ဘာအၚ်၊ ဖေဖဝ်ဝါရဳ ၂၅
ဒပ်ကံၚ်ဇြဳပၞာန် မၞုံအပ္ဍဲတိဍာ်အုပ်ဓုပ်ကဝ်တူလေဝ်ဂမၠိုၚ်ဝွံ နူကဵုဗ္ဒိုပ် စဵုကဵုဟွံဂံၚ်တိတ်မ္ၚး အကာဲအရာပရေံဒၟံၚ်တုဲ ထိၚ်ဒက်ဂွံတိဍာ် KNU ဂှ်လေဝ် ဂၠိုၚ်နူကဵုကၠာတေံဂှ် ပဒိုဝ်သဝ်တဝ်နဳ ဟီုလဝ်ရ။
ပဒိုဝ်သဝ်တဝ်နဳ ညးမၞုံအခေါၚ်ဟီုဂး ကေုာံ ကောန်ဂကောံကေၚ်ကာဗဟဵု KNU ဂှ် စပ်ကဵုလၟေၚ်တရဴ အာစိုပ်လဝ်တိဍာ်မုက်ပၞာန် ဒပ်မဟာ ၆ ခရိုၚ်ဒူပလာယာ၊ ဒပ်မဟာ ၃ ခရိုၚ်ညံၚ်လေဝ်ပေန်၊ ဒပ်မဟာ ၁ ခရိုၚ်သဓီု တိဍာ်ကဝ်တူလေဝ် သၞာံ ၂၀၂၄ မံက်တေံဂှ်တုဲ အကာဲအရာ ဒးဂဗဒၟံၚ်တံဂှ် ကလေၚ်လဴထ္ၜးလဝ်ရ။
ပဒိုဝ်သဝ်တဝ်နဳ အာစိုပ်လဝ် ကုန်ဗ္ဒိုပ်ဒဵုလက်ခတ် KNU သီဂွံလဝ် ဇရေၚ်ကံၚ်ဇြဳပၞာန်ဂှ်ကဵု ဂၠံၚ်ဇၞော်အာယှ မၞုံအပ္ဍဲတိဍာ် ဒပ်မဟာ ၆ ခရိုၚ်ဒူပလာယာ KNU ဂှ် မွဲဒမြိပ်ဂၠံၚ်ဇၞော်အာယှဂှ် ဒပ်ပံၚ်ကောံပၠန်ဂတးတံ ကေတ်ဒၞါဲထိၚ်ဒက်လဝ်တုဲ စဵုကဵုသ္ကုတ်သၟဝ် ဂၠံၚ်ဇၞော်အာယှ မပ္တံကဵုလှာၚ်ဝ၊ ကိုဝ်တိုၚ်၊ ခုနှစ်တိုၚ်၊ ကြုၚ်ဒဵုတံဂှ် ဂကောံဒပ်ပံၚ်ကောံပၠန်ဂတးတံ ထိၚ်ဒက်လဝ်ရောၚ် သ္ဂးရ။
အပ္ဍဲလၟေၚ်တရဴ တိဍာ်ဒပ်မဟာ ၃ ခရိုၚ်ညံၚ်လေဝ်ပေန်ဂှ်လေဝ် တတ်ကၠောံကၠုၚ် သြၚ်ပလိုတ်ၜဳသက်တိုၚ်တုဲ စဵုကဵုမွဲဒမြိပ် (မဒေါက်) ၊ ညံၚ်လေဝ်ပေန်၊ ပေဝ်နဲကုန်၊ ကျံက်တခါ၊ နာတ်တာန်ကွေန်၊ ဖျူတံဒှ်တမ် ကေုာံ စဵုကဵုဂၠံၚ်ကွဳပၟတ် လ္ဂုၚ်−မာန္တလေဝ် ကေုာံ ဂၠံၚ်ကွဳစက်ဂှ် ဒပ်ပၠန်ဂတး KNU တံ ကေတ်လဝ်ဒၞါဲတုဲ ထိၚ်ဒက်လဝ်ဂှ် ပဒိုဝ်သဝ်တဝ်နဳ ဟီုရ။
သ္အာၚ်နူဂှ်ပၠန် အပ္ဍဲလၟေၚ်တရဴ အာစိုပ်လဝ် လ္ပာ်ပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ဘာအၚ်၊ ပွိုၚ်ဍုၚ်သဓီု နူကဵုဒပ်မဟာ ၁ ခရိုၚ်သဓီု KNU ဂှ် ဒပ်ပံၚ်ကောံပၠန်ဂတး KNU တံ အုပ်ဓလီုလဝ်တိဍာ် စဵုကဵု ဝါးဘိုးတော၊ ရွှေရောင်ပြ၊ အလူးကြီး အလူးလေး၊ ပွဳပွူကျာ်ဣသိယဵု၊ သိမ်ဇရပ်၊ ဒၞါဲစဵုကဵုဇိုၚ်ၜဳသက်တိုၚ်တံရောၚ်ဂှ် ပဒိုဝ်သဝ်တဝ်နဳ လဴထ္ၜးလဝ်ရ။
ဗ္ဒိုပ်ဒပ်ကံၚ်ဇြဳပၞာန် ပ္ဍဲတိဍာ်မုက်ပၞာန်တံဂှ်ဝွံ အပ္ဍဲဗ္ဒိုပ် နွံဒၟံၚ်ဗီုပြၚ်ပၞာန်ဒုၚ်သၟးဟွံက ပွမဆုတ်ကလေၚ် နူကဵုကုန်ဗ္ဒိုပ်ဒပ် ပါလုပ်သီုကဵုကုန်ဗ္ဒိုပ် မၞုံကဵုကဆံၚ်ဗျူဟာတံ နွံဒၟံၚ်ဂှ်ရ ဒပ်ကံၚ်ဇြဳပၞာန်ဝွံ ဒးကၠောန်ၜိုတ်ဒၟံၚ် ပၞာန်ဒုၚ်ကဵု ပၞာန်ဆုတ် မွဲအခိၚ်ဓဝ်ရောၚ်ဂှ် ပဒိုဝ်သဝ်တဝ်နဳ ဟီုဂးလဝ်ရ။
ပ္ဍဲသၞာံ ၂၀၂၄ မံက်တေံ ပါလုပ်သီုကဵု ဗ္ဒိုပ်ဗျူဟာကံၚ်ဇြဳပၞာန် မၞုံအပ္ဍဲခရိုၚ်ဘာပန် ဒပ်မဟာ ၅ ၊ ခရိုၚ်တံၚ်ဥူ ဒပ်မဟာ ၂ တံဂှ် ဗ္ဒိုပ် ၁၀ ပြၚ်ဝွံ ဟိုတ်နူပရေၚ်ဗ္တိုက်ကၟာတ်လဒဵု နူဇြဟတ်ပၠန်ဂတးတံတုဲ ထောံလသာဗ္ဒိုပ် ဒးဂြိပ်ဒဴဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU