပရေၚ်ဍုၚ်ကွာန်ဂှ် ၄၀ ပြၚ်နွံကၠုၚ်ကီုလေဝ် လၟိဟ်ဂကောံရပ်လွဟ်ကောန်ဍုၚ်အရၚ် ဆဵုဂဗသဳကၠဳဒၟံၚ် ကုကံၚ်ဇြဳပၞာန်တံဂှ် ယအ်စှ်ေကၠုၚ်ဒၟံၚ်ရ။

ဂအုပ်ဂကောံဗၠးၜးကောန်ဂကူပအိုဝ် (PNLO) ဒတူလိုၚ်ကၠုၚ်လဝ် အတိုၚ်လိက်ကသုက် NCA အပ္ဍဲပၞာန်သီအဝဵုဂှ် သၞောတ်တၠအဝဵုပၞာန်အိုတ်အးတုဲ စဵုကဵုထ္မံက်ရုပ်ရဴ သၞောတ်ဖေဝ်ဒရာဒဳမဝ်ကရေဇြဳမာန် လုပ်အာပေါဲဗ္တိုက် ကရောံမဟာမိတ်ကောဒေံဘဝတုပ်တံဏောၚ်ဂှ် ပ္ဍဲဂိတုဂျာန္နဝါရဳ ၂၆ တေံ ကဵုလဝ်သမ္တီရ။

နကဵုကံၚ်ဇြဳပၞာန်  အခိၚ်သီအဝဵုကြပ်ပေၚ်ပိသၞာံဏံ သီုကဵုဂကောံရပ်လွဟ်ကောန်ဍုၚ်အရၚ် ၉ ဂကောံကီု ဂကောံဒပ်ပံၚ်ကောံ ဂကောံဒပ်စဵုဒၞါညးဍုၚ်ကွာန် PDF တံကီုဂှ် ပါဲနူၝောံဍုၚ်တုဲ အလုံဍုၚ်မွဲ တြးလဝ်မုက်ပၞာန်တုဲ ဒးဆေၚ်ဒၟံၚ်မုက်ရ။

ပရိုၚ်−သြၚ်လောန်တိုၚ်(မ်)

ဗီု−MOI