ကအ်ကြိက်၊ ဂျာန္နဝါရဳ ၃၀
ဒပ်ကံၚ်ဇြဳပၞာန် နကဵုတၚ်ရန်တၟံနွံနွံ သွက်ဂွံစံၚ်ပလီုပလာ် သ္ၚိဒၟံၚ်ညးဍုၚ်ကွာန်ကောန်အရာပ် လ္တူဍုၚ်ကအ်ကြိက် တွဵုရးကရေၚ် မဒစးဒုၚ်စဳဇန်လဝ်တံဂှ် အခိၚ်ၚးတးတိဍာ် ထ္မံက်ပ္တိတ်လဝ်မာန်ရောၚ် ကရောၚ်ပၞာန်ကၠဗု လလောၚ်ပ္တိတ်လဝ်ပရိုၚ်ရ။
အခိၚ်ကောန်ဒပ်ပၠန်ဂတးတံ ၚးတးပသောၚ်တိဍာ် လ္တူဍုၚ်ကအ်ကြိက်ဂှ် အရာပၟတ်တူလောဲ မပ္တံကဵုစၞပၟတ်အပ္ဍဲသ္ၚိ၊ သၠာတာယာ၊ အေန်ဂျေန်ဝိုၚ်၊ တၞးဆုတၞာၚ်ဆုကှ်ကှ်တံဂှ် ကံၚ်ဇြဳပၞာန် ပကောံလဝ်ပ္ဍဲသ္ၚိတုဲ နကဵုတၚ်ရန်တၟံနွံနွံ သက်သဳဒစးဒုၚ်ကၠောန်လဝ်ဂှ် ကရောၚ်ပၞာန်ကၠဗု လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန်ဝွံ ပိုန်ဒြပ်အရပ်ရာသ္ၚိဌာန် ညးဍုၚ်ကွာန်ကောန်အရာပ်ပိုၚ်တံဂှ် အခေါၚ်ကၠတ်ဂၠံက်ပၟိက်စိုတ်ကီု၊ ဒုၚ်ဒဝ်ပၞာန်ထ္ပက် ဂကောံဒပ်ပၠန်ဂတးတံဟွံမာန်တုဲ ဒးဂြိပ်တိတ်ဆုတ်ကလေၚ်အာမ္ဂးလေဝ် သွက်ဂွံစံၚ်ပလီု သ္ၚိဒၟံၚ်တံဂှ် နကဵုဒပ်ကံၚ်ဇြဳပၞာန် ဂွံလဝ်အခေါၚ် နူကဵုလ္တူတေံတုဲတုဲရဂှ် ပါလုပ် ပ္ဍဲတၚ်လလောၚ်တြးဂှ်ရ။
ပ္ဍဲကဵုဍုၚ်ကအ်ကြိက် ပ္ဍဲဂိတုဂျာန္နဝါရဳ ၂၆ ဂှ် ဒပ်ကံၚ်ဇြဳပၞာန် ပန်ပှော်ဒၟံၚ်ကဵု လွဟ်ဇၞော်တံနွံတုဲ စဵုကဵုဂိတုဂျာန္နဝါရဳ ၂၇ ပယျာံဂယး ၁ နာဍဳဝိုက် စဵုကဵုပွဳပွူ ၇ နာဍဳဂှ်လေဝ် ဒပ်ကံၚ်ဇြဳပၞာန် ထောံဒၟံၚ်မခတိုဟ် နကဵုက္ၜၚ်ကျာ ၂ ဖ္ဍိုက် အပ္ဍဲဍုၚ်ဂှ်ရ သ္ၚိဌာန်ဂမၠိုၚ် ပၟတ်တူလီုလာ်အာလဝ်ရ။
ဂိတုဂျာန္နဝါရဳ ၂၇ အခိၚ်နူဂယး ၜိုတ် ၁၁ နာဍဳဂှ် ဒပ်ကံၚ်ဇြဳပၞာန် ဖျေံလဝ်သ္ဇိုၚ် ပ္ဍဲဘာအရာပ်လ္တူဒဵု အလက (၂) ဍုၚ်ကအ်ကြိက်ဂှ် ဂကောံဒပ်ပၠန်ဂတးတံ လုပ်စိုပ်ၚးတးပသောၚ်တိဍာ်ဂှ် ၜါလ္ပာ်ဟိုတ်နူက္တဵုဒှ်လဝ်ပေါဲဗ္တိုက်ဆေၚ်မုက်တုဲ လ္ပာ်ဒပ်ကံၚ်ဇြဳပၞာန် ဒးဂိလဝ်တုဲ စံၚ်ပတူသ္ၚိဒၟံၚ် ကေုာံ ဘာဗ္တောန်လိက်တံဂှ်တုဲ ကလေၚ်ဆုတ်အာလဝ်ဂှ် ကရောၚ်ပၞာန်ကၠဗု သ္ဂးရ။
ပ္ဍဲကဵုဍုၚ်ကအ်ကြိက် ဟိုတ်နူပေါဲဗ္တိုက်တုဲ သ္ၚိဒၟံၚ်ညးဍုၚ်ကွာန်ဒေသ ဒးဂြိပ်ဒဴပါဲဒလေတ် ထောံလသာသ္ၚိဌာန်တံဂှ် ဟိုတ်နူဒပ်ကံၚ်ဇြဳပၞာန် စံၚ်ပလီုပလာ်၊ ဟိုတ်နူပရေၚ်ပန်ပှော်ဗ္တိုက် နကဵုလွဟ်ဇၞော် ကေုာံ က္ၜၚ်ကျာတံဂှ်တုဲ စမြိုၚ်သ္ၚိဒၟံၚ် ဗၞတ် ၂၀၀ ပၟတ်တူဒးဆောံလေၚ်အာလဝ်ဂှ် ဂွံတီကေတ် နူကဵုပရိုၚ်တမ်ရိုဟ်အပ္ဍဲဒေသတံရ။
အတိုၚ်ဂလာန်ညးဒေသတံဂှ်မ္ဂး သ္ၚိဒၟံၚ်ညးဍုၚ်ကွာန် လ္တူဍုၚ်ကအ်ကြိက်တံဂှ်ဝွံ ဒၟါနူဒပ်ကံၚ်ဇြဳပၞာန် စံၚ်ပလီုပလာ်တုဲ ပၟတ်ဒးတူဒၟံၚ် ဂၠိုၚ်အိုတ်ဂှ် သ္ဂးရ။
ဒပ်ကံၚ်ဇြဳပၞာန်ဝွံ ညံၚ်ဍုၚ်ကအ်ကြိက် ဂွံလီုလာ်အာအိုတ် ပန်ပှော်ဗ္တိုက်ဒၟံၚ် နကဵုတၚ်ရန်တၟံနွံနွံတုဲ စံၚ်ပလီုပလာ်လဝ် သ္ၚိဒၟံၚ်တံဂှ်တုဲ ကလိလောန်ဒၟံၚ်ရောၚ် ကရောၚ်ပၞာန်ကၠဗု လလောၚ်ပ္တိတ်လဝ်ရ။
စပ်ကဵုတၚ်လလောၚ်တြး ကရောၚ်ပၞာန်ကၠဗုတုဲ နူကဵုသြၚ်လောန်တိုၚ်(မ်) ၜိုန်ရပ္တိတ်ဇြဟတ် သ္ဂောံဆက်စၠောံသၟာန်သၟုက် ညးမၞုံအခေါၚ်ဟီုဂး ကံၚ်ဇြဳပၞာန် သ္ကိုပ်ပၞာန်ဇြဝ်မေန်ထောန်ဂှ်ကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ဒပ်ကံၚ်ဇြဳပၞာန် မဒးဗလးလဝ်တဲ ဍုၚ်ဂမၠိုၚ် အပ္ဍဲပေါဲဗ္တိုက်အလုံဍုၚ်မွဲတံဂှ်ဝွံ စံၚ်ပလီုပလာ် စမြိုၚ်လ္တူဍုၚ်တံကဵု သ္ၚိဒၟံၚ်ညးဍုၚ်ကွာန်ကောန်အရာပ်ပိုၚ် မသှ်ေဒၟံၚ်တံဂှ်သၟးဟွံက ဗ္တိုက်ကဵုက္ၜၚ်ကျာတုဲ ပလီုပလာ်ဒၟံၚ် အလုံဍုၚ်မွဲရ။
ရဲထံက်ဂလာန်ဒပ်ပၞာန်တံဂှ်လေဝ် ဍုၚ်ကွာန် ဂကောံဇြဟတ်ပၠန်ဂတးတံ သီထိၚ်ဒက်ဂွံလဝ်တံဂှ် သွက်ဂွံထောံမခတိုဟ်ပလီုပလာ် နကဵုတရဴကျာဂှ် ဆဝ်မ္ၚုဟ်ဒၟံၚ်တံ နွံဒၟံၚ်တုဲ ကွာန်ဒပ်ပၞာန် ဟွံထံက်ဂလာန်တံဂှ် သွက်ဂွံစံၚ်ပလီုပလာ် ဖ္တိုက်ဖ္အောဝ်ဒၟံၚ်တံ နွံဒၟံၚ်ရ။
ဟိုတ်နူပေါဲဗ္တိုက်ကအ်ကြိက် စလဝ် ပ္ဍဲဂိတုဒဳဇြေမ်ဗာ ၁ တေံဂှ်တုဲ လၟိဟ်မၞိဟ်ဂၠိုၚ်ကဵုဠက် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ဒဵုကဵုအခိၚ်လၟုဟ် ဟွံဂံၚ်စဴဌာန်ဒၟံၚ်အိုတ်ဏီပုဟ်ဂှ် ဂွံတီကေတ် အတိုၚ်ဂလာန် ညးဒေသပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ