ပဠဝ်၊ ဂျာန္နဝါရဳ ၃၁
ရးဒေသဇၞော်တၞၚ်သဳ၊ ပွိုၚ်ဍုၚ်ပဠဝ်၊ ကွာန်မဳလံၚ်ချံၚ် စနူဂိတုဂျာန္နဝါရဳ ၃၀ အခိၚ်နူဂယးတုဲ ပေါဲဗ္တိုက်ၜါလ္ပာ်သ္ကာတ်မြဟ်ဒၟံၚ်တုဲ နူကဵုဒပ်ကံၚ်ဇြဳပၞာန် သုၚ်စောဲက္ၜၚ်ကျာတုဲ ဗ္တိုက်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံကဵု ဂကောံဒပ်စဵုဒၞါဒေသတံရ။
နူကဵုဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ လုပ်စိုပ်ဍိုက်ဗ္တိုက် ဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်ကွာန်မဳလံၚ်ချံၚ်တုဲဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
အပ္ဍဲပေါဲဗ္တိုက်ဂှ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ သီဂွံလဝ် ဗ္ဒိုပ်မဳလံၚ်ချံၚ်ကံၚ်ဇြဳပၞာန် ယာယဳကီုလေဝ် ဟိုတ်နူကံၚ်ဇြဳပၞာန် ဗ္တိုက်ဒၟံၚ်ကဵုက္ၜၚ်ကျာ ဟွံပိုတ်သ္ကုတ်ဂှ်တုဲ ဒးဆုတ်ကလေၚ်လဝ်ဂှ် ကောန်သ္ဂံၚ် PDF ပါလုပ်ဒၟံၚ်ပ္ဍဲပရေၚ်ပၞာန်တံ ဟီုရ။
ပ္ဍဲပေါဲဗ္တိုက်ၜါလ္ပာ်ဂှ် ကောန်ဒပ်ကံၚ်ဇြဳပၞာန် ဟွံအောန်နူကဵု ၅ တၠ ချိုတ်အာလဝ်တုဲ မၞိဟ်ကလိဂွံဝပ်ကဵု ဂြိပ်တိတ်တံလေဝ် နွံဒၟံၚ်တၟာဂလိုၚ်တုဲ အပ္ဍဲပရေၚ်ဗ္တိုက်တရဴကျာ ကံၚ်ဇြဳပၞာန်ဂှ် ကောန်သ္ဂံၚ်ပၠန်ဂတး ၃ တၠ ပြဟ်လလုဲအာလဝ်ဂှ် ဂွံတီကေတ်ရ။
ဟိုတ်နူပေါဲဗ္တိုက်မဳလံၚ်ချံၚ်တုဲ လ္ပာ်သ္ကုတ်ဂၠံၚ်ပျဳထံၚ်သု ဗိက်−ထဝါဲဂှ် စဵုကဵုဂိတုဂျာန္နဝါရဳ (၃၀) အခိၚ်လဒေါဝ်တ္ၚဲဂှ် ကွဳစက်အာတရဴ ဂၠိုၚ်ကဵုကၠံ ကၟာတ်ဆိုအ်ဒၟံၚ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
လအာတုပ်သာ်ဂှ်ကီု တ္ၚဲဏံ ပ္ဍဲဂိတုဂျာန္နဝါရဳ ၃၀ ဂှ်လေဝ် ပ္ဍဲရးတၞၚ်သဳ လ္တူဍုၚ်လံၚ်လုၚ်ဂှ် အကြာဒပ်ကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်တုဲ ညးဍုၚ်ကွာန်ကောန်အရာပ် ဇီုကပိုက်ကလိဂွံဝပ်တံ နွံဒၟံၚ်ဂှ် ဂွံတီကေတ်ရ။
ပ္ဍဲရးတၞၚ်သဳဂှ် စနူဂိတုဏံတုဲ အကြာကံၚ်ဇြဳပၞာန်ကဵု ဂကောံဇြဟတ်ပၠန်ဂတးတံဂှ် ပေါဲဗ္တိုက်ကလေၚ်မွဲဝါပၠန်တံ သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန် ရပ်စပ်က္ၜၚ်ကျာ ဗ္တိုက်ကၠုၚ်တံဂှ်လေဝ် ကၠောန်ကၠုၚ်ဂှ် ဂကောံဒပ်ပၠန်ဂတးတံ ဟီုဂးလဝ်ရ။
တုဲကၠုၚ် ပ္ဍဲဂိတုဂျာန္နဝါရဳ ၂၄ ဂှ်လေဝ် ဂကောံဒပ်ပံၚ်ကောံ ဂကောံဇြဟတ်ပၠန်ဂတးတံ ဗ္တိုက်သီဂွံလဝ် ဗ္ဒိုပ်ဒပ်ကျံက်ထု ကံၚ်ဇြဳပၞာန်တုဲ အပ္ဍဲပေါဲဗ္တိုက်ဂှ် ရပ်ဂွံလဝ် ကောန်ဒပ်ကံၚ်ဇြဳပၞာန် ၇ တၠ ဂျိုၚ်ၚ်ဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ