လောဲတိုၚ်လျာန်၊ ဂျာန္နဝါရဳ ၃၀
ပြသၞာပရေၚ်ဍုၚ်ကွာန်ဍုၚ်ဗၟာဂှ် သွက်ဂွံဂၠါဲအာသွဟ် နကဵုနဲကဲဆဵုဂဗသဳကၠဳမာန်ဂှ် ပ္တိတ်အာဇြဟတ်ဏောၚ် ကံၚ်ဇြဳကလေၚ်ပ္တန်ရးသေံ RCSS ဒေါအ်ပန်ပှော် လလောၚ်ပ္တိတ်လဝ် နကဵုစၟတ်တ္ၚဲ ဂိတုဂျာန္နဝါရဳ ၂၉ တေံရ။
ကြဴနူကောံဓရီုကၠောံသၞာံ ကံၚ်ဇြဳကလေၚ်ပ္တန်ရးသေံ RCSS မကၠောန်ဗဒှ်လဝ် ပ္ဍဲလောဲတိုၚ်လျာန် ဌာန်ဂအုပ်ဗဟဵု နူဂိတုဂျာန္နဝါရဳ ၂၆ စဵုကဵု ၂၈ တုဲကၠုၚ်တေံတုဲဂှ် လလောၚ်ပ္တိတ်လဝ် တၚ်လလောၚ်တြးရ။
သွက်ဂွံသောၚ်ကလး ပြသၞာပရေၚ်ဍုၚ်ကွာန် ဍုၚ်ဗၟာမာန် နကဵု RCSS ဆဵုဂဗသဳကၠဳ ပ္ညဳပ္ညပ် ကုဂကောံမဆေၚ်စပ်တံတုဲ ပြသၞာပရေၚ်ဍုၚ်ကွာန်ဂှ် သွက်ဂွံသောၚ်ကလး နနဲပရေၚ်သဳကၠဳဆဵုဂဗမာန်ဂှ် ပ္တိတ်အာဇြဟတ်ဏောၚ် သ္ဂးရ။
သ္အာၚ်နူဂှ်ပၠန် ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳမာန်မှဟေၚ် ဒဒှ်ရသောၚ်ကလး ပြသၞာဍုၚ်ဗၟာမာန်ဏောၚ်ဂှ်ကီု သွက်ဂွံသောၚ်ကလးပြသၞာပရေၚ်ဍုၚ်ကွာန်မာန် နကဵုအာဇြဳယာန် သွက်ဂွံလုပ်အကြာရီုဗၚ်ကဵုဂှ် RCSS ဖ္တိုက်ဖ္အောဝ်လဝ်ရ။
နကဵု RCSS ပ္တိတ်အာဇြဟတ်ဂ္စါန်အာ ပရေၚ်ညဳသၟဟ်ကောန်ဂကူရးသေံ ကေုာံ ပရေၚ်ဂွံတန်အာအဓာန်ဇမၠိၚ်မာန်ဂှ်တုဲ ကမၠောန်ကၟာတ်လဒဵုတာဒၞါ ပရေၚ်လီဠာန်သြန်လ္တူအောန်လာၚ် (ကျားဖြန့်) အပ္ဍဲတိဍာ်ထိၚ်ဒဝ်တံဂှ်ကီု၊ ဂဥုဲၜူမာဲ ကေုာံ ပရေၚ်တာဒၞါဗ္တိုက်သ္အး ကူသာန်သွံရာန်မၞိဟ်တံဂှ်လေဝ် ဂ္စါန်ရေၚ်တၠုၚ်အာဏောၚ်ဂှ် လလောၚ်ပ္တိတ်လဝ်ရ။
ကံၚ်ဇြဳကလေၚ်ပ္တန်ရးသေံ RCSS ဝွံ တုဲကၠုၚ်ပ္ဍဲသၞာံ ၂၀၁၅ တေံ ဒှ်ဂကောံရပ်လွဟ်ကောန်ဍုၚ်အရၚ် ပါလုပ်ထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော်အလုံဍုၚ် NCA မွဲရ။
ဆ္ဂး RCSS ဝွံ ကြဴနူဒပ်ပၞာန်သီအဝဵုတုဲ ကေမ်ၛှာပ်မူဝါဒဆဵုဂဗသဳကၠဳတံဂှ်တုဲ မွဲဂကောံဓဝ်ကဵုဒှ်၊ ကဵုက္ဍိုပ်ကဵုဒှ် အာစိုပ်သဳကၠဳလဝ်ပရေၚ်ၜိုဟ်လလမ် ကုကံၚ်ဇြဳပၞာန် ဟွံအောန်နူကဵု ၆ ဝါရ။
ပရိုၚ်−သြၚ်လောန်တိုၚ်(မ်)
ဗီု−Social Media