လူအာန်ပရာဗာန်၊ ဂျာန္နဝါရဳ ၃၀
ကောံဓရီုဝန်ဇၞော်ကာဍုၚ်သ္အာၚ်အာဇြဳယာန် မကၠောန်ဗဒှ် ပ္ဍဲဍုၚ်လာအိုဝ်ဂှ် ဗလးလဝ်ညးစၞးကံၚ်ဇြဳပၞာန်သီအဝဵုဂှ် ကလုတ်ကဆံၚ်လ္တူ ဍုၚ်အေန်ဒိုဝ်နဳယှာ သ္ဂးလဝ်ရ။
ဗလးဏာ ညးစၞးကံၚ်ဇြဳပၞာန် သ္ဂောံတိုန်ကောံဓရီု မကၠောန်ဗဒှ်ဒၟံၚ် ပ္ဍဲဂိတုဂျာန္နဝါရဳ ၂၉ ဂှ်ဝွံ ကိတ်ညဳဒၟံၚ်ကဵု မူဝါဒအာဇြဳယာန် စပ်ကဵုအခေါၚ်တိုန်စိုပ်ကောံဓရီုတံဂှ်ဏောၚ် သ္ဂးလဝ်ရ။
သီအဝဵုဍုၚ်ဗၟာ ဂွံ ၂ ဂိတုတုဲ တၚ်တုပ်စိုတ် ၅ တၚ် မတုပ်လဝ်စိုတ် ကုအာဇြဳယာန်ဂှ် လ္ပာ်သ္ကိုပ်ဗိုလ်ပၞာန်တံ ဒၟါနူဟွံထ္မံက်လဝ်ရုပ်ရဴဂှ်ရ ကၟာတ်လဒဵုလဝ်ညးတံ အခေါၚ်တိုန်စိုပ်ကောံဓရီုအဓိက အာဇြဳယာန်ရ။
နကဵုအာဇြဳယာန် ၜိုန်ရမူဝါဒကော်ဘိက် ညစၞးဟွံဆေၚ်စပ်ကဵုပရေၚ်ဍုၚ်ကွာန် နူကဵုဍုၚ်ဗၟာတံ ဂွံတိုန်စိုပ်ကောံဓရီုတံနွံကီုလေဝ် ပ္ဍဲကဵုသၞာံတုဲကၠုၚ်တေံ နကဵုတၚ်ထ္ၜးဟိုတ် သ္ကိုပ်ဗိုလ်ပၞာန်ဂမၠိုၚ် ပါလုပ်ပလာပ်ပထုဲဒၟံၚ် ပ္ဍဲကိစ္စပရေၚ်ဍုၚ်ကွာန်တံဂှ်တုဲ တးပါဲလဝ် အခေါၚ်တိုန်စိုပ်ကောံဓရီုတံရ။
ဝန်ဇၞော်ကာဍုၚ်သ္အာၚ်အေန်ဒိုဝ်နဳယှာ ရာတ်နဝ်မာသူဒဳဂှ် သွက်ကောံဓရီုအာဇြဳယာန်ဂှ် ဒဝ်မာလာတာန်ထိုက် ဝန်အပ္ဍဲလၟိုန် ဌာနဝန်ဇၞော်ကာဍုၚ်သ္အာၚ်ဍုၚ်ဗၟာဂှ်ဝွံ စိုပ်ဒၟံၚ်ဍုၚ်လာအိုဝ်ဂှ် ဟီုလဝ်ကဵု ရာ်တာတုဲ ပရိုၚ်တမ်ရိုဟ် စပ်ကဵုကလုတ်တမာန်တၞဟ်ဟ် ၜါဂှ်လေဝ် သ္ပလဝ်ဒတန်ကီုရ။
ဟိုတ်နူအကာဲအရာဏံတုဲ မူဝါဒအာဇြဳယာန်တံ ပြံၚ်လှာဲအာဟွံသေၚ်တုဲ ဟိုတ်နူညးစၞးဍုၚ်ဗၟာ တိုန်စိုပ်တုဲ အာဇြဳယာန် ပ္ဍဲအရာဖျေံသ္ဂုတ်သွာတ်ဂှ် အရာမဇီုကပိုက်တံ ဟွံမွဲပုဟ်ဂှ် ရာတ်နဝ် ဟီုလဝ်ဏီရ။
ရာတ်နဝ်ဝွံ ပ္ဍဲပရေၚ်ပ္တိတ်ဇြဟတ် သွက်ပရေၚ်ဆဵုဂဗသဳကၠဳ ဂကောံဗော်သွး အပ္ဍဲလၟေၚ်ဒဒှ်ပရေၚ်ဍုၚ်ကွာန်ဍုၚ်ဗၟာဂှ် ဒှ်ညးက္ဍိုက်ဒၟံၚ်က္ဍိုပ်တုဲ ကံၚ်ဇြဳပၞာန်ဂှ် ကုသၟာပကီုပရာပ် ဍေံတံမွဲလ္ပာ်ဓဝ်စၟတ်လဝ်တံဂှ် သဳကၠဳအာဟွံသေၚ်ပုဟ်ဂှ် သ္ဂးလဝ်ရ။
အခိၚ်လၟုဟ် ကံၚ်ဇြဳပၞာန်ဝွံ ကြဴနူသီအဝဵုတုဲ မ္ၚးနူကဵုဖံက်ပ္ကဝ်အခေါၚ်အရာမၞိဟ် ကုကောန်အရာပ်တံဂှ် သီုကဵုကၠောန်သ္ပပြိုက်ဂစိုတ်ဒၟံၚ်တံရောၚ်ဂှ် ညးမၚ်လ္ၚတ်ဂမၠိုၚ် စောတ်စောဲလဝ်ကီုလေဝ် ဒပ်ပၞာန်ဂှ် ကယျာန်ပါဲလဝ်ရ။
Ref: Reuters