လံၚ်လုၚ်၊ ဖေဖဝ်ဝါရဳ ၁
ပ္ဍဲဂိတုဂျာန္နဝါရဳ ၃၁ အခိၚ်နူဂယးပြဟ် ဂကောံဒပ်ပံၚ်ကောံစဵုဒၞါညးဍုၚ်ကွာန်တံ လုပ်စိုပ်ဗ္တိုက်လဝ် ဗ္ဒိုပ်ဗၠာဲသၟိၚ်တိဍာ်မံၚ်မကာန် ပွိုၚ်ဍုၚ်လံၚ်လုၚ် ရးတၞၚ်သဳဂှ် ဂွံတီကေတ် ဇရေၚ်ညးဒေသတံရ။
ဗ္ဒိုပ်ဗၠာဲသၟိၚ်မံၚ်မကာန် ဒးဒုၚ်ဗ္တိုက်တုဲဂှ် နူဂယး ၆ နာဍဳဝိုက် စဵုကဵု ၇ နာဍဳဝိုက် ပွိုၚ်မွဲနာဍဳပြၚ် ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ က္ၜၚ်ပၞာန်ဒပ်ဍာ်ကံၚ်ဇြဳပၞာန်ဂှ်လေဝ် ပန်ပှော်ဒၟံၚ်လွဟ်ဇၞော် ဟွံပိုတ်သ္ကုတ်ရ။
အပ္ဍဲပေါဲဗ္တိုက်ဂှ် လ္ပာ်ကံၚ်ဇြဳပၞာန် ဇီုကပိုက်ချိုတ်လဝ်တံ နွံလဝ်တုဲ လ္ပာ်ဂကောံဒပ်ပံၚ်ကောံစဵုဒၞါညးဍုၚ်ကွာန်တံဂှ် ဇီုကပိုက်ဒးဟွံမွဲမွဲသာ် ဆုတ်ကလေၚ်မာန်လဝ်ဂှ် ကောန်သ္ဂံၚ် PDF ပါလုပ်ဒၟံၚ်ပ္ဍဲပရေၚ်ပၞာန်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပေါဲဗ္တိုက်ဗ္ဒိုပ်ဗၠာဲသၟိၚ်မံၚ်မကာန်တုဲ ညးဒေသတံဝွံ ပါဲဒလေတ်ဂြိပ်တိုန်အာ လ္ပာ်လ္တူဍုၚ်ထဝါဲကဵု ဒၞါဲဗၠးဘဲတံ နွံဒၟံၚ်ဂှ် ဂွံတီကေတ် အတိုၚ်ဂလာန်ညးဒေသပါဲဒဴဘဲပၞာန်တံရ။
ပ္ဍဲဂိတုဂျာန္နဝါရဳ ၃၀ တုဲကၠုၚ်တေံဂှ်လေဝ် ဂကောံဒပ်ပံၚ်ကောံစဵုဒၞါညးဍုၚ်ကွာန်တံ ကၠုၚ်စိုပ်ဗ္တိုက်လဝ် ကဵုဒရုၚ်တုဲ စမြိုၚ်ဗ္ဒိုပ်ဗၠာဲသၟိၚ်လ္ၚဵု ပၟတ်တူလီုလာ်တံ က္တဵုဒှ်လဝ်ရ။
ပ္ဍဲကဵုတ္ၚဲဂှ်ရ ဂကောံဒပ်ပံၚ်ကောံစဵုဒၞါညးဍုၚ်ကွာန်တံဝွံ မွဲအခိၚ်ဓဝ် ဟိုတ်နူလုပ်စိုပ်ဗ္တိုက်လဝ် ဒၞါဲဒပ်ကံၚ်ဇြဳပၞာန်တံ ဖျေံလဝ်ဒပ် လ္တူဍုၚ်လံၚ်လုၚ် ပိဒၞါဲဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ် လလအ်ပွိုၚ် ၅ နာဍဳပြၚ်ရ။
စပ်ကဵုအကာဲအရာ ပေါဲဗ္တိုက်ဗ္ဒိုပ်ဗၠာဲသၟိၚ်မံၚ်မကာန်ဂှ်တုဲ မ္ၚးနူကံၚ်ဇြဳပၞာန်ဂှ် လ္ပာ်ဂကောံဒပ်ပံၚ်ကောံစဵုဒၞါညးဍုၚ်ကွာန်တံလေဝ် လလောၚ်ပ္တိတ်ကဵုလဝ်သမ္တီ မွဲမွဲသာ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−CJ