မတ်မလီု၊ ဂျာန္နဝါရဳ ၃၁
ပပ္တံနူအခိၚ်ဒပ်ပၞာန်သီအဝဵုတုဲ ဟိုတ်နူပရေၚ်ပန်ပှော် ဂကောံဒပ်ပၠန်ဂတးကောန်ဍုၚ်အရၚ်တံဂှ်တုဲ က္ၜၚ်ကျာပၞာန် ဟွံအောန်နူကဵု ၆ ဖ္ဍိုက် လီုလာ်အာလဝ်တုဲ ကောန်ဒပ်ကံၚ်ဇြဳပၞာန်ဗွဲမဂၠိုၚ်ဂၠေၚ် ပါလုပ်သီုကဵုဂအုပ်သ္ကိုပ်ဗိုလ်မွဲတၠ ချိုတ်အာလဝ်ဂှ် ဂွံတီကေတ် အတိုၚ်စၟတ်သမ္တီ သြၚ်လောန်တိုၚ်(မ်) ကံက်ကပှ်လဝ်ရ။
ပ္ဍဲဂိတုဂျာန္နဝါရဳ ၂၉ တေံ ဂကောံဒပ်ပံၚ်ကောံပၠန်ဂတးတံ လုပ်စိုပ်ပန်ဗ္တိုက်လဝ် က္ၜၚ်ကျာသၞေၚ်ဝဲဒပ်ကံၚ်ဇြဳပၞာန် ၂ ဖ္ဍိုက် ပ္ဍဲကဵုတေန်ဂါန်ညဳနံၚ်၊ ပွိုၚ်ဍုၚ်ဗြဝတဳ၊ တွဵုရးကရေၚ်ဂှ် က္ၜၚ်ကျာသၞေၚ်ဝဲ Eurocopter 365 မွဲဖ္ဍိုက် လီုစှ်ေအာလဝ်ရ။
ပ္ဍဲကဵုက္ၜၚ်ကျာသၞေၚ်ဝဲလီုစှ်ေဂှ် ပါလုပ်သီုကဵုဂအုပ်သ္ကိုပ်ဗိုလ် အေမေန်နံၚ် သ္ကိုပ်ၝောံဒပ် ၄၄ ဂှ် သ္ကိုပ်ဗိုလ် ၃ တၠ၊ ဗိုလ် ၁ တၠ အပံၚ်ဖအိုတ် ၅ တၠ ချိုတ်အာလဝ်တုဲ ၁ တၠ ကလိဂွံလဝ်ဝပ်ဂှ် KNU လလောၚ်ပ္တိတ်လဝ်ရ။
က္ၜၚ်ကျာသၞေၚ်ဝဲဏံဝွံ နူကဵုဌာန်ဂအုပ်ပၞာန်ရးအဂၞဲမတ်မလီုမွဲကဆံၚ် အခိၚ်စိုပ်ကၠုၚ် သ္ဂောံပြံၚ်တာလျိုၚ် တမ်ဒပ် ခမရ ၃၅၆ မၞုံပ္ဍဲတေန်ဂါန်ညဳနံၚ်ဂှ် ဂကောံဒပ်ပံၚ်ကောံပၠန်ဂတး KNU တံ ဘိုၚ်ကၟာတ်လဒဵုပန်ဗ္တိုက်လဝ်ရ။
ပ္ဍဲဂိတုဂျာန္နဝါရဳ ၁၆ ဂှ် အပ္ဍဲပေါဲဗ္တိုက် မက္တဵုဒှ်လဝ် အကြာဒပ်ကံၚ်ဇြဳပၞာန်ကဵု ဒပ်ပၞာန်ဗၠးၜးကချေၚ် KIA ပ္ဍဲရးသေံသၟဝ်ကျာ၊ ပွိုၚ်ဍုၚ်ကောတ်ခိုၚ်၊ နဖါတ်ဂှ် က္ၜၚ်ကျာဗ္တိုက် ဒပ်ကံၚ်ဇြဳပၞာန် မဗ္တိုက်ထောံဒၟံၚ်မခတိုဟ် ၁ ဖ္ဍိုက် KIA ပန်ဖျေံတုဲ လီုစှ်ေအာလဝ်တုဲ သ္ကိုပ်က္ၜၚ်ကျာ ၂ တၠ ဒးချိုတ်အာလဝ်ရ။
ပ္ဍဲဂိတုဂျာန္နဝါရဳ ၃ ဂှ်လေဝ် က္ၜၚ်ကျာသၞေၚ်ဝဲ ၁ ဖ္ဍိုက် ကၠုၚ်ပလံၚ်ဇွောံမ ပ္ဍဲဗ္ဒိုပ်ဒပ်နာဖအ် ဒပ်ကံၚ်ဇြဳပၞာန် ပ္ဍဲပွိုၚ်ဍုၚ်ဝိုၚ်မဝ် တွဵုရးကချေၚ်ဂှ် ဒပ်ပၞာန်ဗၠးၜးကချေၚ် KIA ပန်ဖျေံတုဲ လီုစှ်ေအာလဝ်တုဲ ၆ တၠ ချိုတ်အာလဝ်ဂှ် ဂွံတီကေတ်ရ။
သ္အာၚ်နူဂှ်ပၠန် တုဲကၠုၚ်ပ္ဍဲဂိတုနဝ်ဝေမ်ဗာ ၁၁ သၞာံ ၂၀၂၃ တေံ အပ္ဍဲပေါဲဗ္တိုက်ဖယျာဖျူ ပွိုၚ်ဍုၚ်ဒဳမဝ်သဵု တွဵုရးကရေၚ်ဍာဲဂှ် က္ၜၚ်ကျာဗ္တိုက်ဒပ်ကံၚ်ဇြဳပၞာန် ဂကူသာသာ ၁ ဖ္ဍိုက် မကၠောန်သ္ပဗ္တိုက်ဒၟံၚ်နူကဵုတရဴကျာဂှ် ဂကောံပံၚ်ကောံဒပ်ပၠန်ဂတးကရေၚ်ဍာဲတံ ပန်ဖျေံမာန်လဝ်ရ။
က္ၜၚ်ကျာဗ္တိုက်ဏံဝွံ လီုစှ်ေအာလဝ် အကြာတွဵုရးကရေၚ် ပွိုၚ်ဍုၚ်(သံတောၚ်ကြီး) ကွာန်မာယိုဝ်ဖိုဝ်လဳ ကဵု ကွာန်ကမာဒဳဖိုဝ်လဳ ညးဒေသကော် ယုၚ်ခဳဂှ် ဂွံတီကေတ် အတိုၚ်တၚ်လလောၚ်တြး KHRG ရ။
ဟိုတ်နူပရေၚ်ပန်ပှော် ဂကောံဒပ်ပၠန်ဂတးကရေၚ်ဍာဲတံတုဲ နူကဵုက္ၜၚ်ကျာဗ္တိုက် လီုစှ်ေအာလဝ်ဂှ် မၞိဟ်ဒဳက္ၜၚ်ကျာ ၂ တၠ ဆၚ်စှ်ေကဵုက္ဍိုၚ်ကျာတုဲ ပ္ဍဲဂိတုနဝ်ဝေမ်ဗာ ၁၉ ဂှ် မၞိဟ်ဒဳက္ၜၚ်ကျာဒပ်ပၞာန် သ္ကိုပ်ဗိုလ်ခိုၚ်တမိုဝ် မအောပ်ဒၟံၚ် ပ္ဍဲဒဵုဂြိုပ်ဂှ် ဂကောံပၠန်ဂတးတံ ရပ်ဂွံလဝ်နတဲရ။
သ္အာၚ်နူဂှ်ပၠန် အပ္ဍဲသၞာံ ၂၀၂၃ ဂိတုဂျောန်ဂှ်လေဝ် ဗ္ဒါဲကွာန်တၟိ တွဵုရးကရေၚ်ဍာဲ ဒပ်ကံၚ်ဇြဳပၞာန်ကဵု ဂကောံဒပ်ပံၚ်ကောံပၠန်ဂတးကရေၚ်ဍာဲတံ က္တဵုဒှ်လဝ်ပေါဲဗ္တိုက်တုဲ ဂကောံဒပ်ပၠန်ဂတးကရေၚ်ဍာဲတံ ပန်ဖျေံဂွံလဝ် က္ၜၚ်ကျာဗ္တိုက်ဒပ်ကံၚ်ဇြဳပၞာန် ဂကူသာသာ ၁ ဖ္ဍိုက်ရ။
တုဲကၠုၚ် အပ္ဍဲသၞာံ ၂၀၂၁ ဂိတုမေတေံဂှ်လေဝ် ဗ္ဒါဲကွာန်ကုန်လဝ် ပွိုၚ်ဍုၚ်မိုဝ်မံက် တွဵုရးကချေၚ် ကၠုၚ်စိုပ်ဂြာတ်လဝ်ဗုမ် အပ္ဍဲပေါဲဗ္တိုက်ၜါလ္ပာ်ဂှ် KIA ပန်ဖျေံလဝ် က္ၜၚ်ကျာသၞေၚ်ဝဲ ဒပ်ကံၚ်ဇြဳပၞာန် ၁ ဖ္ဍိုက်ရ။
ပရိုၚ်−သြၚ်လောန်တိုၚ်(မ်)
ဗီု− Social Media