ကျာ်ထဝ်၊ ဖေဖဝ်ဝါရဳ ၂၅
သၞေဟ်ကၚ်စၟဳတ်မုခ်ပြေၚ် ပ္ဍဲကွာန်မုခ်ပြေၚ် ပွိုၚ်ဍုၚ်ကျာ်ထဝ် တွဵုရးဍုၚ်မန် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ၆ တၠ ချိုတ်အာလဝ်ဂှ် ဂွံတီကေတ် အတိုၚ်တၚ်လလောၚ်တြး ဇြဟတ်ပၠန်ဂတးကျာ်ထဝ် KRF ရ။
သၞေဟ်ကၚ်စၟဳတ် ဇြဟတ်ဒပ်ဗၠာဲသၟိၚ် ကေုာံ ဒပ်ကံၚ်ဇြဳပၞာန် ၃၀ ပြၚ် ဖျေံဒၟံၚ်ဒပ်ဂှ် ပ္ဍဲဂိတုဖေဖဝ်ဝါရဳ ၂၃ အခိၚ်လဒေါဝ်တ္ၚဲ ၜိုတ် ၁ နာဍဳ နူဒပ်ပံၚ်ကောံဇြဟတ်ပၠန်ဂတးတံ လုပ်စိုပ်ဗ္တိုက်လဝ်ရ။
ဟိုတ်နူပရေၚ်ဗ္တိုက်ဂှ်တုဲ ပရေၚ်ပန်ပှော်ၜါလ္ပာ် က္တဵုဒှ်လဝ် လလအ်ပွိုၚ် ၂၀ မိနေတ်တုဲ လ္ပာ်ကံၚ်ဇြဳပၞာန် ဒးဂိလဝ်ရ။
အပ္ဍဲပရေၚ်ဗ္တိုက်ဂှ် လ္ပာ်ဒပ်ကံၚ်ဇြဳပၞာန် ၃ တၠ ချိုတ်အာလဝ် ပ္ဍဲဒၞါဲဒှ်ပရူဂှ်တုဲ ကောန်ဒပ်ကံၚ်ဇြဳပၞာန် ကလိဂွံဝပ် ပၞောဝ်ကဵု ၆ တၠဂှ် ၃ တၠဂှ်ဝွံ အဃောပလံၚ်ပ္တိုန်ရုၚ်ဂဥုဲဂှ် ဒးချိုတ်အာလဝ်ရောၚ် ညးတာလျိုၚ် ဇြဟတ်ပၠန်ဂတးကျာ်ထဝ် KRF မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ပန်ပှော်ၜါလ္ပာ်ဂှ် တၠဖျာမွဲတၠ ဇီုကပိုက်ကလိဂွံလဝ်ဝပ်တုဲ နကဵုဇြဟတ်ပၠန်ဂတးကျာ်ထဝ် KRF ဒဒှ်ရစိုတ်ဟွံခိုဟ်ဂှ်ကီု နကဵုညးဍုၚ်ကွာန်တံ လ္ပမံၚ်ကြပ် ကောန်ဒပ်ကံၚ်ဇြဳပၞာန်တံအိုတ်ဂှ် ဖ္တိုက်ဖ္အောဝ်လဝ်ရ။
အတိုၚ်ဂလာန် ညးဒေသတံဂှ်မ္ဂး ပ္ဍဲပရေၚ်ဗ္တိုက်သၞေဟ်ကၚ်မုခ်ပြေၚ်ဂှ် ကောန်ဒပ်ကံၚ်ဇြဳပၞာန်တံ ဒဒှ်ရဇီုကပိုက်ချိုတ်အာလဝ်ဂှ် ဂွံမိၚ်ကေတ်ကီုလေဝ် လၟိဟ်ချိုတ်တ်ပၠိုတ်တ်ဂှ် ဟွံဂွံတီကေတ်ပုဟ်ဂှ် ဟီုရ။
သၞေဟ်ကၚ်စၟဳတ်မုခ်ပြေၚ်ဂှ်ဝွံ အပ္ဍဲကာလသီအဝဵုဏံ ဒးဒုၚ်ဗ္တိုက်လဝ် ဟွံအောန်နူကဵု ၁၀ ဝါတုဲ ကောန်ဒပ်သီုၜါလ္ပာ် ဇီုကပိုက်ချိုတ်အာတံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ