ဂါဇြာ၊ ဖေဖဝ်ဝါရဳ ၁
သ္ကိုပ်ဝန်ဇၞော်အေဿရေ နေတာန်ယျာဟုဂှ် နကဵုဇကုတံ ဟွံဂွံပေါဲအံၚ်ဇၞး ပ္ဍဲဂါဇြာမွဲသာ် ကောန်ဒပ်ဂမၠိုၚ် ဆုတ်ကလေၚ်အာကဵုဟွံသေၚ်ပုဟ်ဂှ် ဟီုရ။
မၞိဟ်ပ္ညဳပ္ညပ်အကြာတံဂှ် ပ္တိုန်ထ္ၜးလဝ် ဇရေၚ်ဂကောံဟာမာသ် ဂလာန်သ္ဂောံဗလးကဵု မၞိဟ်ဒးဒုၚ်သ္ပဒၞန် ဂကောံဟာမာသ်တံ မရပ်ဒက်လဝ်ဂှ်ကဵု သွက်ဂွံဒေါအ်ပန်ပှော် ပ္ဍဲဂါဇြာရ။
ဣဏံဝွံ ကြဴနူတၚ်တုပ်စိုတ်ဒေါအ်ပန်ပှော် အလန်ပထမ လီုအာတုဲဂှ် ဒှ်အစဳဇန်ပရေၚ်ၜိုဟ်လလမ် ဇြိုဟ်နက်အိုတ်ဂှ် သ္ဂးဒၟံၚ်အိုတ်ရ။
ဟိုတ်နူပၞာန်ထ္ပက် သီုဗလးတိ သီုမှဲအကး အေဿရေတံဂှ်တုဲ ပ္ဍဲဂါဇြာ စမြိုၚ် ၇၀ တၟံကၠံပြၚ် လီုလာ်အာတုဲ ကောန်ဍုၚ်ပါလက်သတိုၚ် ၂၆၀၀၀ ပြၚ် ချိုတ်အာလဝ်ဂှ် ဂွံတီကေတ်ရ။
သွက်ဂွံပလံၚ်ဗစိုပ်ကဵု အရီုဗၚ်ပရေၚ်ဗ္စာရဏာမၞိဟ်တံမာန် ကုလသမဂ္ဂ ကေုာံ အမေရိကာန်တံပါလုပ်ဂှ် မဟာမိတ်အေဿရေတံ ကဵုဒၟံၚ်ဇြဟတ်ဂရိုဟ်ကီုလေဝ် နေတာန်ယျာဟုဂှ် ဟွံဂွံပေါဲအံၚ်ဇၞးမ္ဂး ဒပ်အေဿရေ မၞုံပ္ဍဲဂါဇြာတံ ဆုတ်ကလေၚ်ကဵုအာဟွံသေၚ်ပုဟ်ဂှ် ထပ်ဟီုဂးလဝ်ရ။
ကောန်ပၞာန်အေဿရေတံဝွံ ပလီုရုပ် နဒဒှ်အ္စာဂဥုဲ၊ ညးဒုၚ်ကာဂဥုဲ၊ မၞိဟ်ဗြဴတံတုဲ ဗဳဒဳယောသ္ကုတ် လုပ်စိုပ်ဍိုက်ဗ္တိုက် ရုၚ်ဂဥုဲ မၞုံဒေသပြၚ်ၜဳသ္ကုတ်ပလိုတ် မံက်တိတ်ကၠုၚ်တုဲဂှ် ဇြဟတ်ဂရိုဟ် လ္တူအေဿရေတံ ဂၠိုၚ်ကၠုၚ်ဂှ် ဂွံတီကေတ်ရ။
ဟာနဳယျာ က္ဍိုပ်သ္ကိုပ်ဂကောံဟာမာသ် မလ္ၚတ်ဒၟံၚ်ဂလာန်ပ္တိုန်ထ္ၜး ပရေၚ်ဒေါအ်ပန်ပှော်ဂှ် ပရေၚ်ကဵုက္ဍိုပ်ပိုယ်တံဂှ်ဝွံ ညံၚ်ပၞာန်ထ္ပက် အေဿရေတံ ဂွံဒေါအ်ဒေၚ်အာဂှ်ကဵု ညံၚ်ဂွံဆုတ်တိတ်ဒတုဲရောၚ်ဂှ် ဂးတဴရ။
ဂလာန်ပ္တိုန်ထ္ၜးလဝ် စပ်ကဵုပရေၚ်ဒေါအ်ပန်ပှော်ဂှ်ဝွံ ကြဴနူဇၞော်သ္ကိုပ်ထံၚ်ပရိုၚ် အေဿရေ၊ အမေရိကာန်၊ အဳဂျေတ် ကေုာံ သ္ကိုပ်ဝန်ဇၞော်ကာတာတံ ဆဵုဂဗသဳကၠဳညးသ္ကအ် ပ္ဍဲဍုၚ်ပါရဳ ဍုၚ်ပြၚ်သေတ်တုဲဂှ် မံက်တိတ်ကၠုၚ်ရ။
အပ္ဍဲလၟေၚ်ဒဒှ် အာစိုပ်လဝ် ဒေသပြၚ်ၜဳသ္ကုတ်သၟဝ်ကျာဂှ် နေတာန်ယျာဟုဂှ် ပေါဲအံၚ်ဇၞးပေၚ်ၚ်ဟွံသေၚ်တှ်ေ မုမွဲမှ ပ္ညဳပ္ညပ်အာဟွံသေၚ်ပုဟ်ဂှ် ဟီုဂးလဝ်ရ။
ဂလာန်နေတာန်ယျာဟုဂှ်ဝွံ ဟွံရှ်ေသှ်ေ သွဟ်ပေါဲသဳကၠဳဍုၚ်ပါရဳတုဲ လမျီုကောန်ထံၚ်အေဿရေတံဂှ်လေဝ် ဟွံသ္ပဂရုပုဟ်ဂှ် သၞာဲဒဴဟာမာသ်မွဲတၠ ဟီုရ။
Ref: Reuters