ဝါယှေန်တာန်၊ ဂျာန္နဝါရဳ ၂၈
သမ္မတအမေရိကာန် ဂျဵုဗိုၚ်ဒေန် သွက်ဂွံသွံတြး က္ၜၚ်ကျာဗ္တိုက် F-16 ၚုဟ်မးမၞုံ ၂၃ ဗဳလျာန်ဒဝ်ဠာ ကုဍုၚ်တူရကဳဂှ် တုပ်လဝ်စိုတ်ရောၚ် ပ္ဍဲဂိတုဂျာန္နဝါရဳ ၂၆ တေံ ကဵုလဝ်သမ္တီ ကုကၠတ်ထဝ်ရ။
တုပ်လဝ်စိုတ် သွက်ဂွံသွံ က္ၜၚ်ကျာဗ္တိုက် F-16 ပ္တိတ်နူကမ္ပဏဳ လံက်ဟဳမာတေန် ၄၀ ဖ္ဍိုက်ကဵု ကိရိယာဂတာပ်ခေတ် ၈၀ ဇရေၚ်တူရကဳရ။
တၚ်တုပ်စိုတ်ဏံဝွံ ကြဴနူတူရကဳ တုပ်လဝ်စိုတ် သွက်ဂွံဒုၚ်တဲ သွဳဒေန် ဒဒှ်ဂကောံနေတဝ်တုဲဂှ် မံက်တိတ်ကၠုၚ်လဝ်တုဲ ကိစ္စၜါဏံဝွံ ဆက်စပ်ဒၟံၚ်တိုက်ရိုက် ဒှ်မာန်ဂှ် သ္ဂးဒၟံၚ်အိုတ်ရ။
သ္အာၚ်နူဂှ်ပၠန် အလဵုအသဳဗိုၚ်ဒေန်ဂှ် သွက်ဂွံသွံတြး က္ၜၚ်ကျာဗ္တိုက် F-35 ဇရေၚ်ဂရိ မဟာမိတ်နေတဝ် နကဵုဒဝ်ဠာအမေရိကာန် ၈ ဒဿမ ၆ ဗဳလျာန်ဂှ်လေဝ် ကဵုလဝ်အခေါၚ်ဏီရ။
တူရကဳ သွက်ဂွံရာန်က္ၜၚ်ကျာဗ္တိုက် F-16 ဂှ် အာတ်မိက်လဝ် နူကဵုသၞာံ ၂၀၂၁ ဂိတုအံက်တဝ်ဗာတေံကီုလေဝ် တၚ်တုပ်စိုတ်တူရကဳ ညံၚ်သွဳဒေန် ဂွံဒှ်ကၠုၚ် ဂကောံနေတဝ်ဂှ် ဟွံမံက်တိတ်ကၠုၚ်ဏီဂှ်ရ လအ်ဒၟံၚ်ရောၚ်ဂှ် ဂွံတီကေတ်ရ။
ကြဴနူလအ်အာ ၂၀ ဂိတုတုဲဂှ် အပ္ဍဲသတ္တာဟတုဲကၠုၚ်တေံ ကၠတ်ထဝ်တူရကဳ သ္ပဒတန်ကၠေံ သွဳဒေန် နဒဒှ်ဂကောံနေတဝ်တုဲ ခြာဟွံလအ်ဂှ် အမေရိကာန် တုပ်လဝ်စိုတ် သွက်ဂွံသွံကဵု က္ၜၚ်ကျာဗ္တိုက်ရ။
နကဵုတူရကဳ ညံၚ်စၟတ်သမ္တီ စပ်ကဵုပရေၚ်ထိၚ်ဒဝ်အခေါၚ်အရာမၞိဟ်ညးတံ ဇြဟတ်ဂွံခိုဟ်ကၠုၚ်ဂှ် ဒးကၠောန်ဏောၚ်တုဲ ညံၚ်ရုယှာ ဗ္တိုက်ၜက်ၜေတ်ဒၟံၚ် ယူကရုၚ် ဂွံဒုၚ်လျိုၚ်ဂှ်လေဝ် ဒးကဵုဇြဟတ်ဂရိုဟ်ဏောၚ်ဂှ် အမေရိကာန် ဟီုရ။
ဌာနဝန်ဇၞော်ကာဍုၚ်သ္အာၚ် ကဵုလဝ်သမ္တီ ဒဒှ်ရကဵုအခေါၚ် သွက်ဂွံသွံတြးက္ၜၚ်ကျာဗ္တိုက်ဂှ် ယဝ်ရကၠတ်ထဝ် ဒစဵုဒစးမ္ဂး အပ္ဍဲ ၁၅ တ္ၚဲ ဒးဒစဵုဒစးဏောၚ်ဂှ် ဂွံတီကေတ်ရ။
ဆ္ဂး နကဵုကၠတ်ထဝ် ဂွံဒစဵုဒစး ဒှ်ဟွံမာန်ပုဟ်ဂှ် အမာတ်ကၠတ်ထဝ်အမေရိကာန်တံ ဟီုဂးလဝ်ရ။
Ref: Reuters