မတ်မလီု၊ ဂျာန္နဝါရဳ ၃၁
တွဵုရးဍုၚ်မန် ဟိုတ်နူဗြဲဟွံသေၚ်ကဵုအခိၚ်တံ ဂူတုဲ ခံက်ၜဵုစဲတ္ၚဲ ကေုာံ သတ်မုဟ်ကျာတံ ဇီုကပိုက်လီုလာ်တံ နွံဒၟံၚ်တုဲ ဒးဆေၚ်ဒၟံၚ်မုက် ကဵုအကာဲအရာ ဒမြိပ်တိတ်အောန်စှ်ေအာတံဂှ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဂျာန္နဝါရဳ ၂၆ တုဲကၠုၚ်တေံတုဲ ပ္ဍဲပ္ၚံက်ၜဳဗေန်ဂလာ ကေုာံ ဗလးၜဳကပ္ပလဳတံဂှ် မတ်ဗြဲက္တဵုဒှ်ဒၟံၚ်ညိညဂှ်ရ သီုတွဵုရးဍုၚ်မန် သီုကဵုတွဵုရး ကေုာံ ရးဒေသလ္ၚဵုတံဂှ် ဗြဲဂူ ဟွံသေၚ်ကဵုအခိၚ်တံ က္တဵုဒှ်ဒၟံၚ်ရ။
ဟိုတ်နူဗြဲဂူတုဲ ဒၞါဲတဵုလွဳသတ်မုဟ်ကျာတံ ဇီုကပိုက်လီုလာ်ကီု၊ ခံက်ၜဵုစဲတ္ၚဲတံ လီုလာ်ဆောံလေၚ်တံ နွံဒၟံၚ်တုဲ ကၠအ်ထၜိုတ်တံလေဝ် ခွါတ်ထၜိုတ်ဟွံဂွံ ဒးဒေါအ်ဇူလဝ်ကမၠောန်တံရ။
ညးကၠောန်ၜဵုစဲတ္ၚဲမွဲတၠဂှ် ဟိုတ်နူဗြဲဂူတုဲ ခံက်ၜဵုကြပ်သီုဖအိုတ် လီုလာ်ဆောံလေၚ်တံ က္တဵုဒှ်ဒၟံၚ်တုဲ ဟိုတ်နူအကာဲအရာ ဒးကလေၚ်ပလေဝ်ပလေတ်ခံက်ၜဵုတံဂှ်တုဲ ၜဵုတိတ်လ္ဇုဲမာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ခံက်ၜဵုဂှ် လီုအာရ။ ဒးဆောံလေၚ်ဂှ်တှ်ေ ၜဵုနွံမံၚ်ပ္ဍဲခေါ်ၜဵုတံသီုဖအိုတ် ဒှ်အာဍာ်အိုတ်ရ။ မၞိဟ်အုဲဟွံဂတာပ်တံဂှ် ဍာ်ဗြဲလုပ်ဂွံတုဲ လီုအာအိုတ်တး။ အေ ဂှ်တှ်ေ အခိၚ်တ္ၚဲကလေၚ်ကာတ်တှ်ေ ဒးကလေၚ်ကၠောန်တၟိပၠန်။ ခေါ်ဂှ် ကလေၚ်စဲဟကှ်တုဲ ပၠေတ်ကၠေၚ်၊ အောန်အိုတ် ၜိုတ် ၁၀ တ္ၚဲ လအ်အာယျဏောၚ်။ အခိၚ်ဂှ်လေဝ်အိုတ်။ ၜဵုဂှ်လေဝ် လအ်တိတ် ဒှ်အာရ။ ခရိတ်အိုတ်ဂှ်လေဝ် ဒးအာတၟာဂလိုၚ်ရ” သာ်ဝွံ သ္ဂးရ။
ကမၠောန်ၜဵုစဲတ္ၚဲတံဝွံ ပ္ဍဲဂိတုဂျာန္နဝါရဳ ၁၄ တေံဂှ်လေဝ် ဒၟါနူဗြဲဂူ ဟွံသေၚ်ကဵုအခိၚ်အခါ အတေံညိအဏံညိဂှ်တုဲ ဇီုကပိုက်လီုလာ်လဝ်တံ နွံလဝ်တုဲ အခါလၟုဟ် ဒးဂဗဒၟံၚ်ကဵု ခံက်ၜဵုလီု အလန်ဒုတိယရ။
ဟိုတ်နူဗြဲဂူ ဟွံသေၚ်ကဵုအခိၚ်အခါလၟုဟ်ဂှ်တုဲ သတ်မုဟ်ကျာ ၜဲကဵု သၞေဝ်ကေဝ် တဵုလွဳလဝ် နူစဗြဲအိုတ်တေံဂှ်ဝွံ ဟိုတ်နူဗြဲတုဲ ခၟောံဇဝ်စဂွံတိတ်တံ လီုလာ်ပြဟ်အာအိုတ်ဂှ် ဂွံတီကေတ်ရ။
“ခၟောံတိတ်လဝ်အခိၚ်ကသီုတံဂှ် ဒးအာဗြဲတုဲ ၝတံဏံဂှ်လီုအာယျ။ သတ်အလန်ဏံဂှ် လီုအာအိုတ်ယျ။ ဒၟါနူဗြဲဏံတုဲ ကလေၚ်ဂွံဓာတ်ဍုက်ညိညတှ်ေ ဇဝ်မွဲဝါပၠန်မ္ဂး သွက်ဂွံသတ်သၟးရနွံ။ ဗြဲဏံဂှ် ဒေါအ်အာၜိုတ်ဏံရမ္ဂးလေဝ် သာညိဏောၚ်။ ယဝ်ရထပ်ဂၠိုၚ်မ္ဂး အရာမဒးလီုလာ်ဂှ် ဂၠိုၚ်ကွေံကွေံဏောၚ်” သာ်ဝွံ ညးတဵုလွဳၜဲမွဲတၠ ဟီုရ။
ဟိုတ်နူဗြဲဂူ ဟွံသေၚ်ကဵုအခိၚ်အခါတံဂှ်တုဲ ခံက်ၜဲတံ ဒးလီုလာ်အာလဝ်ဂှ်ရ ရာသဳၜဲသၞာံဏံ ၜဲတိတ်လ္ဇုဲမာန်တုဲ ဒမြိပ်ၜဲတိတ်လေဝ် စှ်ေမာန်ဂှ် ညးဆက်ဟီုရ။
အခိၚ်လၟုဟ်ဂှ်လေဝ် ဟိုတ်နူဗြဲဆက်ဂူမာန်ဂှ်ရ ညးကၠောန်ၜဵုတံကဵု ရဲတဵုလွဳၜဲတံဝွံ ဒးမၚ်ကျောဝ်ဒၟံၚ်အကာဲအရာတုဲ ယဝ်ရဗြဲဆက်ဂူမ္ဂး အရာမဒးဆောံလေၚ်တံ ဂၠိုၚ်ကၠုၚ်မာန်ရောၚ်ဂှ်လေဝ် ညးတံသ္ဂးအိုတ်ရ။
ဌာနစမ်ၜတ်အကာဲအရာဗြဲကျာဂှ် ပ္ဍဲတွဵုရးဍုၚ်မန် ဗြဲဂူဟွံသေၚ်ကဵုအခိၚ်ဂှ်ဝွံ ပ္ဍဲဂိတုဂျာန္နဝါရဳ ၃၁ ကဵု ဂိတုဖေဖဝ်ဝါရဳ ၁ တေံဂှ်လေဝ် အတေံညိအဏံညိ ဗြဲဂူမာန်ဒၟံၚ်ဏီဂှ် ကဵုသမ္တီလလောၚ်ပ္တိတ်လဝ်ရ။
ပ္ဍဲတွဵုရးဍုၚ်မန်ဂှ် နကဵုကမၠောန်ၜဵုစဲတ္ၚဲ အပ္ဍဲဒေသဂှ် ခံက်ၜဵု အပံၚ် ၄၂၀၀ ဨကပြၚ်နွံတုဲ သတ်မုဟ်ကျာဂမၠိုၚ် ၜဲ၊ သၞေဝ်ကေဝ် ကေုာံ သြောံဂန်တံဂှ်လေဝ် နွံဒၟံၚ် ၁၇၀၀၀၀ ဨကပြၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)