ထဝါဲ၊ ဖေဖဝ်ဝါရဳ ၂၄
မ္ၚးနူကဵုပေါဲဗ္တိုက်ၜါလ္ပာ် မက္တဵုဒှ်ဒၟံၚ် ပ္ဍဲဒေသ(အရှေ့တော) ထဝါဲ ပွိုၚ်ဍုၚ်ထဝါဲ ရးတၞၚ်သဳဂှ် ဟိုတ်နူပၞာန်ကျာ ကံၚ်ဇြဳပၞာန်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်ရောၚ် ညးပါဲဒလေတ်ဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုဖေဖဝ်ဝါရဳ ၁၆ တုဲကၠုၚ်တေံတုဲ ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲဒေသ အရှေ့တောထဝါဲ နကဵုဇြဟတ်ဒပ် ၃၀၀ ပြၚ်ဂှ်ကဵု ဒပ်ပံၚ်ကောံ PDF ပါလုပ်သီုကဵုဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်ဒၟံၚ်ပေါဲဗ္တိုက် အရိုဟ်ဒဒှ်တ္ၚဲရ။
ဟိုတ်နူပေါဲဗ္တိုက်ဂှ်တုဲ ကွာန်ဝကုန်း၊ သၚ်္ကန်းတုန်း၊ ကျောက်မဲတောၚ်၊ ဘဝပၚ်၊ လိပ်ကြယ်ပြောၚ်၊ သရက်ငုတ်၊ ပခပ်တံ မပါလုပ် ကွာန် ၁၀ ကွာန် ညးဒေသ ၃၀၀၀ ပြၚ် ဒးပါဲဒၟံၚ်ဘဲပၞာန်ရ။
ညးဒေသပါဲဒလေတ်ဘဲပၞာန်တံဝွံ ဟိုတ်နူဒးပါဲဒလေတ်ဒၟံၚ် ပ္ဍဲကဵုဒၞါဲကၠအ်ဂူ ဗၠးဘဲတံကဵု ပ္ဍဲဒဵုဂြိုပ်တံဂှ်တုဲ စနူကဵုဒၞါဲမံၚ် ပါလုပ်သီုကဵုစၞစသုၚ်တံဂှ် နွံပၟိက်ဒၟံၚ်အရီုဗၚ်ရောၚ် ညးဒေသပါဲဒဴဘဲပၞာန်တံ သ္ဂးရ။
အပ္ဍဲပေါဲဗ္တိုက် အရှေ့တောထဝါဲ မက္တဵုဒှ်ဒၟံၚ် လလအ်ပွိုၚ်မွဲသတ္တာဟပြၚ်ဂှ် လ္ပာ်ကံၚ်ဇြဳပၞာန် ချိုတ်အာလဝ် ဗ္ဒါဲ ၃၀ တုဲ လ္ပာ်ဂကောံဇြဟတ်ပၠန်ဂတးတံ ၇ တၠ ချိုတ်အာလဝ်ဂှ် ဂွံတီကေတ် ဇရေၚ်ဒပ်ပံၚ်ကောံတံရ။
အပ္ဍဲပေါဲဗ္တိုက်ဂှ် လ္ပာ်ဒပ်ပံၚ်ကောံပၠန်ဂတးတံ ဗ္တိုက်ဖလှေက်လဝ် ကွဳစက်ပၞာန် ၇ ဖ္ဍိုက်တုဲ လွဟ်လက်နက်မကမ်တံဂှ်လေဝ် သီဂွံလဝ်ကီုရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Tanintharyi ဂှ်မ္ဂး အပ္ဍဲကာလသီအဝဵုဏံ ပ္ဍဲရးတၞၚ်သဳ ညးဍုၚ်ကွာန်ဒေသ ဒးထောံလသာသ္ၚိဌာန် ဒးဂြိပ်ဒဴဒၟံၚ်တံ ၄၄၀၀၀ ပြၚ် နွံဒၟံၚ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media