မတ်မလီု၊ ဖေဖဝ်ဝါရဳ ၂၄
ပ္ဍဲကဵုပွိုၚ်ဍုၚ်ဗွဲမဂၠိုၚ် မၞုံတွဵုရးဍုၚ်မန်တံဂှ် သၞာဲဒဴ Non CDM သၟဝ်တဲကံၚ်ဇြဳပၞာန်တံ ညံၚ်ညးဍုၚ်ကွာန်ဂမၠိုၚ် ဂွံလုပ်ယိုက်ဂၠေၚ်လျိုၚ်ပၞာန် ဗက်ဆဝ်မ္ၚုဟ်ဒၟံၚ်အိုတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးယိုက်ဝန် နူကဵုဌာနအုပ်ဓုပ်ကာနာန၊ ဗၠာဲသၟိၚ်၊ ဌာနသိုဟ်ပၠိုတ်ပၟတ်၊ ဌာနဗဂဵုလဟဵုတံပါလုပ် သၞာဲဒဴနူကဵုဌာနမဆေၚ်စပ်ဗွဲမဂၠိုၚ်တံဝွံ သွက်ညးဍုၚ်ကွာန်တံ ဂွံယိုက်ဂၠေၚ်လျိုၚ်ပၞာန်ဂးတုဲ ပ္ဍဲဂိတုဖေဖဝ်ဝါရဳ ၂၂ တုဲကၠုၚ်တေံ ဗက်တြးလဝ် လိက်အုပ်သၟတ်တြးဝါဒ ဒၞါဲမၞိဟ်ဂၠိုၚ်တံဂှ်ရ။
ပ္ဍဲကဵုလိက်အုပ်သၟတ်တံဏံဂှ် စပ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ ညးဍုၚ်ကွာန်တံ လ္ပဂွိၚ်ဂှ်ကီု၊ တိုန်ဘာပၞာန်တုဲမ္ဂးလေဝ် ပ္ဍဲကဵုဒေသ ဆန္ဒမၞုံဂှ်ဟေၚ် ကေတ်တာလျိုၚ်မာန်တုဲ ဒဒှ်ရကလိဂွံသြန်ဂိတု ကေုာံ ကလိဂွံအခေါၚ်ဂွံဒုၚ်စသိုၚ်တံဂှ်ဏောၚ်ဂှ် ထ္မံက်ထ္ၜးလဝ်ရ။
ညးဍုၚ်ကွာန်ဒေသမွဲတၠဂှ် ပ္ဍဲအရာဗက်တြး လိက်အုပ်သၟတ် သွက်ဂွံယိုက်ဂၠေၚ်လျိုၚ်ပၞာန်တံဂှ် ပါဲနူကဵုဒၞါဲမၞိဟ်ဂၠိုၚ်တံဂှ် ဗက်တြးကဵုဒၟံၚ် စဵုကဵုအပ္ဍဲသ္ၚိဒၟံၚ်တံဂှ်တုဲ သၟာန်သၟုက်ဒၟံၚ် သီုကဵုစရၚ်လၟိဟ်မၞိဟ်တံ နွံဒၟံၚ်ရောၚ် ဟီုရ။
“နူဂယးဏံ နူကဵုဌာနအုပ်ဓုပ်ကာနာနကီု၊ ဌာနသိုဟ်ပၠိုတ်ပၟတ်ကီု၊ ဗၠာဲသၟိၚ်ကီု၊ ဒးဟီုသောၚ်ၚ်မ္ဂး ပါသီုကဵုဂကောံဇိုၚ်ခ္ဍာ်တံလေဝ် ပါရ။ က္ဍိုပ်လိက်ဂှ် မုဟီုလဝ်ရောဟီုတှ်ေ ဗက်ကံက်စရၚ်စမြိုၚ်ဂးရ။ ဗက်ကံက်စရၚ်စမြိုၚ်ဂးတုဲ ပရအ်ဒၟံၚ်လိက်အုပ်သၟတ်တံဏံ။ တုဲပၠန် ပ္ဍဲသ္ၚိမွဲမွဲ မၞိဟ်တြုံမူစိတၠ၊ မၞိဟ်ဗြဴမူစိတၠ နွံဂှ်လေဝ် သၟာန်ကၠုၚ်ကီုရ” သာ်ဝွံ သ္ဂးရ။
သၞာဲဒဴ Non CDM သၟဝ်တဲကံၚ်ဇြဳပၞာန်တံဂှ် ဟိုတ်နူဗက်တြးဒၟံၚ် လိက်အုပ်သၟတ်တြးဝါဒ ဂွံလုပ်ပၞာန်တံ နကဵုဗီုပြၚ်နာနာဂှ်တုဲ အကြာညးဍုၚ်ကွာန်တံ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး ဇၟာပ်ကောန်ဍုၚ်အဝဲစိုပ်တုဲတံ အောန်အိုတ် နူ ၂ သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ်တုဲ ညးဟွံယိုက်ဂၠေၚ်လျိုၚ်ပၞာန်တံဂှ် ဖျေံစၟတ်အာဒုဟ်ဒဏ် သၠုၚ်အိုတ် စဵုကဵုဒဏ်ထံၚ် ၅ သၞာံမာန်ရ။
ညးသၟတ်ဒေသမွဲတၠဂှ် တြးလဝ်လိက်အုပ်သၟတ်ယိုက်ဂၠေၚ်လျိုၚ်ပၞာန်ဂှ်ဝွံ ဒှ်ဒၟံၚ်ဗီုပြၚ် လိက်ဘပဠရတုဲ လုပ်အာပၞာန် ပ္ဍဲကံၚ်ဇြဳပၞာန်ဟွံသေၚ်တုဲ လ္ပာ်ဓဝ်ဍာံဂှ်ဟေၚ် လုပ်ယိုက်ဂၠေၚ်အာလျိုၚ်ပၞာန်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ရဲနူကဵုအုပ်ဓုပ်ကာနာနာတံဂှ် နူဏေံတေံ ဒက်က္ဍိုပ်တုဲ တၟာဂလိုၚ်ဂှ် ဗက်ပါ်ပရအ်ဒၟံၚ် လိက်အုပ်သၟတ် ဂွံလုပ်ပၞာန်ဂှ်ရ။ ဍေံတံပရအ်လေဝ် ဂွံဟီုသာ်လဵုရောဟီုတှ်ေ ဒှ်ဒၟံၚ်လိက်ဘပဠရဏောၚ်။ ဗီုလဵုဍေံတံပရအ်ပရအ် ဟွံအံၚ်ဇၞးပုဟ်။ ဂွံလုပ်ပၞာန်ဂှ် ဍုၚ်ဇကု ဒှ်ဒၟံၚ်ပၞာန်ကဵု ဍုၚ်ညးတၞဟ်ဟွံသေၚ်ပုဟ်။ မၞိဟ်ဇကုကဵုဇကု ဍေံတံဖေက်ဒၞါဲဍေံတံကၠေံတုဲ ရပ်စပ်ဒၟံၚ် ညးဍုၚ်ကွာန်တံ နဒဒှ်ဒၞန်ဟီုတှ်ေ ညးလဵုမွဲမှ ဂွံလုပ်ယိုက်ဂၠေၚ်လျိုၚ်ပၞာန်ဂှ် ဟွံမွဲပုဟ်။ တာလျိုၚ်ဂွံလုပ်ယိုက်ဂၠေၚ် လ္ပာ်ဓဝ်ဍာံဂှ်တှ်ေ နွံဒၟံၚ်ဖအိုတ်ရ” သာ်ဝွံ သ္ဂးရ။
အလဵုအသဳညဳသၟဟ်ဂကူ NUG ဂှ် ပူဂဵု သ္ပအထံက်အရီု ကုသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် မဂယိုၚ်ပ္တိုန်လဝ်ဂှ်ကဵု ဂကောံမဆေၚ်စပ် အဆံၚ်ၚ်တံဂှ် စၟတ်ကေတ် နဒဒှ်သၞညးဍုၚ်ကွာန် ကလိလောန်အမှုရာဇဝတ်တုဲ ကေတ်အာအရေဝ် သ္ကာတ်တ်မြဟ်ဟ်ဏောၚ်ဂှ် ကဵုလဝ်သတိရ။
ဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံဂှ်လေဝ် သၞောဝ်ယိုက်ဂၠေၚ်လျိုၚ်ပၞာန်ဏံဂှ် ညံၚ်အလုံညးဍုၚ်ကွာန်မွဲ ဂွံဒစဵုဒစးဗ္တိုက်သရိုဟ်ဂှ်ကီု၊ သွက်ဂွံကၠုၚ်စိုပ်ယိုၚ်ဂၠေၚ်လျိုၚ်ပၞာန် ပ္ဍဲဒပ်ပၠန်ဂတးတံအိုတ်ဂှ် ကော်ဘိက်လဝ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ညးသၟတ်တံဝွံ ပါလုပ်သီုကဵုဍုၚ်သေံဂှ် တိတ်စ္ဍးအာ ဍုၚ်သ္အာၚ် နကဵုဂအုံဗွဝ်တံ နွံဒၟံၚ်တုဲ လုပ်စိုပ်အာ ပ္ဍဲဂကောံဒပ်ပၠန်ဂတးတံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု− ထလဳဂရာမ် တြးဝါဒကံၚ်ဇြဳပၞာန်