ပ္ဍဲတွဵုရးဍုၚ်မန် ၜိုန်ရပရေၚ်ကၠတ်ဂၠံက်ပၠံၚ်ၜးကဵုဂကောံတံ နွံကၠုၚ်ကီုလေဝ် ကံၚ်ဇြဳပၞာန် ကေတ်အရေဝ်ဟွံမာန်

မတ်မလီု၊ ဂျာန္နဝါရဳ ၃၀

ကြပ်ဇၟာပ်ပွိုၚ်ဍုၚ် တွဵုရးဍုၚ်မန်ဂှ် ပရေၚ်ကၠတ်ဂၠံက်ပၠံၚ်ၜးတံ မွဲတ္ၚဲတုဲမွဲတ္ၚဲ ပရေံတိုန်ကၠုၚ်တုဲ နွံကၠုၚ်စဵုကဵုဒက်က္ဍိုပ် ပၠံၚ်ၜးကၠတ်ဂၠံက်ကၠုၚ်တံကီုလေဝ် လ္ပာ်ကံၚ်ဇြဳပၞာန် ထ္မံက်ပ္တိတ်ကေတ်အရေဝ်ဟွံမာန်ဏီပုဟ်ဂှ် ညးဒေသတံ ပါ်ပါဲလဝ်ရ။

အပ္ဍဲကာလဒပ်ပၞာန်သီအဝဵု ဗ္ဒါဲပွိုၚ်ပိသၞာံဏံ ကြဴနူဆောံလေၚ်ကၠုၚ် သၞောဝ်ဥပဒေအုပ်လဒံတံတုဲဂှ် အလုံတွဵုရးမွဲ ကြပ်အရိုဟ်ဒဒှ်တ္ၚဲ ကွဳလိုန်ဓာတ်ဂမၠိုၚ် ဒးဒုၚ်ကၠတ်ဂှ်ကီု၊ ဖုၚ် ကေုာံ သြန်လှုဲ ဒးဒုၚ်ကၠတ်ဂၠံက်ပၠံၚ်ၜးတံသၟးဟွံက ပွဒုစရိုတ် ဒက်က္ဍိုပ်တံဂှ်လေဝ် က္တဵုဒှ်ကၠုၚ်ရ။

စနူကဵုလ္တူဍုၚ်တံဂှ် ပွဒုစရိုတ်ကဵုဂကောံတံဂှ် ကလိလောန်ကၠုၚ် ထေၚ်ၚ်လဵုလဵုကီုလေဝ် ဂကောံဒပ်ဂီုကၠီု ကံၚ်ဇြဳပၞာန်တံဂှ် ဂၠိုက်ဂၠါဲထ္မံက်ပ္တိတ်ကေတ်အရေဝ်ဟွံမာန်ဂှ်ရ အကာဲအရာပရေံစှ်ေကၠုၚ်ဂှ် ညးဒေသတံ ပါ်ပါဲလဝ်ရ။

ညးဒေသမတ်မလီုမွဲတၠဂှ် ပ္ဍဲကဵုပရေၚ်ကၠတ်ဂၠံၚ်ပၠံၚ်ၜးတံဂှ် ကွဳလိုန်ဓာတ် ဒးဒုၚ်ကၠတ်ဂှ်ဝွံ က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲတုဲ ယဝ်ရဒးဒုၚ်ကၠတ်ကပေါတ်ကညောတ်တံဂှ်မ္ဂး ဟွံကလေၚ်ဂွံရတုဲ စိုပ်ကၠုၚ်ဒဵုကဵုဍာ်ဏံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

“မွဲမွဲတ္ၚဲ ကွဳလိုန်ဓာတ်တံဟီုမ္ဂးလေဝ် လၟိဟ်ဖ္ဍိုက်ဂှ် ရိုဟ်ဗက်ဟွံမာန်ရ။ ကၠုၚ်သုၚ်ဍာ်လက်ဖက် အခိၚ်စဴဂှ် ဟွံမွဲရပုဟ်။ မၞိဟ်ကၠတ်ဏာဂှ်လေဝ် ဍေံတံကၠတ်ကဵုဂကောံဏာၚ်။ ပၠံၚ်ဖုၚ်တံ မုတံဂှ် လၟုဟ်တှ်ေ သာပရေံအာယျ။ ဣညအ်ဂှ်လေဝ် ဗက်ဗ္တိုက်သ္အးဒၟံၚ်ဟွံမွဲပုဟ်။ ကမၠတ်ဒမၠမတာတံဂှ်လေဝ် ဗက်ရပ်လၞိန်ဗပိန်ဒၟံၚ်ဂှ် ဟွံမွဲပုဟ်။ ပိုယ်တံဂှ် မုဂွံသ္ပပဓာန်မုရော။ ဖုၚ်ဒှ်ဒှ်၊ ကွဳလိုန်ဓာတ်ဒှ်ဒှ်၊ ကယျိုၚ်ကယျဝ်ထဝ်သြန်တံဒှ်ဒှ်၊ ကပေါတ်ၚုဟ်မးမၞုံတံဂှ်ဒှ်ဒှ် ကၠာဂွိုအ်ကၠေံဂှ် ဂိုၚ်ဒေပ်ခိုဟ်ဟ်၊ ကၠေံအာတုဲ အာဟီုတှ်ေ အဲဂံၚ်ဟီုရ၊ ၁၀၀ တၟံကၠံ ဂွံကလေၚ်ဂွံ ဟွံမွဲရပုဟ်” သာ်ဝွံ သ္ဂးရ။

ကုမၞိဟ်ကလိလောန် ပွဒုစရိုတ်ပၠံၚ်ၜးကၠတ်ဂၠံၚ်တံဂှ် အာတေၚ်ကီုလေဝ် ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံဂှ် ထ္မံက်ပ္တိတ်ရပ်ဒက်တံ ဟွံမွဲဂှ်ရ ကဵုၚုဟ်ကုဗၠာဲသၟိၚ်တုဲ ကၠောန်ၜိုတ်ဒၟံၚ်ဟာဟီုဂှ် ညးဒေသတံ ပ္တိတ်ဒၟံၚ်သၟာန်တံ နွံဒၟံၚ်ရ။

ညးဒေသမတ်မလီုမွဲတၠပၠန်ဂှ်လေဝ် ပွဒုစရိုတ်တံ ဂၠိုၚ်ကၠုၚ်အပ္ဍဲဒေသဂှ်ဝွံ ဟိုတ်နူဂဥုဲၜူမာဲကဵု အခက်အခုဲပရေၚ်ပိုန်ဒြပ်တံမဒှ်တုဲ လၟုဟ်မ္ဂး ဂွံတိတ်မ္ၚးရဂှ် ဒှ်ဒၟံၚ်အကာဲအရာ ဇၟာပ်မၞိဟ်ဒးဂွိၚ်ဒၟံၚ်ဏောၚ်ဂှ် ဟီုရ။

“အဓိကဂှ်တှ်ေ ဂဥုဲၜူမာဲရဏောၚ်။ ညးသၟတ်လ္ၚဵုတံဂှ် အခက်အခုဲပရေၚ်ပိုန်ဒြပ်လေဝ် ပါဏောၚ်။ ညးသၟတ်လ္ၚဵုတံဂှ် စပ်ကဵုဂဥုဲၜူမာဲတုဲ ကြအ်ဂဥုဲတံ မုတံလေဝ် နွံရ။ တုဲပၠန် ဍေံတံဂှ်တှ်ေ ဒှ်မ္ဂး ဒုၚ်ထောံဏောၚ် ဒှ်ဒၟံၚ်ဗီုပြၚ်ဏံရ။ လၟုဟ်မ္ဂး ဒှ်စမွဲသာ်ၜါရာ တိတ်မ္ၚးမ္ဂး ဇၟာပ်မၞိဟ်ဂှ် ဒှ်ဒၟံၚ်အကာဲအရာ ဒးဂွိၚ်ဒၟံၚ်ဏောၚ်” သာ်ဝွံ သ္ဂးရ။

သ္အာၚ်နူဂှ်ပၠန် မၞိဟ်ကလိလောန် ပွကၠတ်ဂၠံက်ပၠံၚ်ၜးလၟုဟ်တံဝွံ ဒက်ဂကောံတုဲ ကၠောန်ၜိုတ်ကၠုၚ်ဂှ်ရ ယဝ်ရက္တဵုဒှ်ပရူမ္ဂး နကဵုညးဍုၚ်ကွာန်တံ ဂွံတဝ်စၞေဟ်ဂှ် ဝါတ်ဂါတ်ကၠုၚ်တုဲ ဒးဆေၚ်ဒၟံၚ်မုက် ကုအကာဲအရာ ညးဒးညးဒုၚ်ဂှ် ညးဆက်ဟီုရ။

ညးမကလိလောန် ပွဒုစရိုတ်တံဂှ်ဝွံ ၜိုတ်ၚုဟ်မးညိညရ နွံဂှ် ကဵုဘဲကုအန္တရာယ်လမျီုမၞိဟ်တံတုဲ ကလိလောန်ကၠုၚ်ဒုဟ်ဒဏ်တံတုဲ ကုမၞိဟ်ကလိလောန်ဒုဟ်ဒဏ်တံဂှ် အာတေၚ် ဇရေၚ်ဒပ်ဗၠာဲသၟိၚ် ကံၚ်ဇြဳပၞာန်ကီုလေဝ် ရပ်ဒက်ကေတ်ကဵုအရေဝ်တံ ဟွံမွဲပုဟ်ဂှ် ညးဒေသတံ ဟီုရ။

မွဲလ္ပာ်ပၠန်ဂှ် ကံၚ်ဇြဳပၞာန်ဝွံ မ္ၚးနူကဵုမုက်ဂၠံၚ်လုပ်တိတ်ဍုၚ် အပ္ဍဲဒေသဂှ် ဒၞါဲပြးဇး စုတ်လဝ်ကမ္မရာ CCTV ပေၚ်ၚ်ကီု၊ ထ္ၜးဟိုတ်ပရေၚ်ဂီုကၠီုတုဲ ဂေတ်ကၠုၚ်ကၚ်တံသၟးဟွံက ပ္ဍဲကဵုဒၞါဲပၟိက်ဇၞော်တံဂှ် စၟဳတ်ဒၟံၚ်အရိုဟ်တ္ၚဲကီုလေဝ် ရပ်ဂွံမၞိဟ်ကလိလောန်ပွဒုစရိုတ်တံဂှ် ဟွံမွဲဏီရ။

အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ လလောၚ်ပ္တိတ်လဝ် ပ္ဍဲဂိတုဂျာန္နဝါရဳ ၂၂ ဂှ်မ္ဂး ဒပ်ကံၚ်ဇြဳပၞာန်၊ ဂကောံဒပ်ဗၠာဲသၟိၚ်တံဂှ်ဝွံ စၞးဒတုဲဖဵုညးဍုၚ်ကွာန်ဂှ် ရေၚ်တၠုၚ်ကၠုၚ် သွက်ဖဵုပူဂဵု ဟွံသေၚ်မ္ဂး သွက်ကံၚ်ဇြဳပၞာန်သၟးဂှ်ရ ဆောံလေၚ်ကၠုၚ်ပရေၚ်သၞောဝ်အုပ်လဒံတံရောၚ် ထ္မံက်ထ္ၜးလဝ်ရ။

ဟိုတ်နူအကာဲအရာသာ်ဏံတုဲ ပ္ဍဲကာလသီအဝဵုဏံ အပ္ဍဲဒေသမန် ပရေၚ်အုပ်ဓုပ်ဒေသန္တရ ကံၚ်ဇြဳပၞာန်၊ ပရေၚ်စဳရေၚ်သၞောဝ်ဓဝ် ကေုာံ ပရေၚ်ဒုၚ်ကာပရေၚ်ဂီုကၠီုညးဍုၚ်ကွာန်တံဂှ် ညးဍုၚ်ကွာန်ဒေသတံ သ္ပပဓာန်ပတှ်ေကၠုၚ်အောန်စှ်ဂှ်ေ ဟီုလဝ် ပ္ဍဲလိက်ဒုၚ်စဳရေၚ်ဂှ်ရ။

ပရိုၚ်−သြၚ်လောန်တိုၚ်(မ်)

ဗီု−Social Media