လူအာန်ပရာဗာန်၊ ဂျာန္နဝါရဳ ၃၁
ပဋိပက္ခဍုၚ်ဗၟာ ဂွံအိုတ်အးဂှ်ကီု ပြသၞာစပ်ကဵုပရေၚ်ၜိုဟ်လလမ်တံဂှ် အာက္ဍိုပ်တုဲ သွက်ဂွံသောၚ်ကလးစကေတ်တ်ဂှ် ဖ္တိုက်ဖ္အောဝ်လဝ် နူကဵုကောံဓရီု ဝန်ဇၞော်ကာဍုၚ်သ္အာၚ်အာဇြဳယာန် မကၠောန်ဗဒှ်လဝ် ပ္ဍဲဂိတုဂျာန္နဝါရဳ ၂၉ တေံရ။
ကြဴနူကောံဓရီုကာဍုၚ်သ္အာၚ်အာဇြဳယာန်တုဲဂှ် တၚ်လလောၚ်တြး မမံက်တိတ်ကၠုၚ်တံဂှ် နကဵုဝန်ဇၞော်ဂမၠိုၚ် စပ်ကဵု ကဵုအရီုဗၚ် ညးဍုၚ်ကွာန်ဍုၚ်ဗၟာတံကီု သွက်ဂွံဆက်စၠောံ ကုဂကောံဗော်သွးဆေၚ်စပ်ဂမၠိုၚ် ညးစၞးတၟေၚ်စပ်ကဵုဍုၚ်ဗၟာ ဥက္ကဌဒးအလန် လာအိုဝ်ခါန်ကၞက်လဝ်တံမာန်ဏောၚ်ဂှ် ပတှ်ေစှ်ေစိုတ်ရောၚ် သ္ဂးလဝ်ရ။
ဍုၚ်ဗၟာဝွံ အခိၚ်ဒှ်ဒၟံၚ်ကောန်ဂကောံအာဇြဳယာန် ပဋိပက္ခက္တဵုဒှ်ဒၟံၚ်လၟုဟ်တံ ညံၚ်ဂွံဂွံပရေၚ်ၜိုဟ်လလမ်ဂှ် အာဇြဳယာန် ရီုဗၚ်ကဵုအာဏောၚ် ထပ်သ္ပဒတန်လဝ်ကတိဂှ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ပွမပ္တိတ်ဇြဟတ်သာ်လဵုဟွံဟီု မကိတ်ညဳကဵု အစဳဇန်ပရေၚ်ၜိုဟ်လလမ်ဂှ် အာဇြဳယာန် ထံက်အာဂလာန်ဏောၚ် သ္ဂးလဝ်တုဲ ညံၚ်ပရေၚ်ဗ္တိုက်တံ ဂွံဒေါအ်ဒေၚ် ကေုာံ သွက်ဂွံကဵုအရီုဗၚ်ပရေၚ်ဗ္စာရဏာမၞိဟ်တံမာန် သွက်ဂွံရေၚ်တၠုၚ်အာမွဲမွဲသာသာအိုတ်ဂှ် ဖ္တိုက်ဖ္အောဝ်လဝ်ရ။
ဟိုတ်နူပဋိပက္ခ မက္တဵုဒှ်ဒၟၚ် ပ္ဍဲဍုၚ်ဗၟာလၟုဟ်ဏံတုဲ လၟိဟ်မၞိဟ် ၂ ပြကောဋိကိုဋ်ပြၚ် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တုဲ ပြသၞာမက္တဵုဒှ်ဒၟံၚ်တံဂှ် နကဵုအာဇြဳယာန် သောၚ်ကလးအာသာ်လဵုရော စပ်ကဵုညအ်တုဲ လညာတ်ဟွံတုပ်သၟဟ်တံ နွံဒၟံၚ်ရောၚ် ဂွံတီကေတ်ရ။
ဥက္ကဌအာဇြဳယာန်ကၠာတေံ ဍုၚ်အေန်ဒိုဝ်နဳယှာဂှ်ဝွံ ၜိုန်ရဂ္စါန်ကၠုၚ်လဝ် နကဵုနဲကဲကလုတ်တမာန် ပေါဲသဳကၠဳ ကုဂကောံဇြဟတ် ဒစဵုဒစးဒပ်ပၞာန်တံကီုလေဝ် ဥက္ကဌလာအိုဝ်လၟုဟ်ဂှ် အကာဲအရာလၟုဟ်ဏံ ညံၚ်ဂွံခိုဟ်တိုန် ကၠောန်မာန်ညိဟာဂှ်တုဲ ညးလ္ၚတ်ဂမၠိုၚ် ဒှ်ဒၟံၚ်သံသယအိုတ်ရ။
ပ္ဍဲဂိတုဏံမံက်တေံ ညးစၞးတၟေၚ်အာဇြဳယာန် အေလောန်ကဳယိုဝ် ကေတ်တေတ်ဟောန်ဝွံ ကၠုၚ်စိုပ်ဆဵုဂဗလဝ်ကဵု က္ဍိုပ်သ္ကိုပ်ပၞာန်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ်ပရိုၚ်ကီုလေဝ် စပ်ကဵုလၟေၚ်တရဴညးတုဲ အာဇြဳယာန် ကေုာံ ဍုၚ်ဒးအလန်ဥက္ကဌတံ လလောၚ်ပ္တိတ်လဝ် တၚ်လလောၚ်တြး ဟွံမွဲတုဲ ညးဝွံ ဆဵုဂဗလဝ်ကဵုဂကောံဇြဟတ် ဒစဵုဒစးကံၚ်ဇြဳပၞာန်တံဟာဟီုဂှ်လေဝ် ဟွံဂွံတီကေတ် ကၠးကၠးဖ္ဍးဖ္ဍးရ။
Ref: Reuters