သေတ်တိုဲ၊ ဂျာန္နဝါရဳ ၃၁
ပ္ဍဲတွဵုရးရခေၚ် ပေါဲဗ္တိုက်သ္ကာတ်မြဟ်ဒၟံၚ် အကြာကံၚ်ဇြဳပၞာန်ကဵု ဒပ်ပၞာန်ရခေၚ် AA တံဂှ် ညံၚ်ပရေၚ်ဒေါအ်ပန်ပှော် ဂွံဒှ်ကၠုၚ် ဍုၚ်ကြုက် လုပ်လဝ်အကြာတုဲ သဳကၠဳဒၟံၚ် ကုညးတာလျိုၚ်တံရောၚ် ပရိုၚ်ဂမၠိုၚ် မံက်တိတ်ဒၟံၚ်ရ။
ပ္ဍဲဂိတုဂျာန္နဝါရဳ ၂၈ တေံ ဝန်ဇၞော်ကာဍုၚ်သ္အာၚ်ဗေန်ဂလာန်ဒေတ် Hasan Mahmud ဂှ် စပ်ကဵုဂွံကလေၚ်ပလံၚ်ဖျဴ ရိုဝ်ဟေန်ဂျာ ဌာန်ဒၟံၚ်တံဂှ်တုဲ သဳကၠဳလဝ် ကဵုကလုတ်ကြုက် စပ်ကဵုဍုၚ်ဗေန်ဂလာန်ဒေတ် Yao Wen ရ။
ပေါဲသဳကၠဳဂှ်တုဲ ကလုတ်ကြုက်ဂှ် ယဝ်ရပ္ဍဲတွဵုရးရခေၚ် ဒေါအ်အာပန်ပှော်မ္ဂး ရိုဝ်ဟေန်ဂျာတံ ဂွံစဴဌာန်ဒၟံၚ် ဂၠံၚ်ပံက်အာဏောၚ်ဂှ် ဟီုလဝ်ကဵု ပရိုၚ်မဳဒဳယျာဂမၠိုၚ်ရ။
ညးမၞုံအခေါၚ်ဟီုဂး ဒပ်ပၞာန်ရခေၚ် AA ဥူခိုၚ်သုခဂှ် ဂွံဒေါအ်ပန်ပှော်ပ္ဍဲရခေၚ် အလဵုအသဳကြုက် သဳကၠဳဒၟံၚ် ကုညးမဆက်စပ်တံဂှ် မုပရိုၚ်မှ ဟွံစိုပ်ကၠုၚ်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စပ်ကဵုပရိုၚ်နာဲဟီုဒၟံၚ်ဂှ်တုဲ ပ္ဍဲကဵုပိုယ်တံ မုပရိုၚ်မှ ဟွံစိုပ်ကၠုၚ်ဏီပုဟ်။ ပ္ဍဲတွဵုရးရခေၚ်ဂှ် ဟွံဒုၚ်ကျဖျေံလွဟ်မွဲသာ် ကဵုဒၟံၚ်ဒဒိုက်ကုညးဍုၚ်ကွာန်ပိုယ်တံ လအ်လကာဖာ ဗ္ဒိုပ်ပၞာန်သၞတံဂှ် ဒပ်ပၞာန်ရခေၚ် ဆက်တုဲဗ္တိုက်သၠေက်ဒၟံၚ်ဖိုဟ်ရ။ ဗွဲတၟေၚ် ပ္ဍဲကဵုမေန်ပျာ၊ မျံက်ဥူ၊ ကျံက်ဒဝ်၊ ယတေအ်ဒံၚ်၊ ယာန်ဗျေဝ် ကေုာံ လ္ပာ်ပွိုၚ်ဍုၚ်အာမ်တံဂှ် ပေါဲဗ္တိုက်တံ ဆက်သ္ကာတ်မြဟ်ဒၟံၚ်ဖိုဟ်ရ” သာ်ဝွံ သ္ဂးရ။
နကဵုကံၚ်ဇြဳပၞာန် ဟိုတ်နူပရေၚ်ပၞာန် ၁၀၂၇ တုဲ ဒးကျဗြံကၠုၚ်တုဲဂှ် ကေတ်အရီုဗၚ်ကြုက်တုဲ ကၠောန်ဗဒှ်လဝ် ပေါဲသဳကၠဳဆဵုဂဗ သွက်ဂွံဒေါအ်ပန်ပှော် ကုဂကောံမဟာမိတ်ကောဒေံပိဂကောံ ပ္ဍဲကဵုရးသေံသ္ကုတ်သၟဝ်ကျာဂှ် စဵုကဵုအလန်တတိယရ။
ဟိုတ်ဂှ်ရ နကဵုကြုက် ညံၚ်ရဴရးသေံသ္ကုတ်သၟဝ်ကျာဂှ်ကီု ပ္ဍဲကဵုရခေၚ်ဂှ်လေဝ် ဟိုတ်နူကိုန်စဳမာန်သၞေဟ်ဍာ်ဒမျိုဟ်ကျံက်ဖျူတံ နွံဒၟံၚ်ဂှ်ရ ပ္ဍဲဒေသရခေၚ် ညံၚ်ဂွံဒေါအ်ကၠုၚ်ပန်ပှော် ပ္တိတ်ကၠုၚ်ဇြဟတ်မာန်ရောၚ် ထံက်ထ္ၜးဒၟံၚ်တံလေဝ် နွံဒၟံၚ်ရ။
ညးစိုန်သ္ကီုပရေၚ်ကြုက် ဒံက်တာလှကျဝ်ဇြဝ်ဂှ် နကဵုဒပ်ပၞာန် ကျဗြံဂၠိုၚ်ဒၟံၚ်ဂှ် မိက်ဂွံကဵုဒေါအ်ဒၟံၚ်ပန်ပှော် ပ္ဍဲရခေၚ်ဂှ်ရ ရံၚ်ကေတ်ကြုက် ပ္တိတ်ဒၟံၚ်ဇြဟတ် ဂကောံဗော်သွးၜါလ္ပာ် ညံၚ်ဂွံတက်ကျာပရေၚ်ဍုၚ်ကွာန်မာန်ဏောၚ်ဂှ် သ္ၚဳဂၠိပ်ကေတ်ရ။
“ ဒၞါဲ AA ဂွံလဝ်တအ်ဂှ်လေဝ် ၜိုတ်ဒးရးနွံဒၟံၚ်ယျ၊ ဒှ်ဗီုကဵုလ္ပာ်သၟဝ်ကျာတေံရ။ ဒေါအ်ပန်ပှော်ယာယဳလေဝ် ဒှ်မာန်ဏောၚ်ထေၚ်ရ။ ဒေါအ်ပန်ပှော်ဂှ် လ္ပာ်ဒပ်ပၞာန်လေဝ် နွံပၟိက်မွဲအံၚ်ဏောၚ် ထေၚ်ရ။ မူဟိုတ်ရောတှ်ေ လ္ပာ်ဍေံတံ ကျဒၟံၚ်ဟွံသာပုဟ်တှ်ေလေဝ်။ ဆက်ဂွံကျအာရ နွံ။ ရံၚ်ကေတ်တှ်ေ ကြုက်ဂှ် ညံၚ်ဝိုၚ်တက်ကျာပရေၚ်ဍုၚ်ကွာန်၊ ပရေၚ်ၜိုဟ်လလမ်တံ ဂွံဒှ်ဂှ် ပ္တိတ်ဒၟံၚ်ဇြဟတ်ဏောၚ်ညာတ်ရ။ ဒၟါနူဏံတုဲ ဒေါအ်ပန်ပှော်လေဝ် ဒှ်မာန်ဏောၚ်” သာ်ဝွံ သ္ဂးရ။
နကဵုဒပ်ပၞာန်ရခေၚ် AA ပ္ဍဲကဵုပရေၚ်ပၞာန် ၁၀၂၇ ရးသေံသ္ကုတ်သၟဝ်ကျာဂှ် လုပ်စိုပ်ဗ္တိုက်လဝ် ကရောံဂကောံမဟာမိတ်ကောဒေံ ဂကောံကဝ်က MNDAA ၊ ဂကောံတအာၚ် TNLA တံတုဲ စနူဂိတုနဝ်ဝေမ်ဗာ ၁၃ တုဲကၠုၚ်တေံတုဲ ပံက်လဝ်မုက်ပၞာန် ပ္ဍဲရခေၚ်ရ။
စနူဂှ်တုဲ ဒဵုကဵုအခိၚ်လၟုဟ် အကြာဒပ်ပၞာန်ရခေၚ်ကဵု ဒပ်ကံၚ်ဇြဳပၞာန်တံဂှ် ပ္ဍဲဒေသရခေၚ် ပေါဲဗ္တိုက်တံ ဆက်သ္ကာတ်မြဟ်လဝ်တုဲ အပ္ဍဲဂိတုဂျာန္နဝါရဳ သတ္တာဟဒုတိယ ကဵု အပ္ဍဲသတ္တာဟတတိယဂှ် AA သီဂွံလဝ် ဍုၚ်ပလက်ဝကဵု ပံက်တဝ်ရ။
နကဵုဒပ်ပၞာန်ရခေၚ် ပၞောဝ်ကဵုတမ်ဒပ်ကံၚ်ဇြဳပၞာန် ဖျေံသ္ဇိုၚ်မေန်ပျာ (၃) ဂှ် ပ္ဍဲတမ်ဒပ်ခမရ သှ်ေဒၟံၚ်ၜါဂှ် သွက်ဂွံသီကေတ် ခမရ (၃၇၉) အပိုၚ်မာန်ဂှ် ဆက်ဗ္တိုက်ဒၟံၚ်ပၞာန်ထ္ပက်တံဂှ် ဂကောံမဟာမိတ်ကောဒေံပိဂကောံ သ္ဂးရ။
လ္ပာ်ကံၚ်ဇြဳပၞာန်ဂှ် ပ္ဍဲရခေၚ် မ္ၚးနူကဵုဒၞါဲဒှ်ဒၟံၚ်ပေါဲဗ္တိုက်တံဂှ် ဍုၚ်၊ ကွာန် ဒၞါဲညးဍုၚ်ကွာန်တံ သ္ပဒတဴတံဂှ် စွံပွန်အဓိကတုဲ ဆက်ဗ္တိုက်ဒၟံၚ် နကဵုလွဟ်ဇၞော်၊ လွဟ်ဍောတ်တံဖိုဟ်ဂှ် ပ္ဍဲဂိတုဂျာန္နဝါရဳ ၂၉ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−AA