မတ်မလီု၊ ဖေဖဝ်ဝါရဳ ၂၅
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ကျဒၟံၚ်ပၞာန် မဂယိုၚ်ပ္တိုန်လဝ်ဂှ်မ္ဂး ပ္ဍဲတွဵုရးဍုၚ်မန် မွဲဂိတု သွက်ဂွံကော်သၟတ်တံ ပကောန်ပၞာန် ဗၞတ် ၅၀၀ ဒှ်မာန်ဂှ် ဂွံတီကေတ်ရ။
ပ္ဍဲကဵုတွဵုရးဍုၚ်မန် ၁၀ ပွိုၚ်ဍုၚ်နွံဂှ် အရာပ် ၁၀၀ ၊ ဂကောံကွာန် ၃၆၈ နွံဒၟံၚ်တုဲ အတိုၚ်ဂလာန် သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်လဝ်ဂှ်မ္ဂး မွဲဂိတုမ္ဂး ဂွံကော်အာသၟတ်ပကောန်ပၞာန် စဵုကဵု ၄၆၈ တၠ နွံဒၟံၚ်ရ။
ဥူအံၚ်ကျဳတုၚ် သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်ဂှ်ဝွံ တုဲကၠုၚ် ပ္ဍဲဂိတုဖေဖဝ်ဝါရဳ ၁၇ တေံ အခိၚ်ဆဵုဂဗကဵု သၟာဗ္ၚကွာန် (ကုလားဘီ) ပွိုၚ်ဍုၚ်ၜါသွာၚ်ဂှ် ပ္ဍဲကဵုလၟေၚ် (၁) ယိုက်ဂၠေၚ်လျိုၚ်ပၞာန်ဏံ နူပွိုၚ်ဍုၚ်ၜါသွာၚ် ဂကောံကွာန် ၄၇ ဂှ် သၟတ် ၄၇ တၠ ဒးလုပ်ယိုက်ဂၠေၚ်လျိုၚ်ပၞာန်ဏောၚ်ဂှ် ဟီုဂးဏာလဝ်ရ။
အခိၚ်လၟုဟ်ဂှ်လေဝ် ကံၚ်ဇြဳပၞာန် တွဵုရးဍုၚ်မန်ဝွံ ညးသၟတ်အဝဲစိုပ်တုဲတံ ဂွံယိုက်ဂၠေၚ်လျိုၚ်ပၞာန်ဂှ် ဗက်တြးဒၟံၚ်လိက်အုပ်သၟတ်တံတုဲ ယဝ်ရလုပ်ပၞာန်မ္ဂး ဒဒှ်ရကလိဂွံသြန်ဂိတု ကေုာံ အခေါၚ်ဂွံဒုၚ်စသိုၚ်တံဏောၚ်ဂှ် ဗက်စန်ဒက်ဒၟံၚ်တံ နွံဒၟံၚ်ရ။
ညးသၟတ်ဒေသမွဲတၠဂှ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဏံဂှ်ဝွံ ကဵုညးဍုၚ်ကွာန်ရေၚ်သ္ကအ် ကလေၚ်ဂစိုတ်ညးသ္ကအ်ဂှ်ရ ဒုၚ်တဲဟွံမာန်သက်က်တုဲ နကဵုသၟတ်တံ နွံပၟိက်ဒးကၠောန်သ္ပလဝ် ပရေၚ်ဒစးဒုၚ်ပလေဝ်ပလေတ်တံဏောၚ်ဂှ် ဟီုရ။
“အခိၚ်ဍုၚ်ဏံ ခိုဟ်စဒၟံၚ်ဂှ် သၞောဝ်ဗီုဏံ ကၠောန်ပြဝဗီုဏံတံတှ်ေ မွဲဗီု။ အကာဲအရာလၟုဟ်ဂှ်တှ်ေ စုတ်ထောံသၟတ်တံ ပ္ဍဲဒပ်ပၞာန်ဏောၚ်။ စုတ်တုဲ ဒှ်ဒၟံၚ်အကာဲအရာ ကဵုကလေၚ်ဂစိုတ်ဒၟံၚ်ညးဍုၚ်ကွာန်တံဂှ် သၟတ်လဵုမွဲမှ စိုတ်လုပ်စဟွံသေၚ်ပုဟ်။ ဍေံတံလေဝ် မိက်ဂွံကၠောန်ဟွံသေၚ်ပုဟ်။ သၟတ်စိုတ်ဟွံလုပ်စကဵုဒှ် သၟတ်စိုတ်လုပ်စကဵုပၠန်ဂတးဏံကဵုဒှ် ဒၟါနူဟိုတ်မွဲမွဲသာ်တုဲ ဆောဝ်လအ်မှ ပြေပြံၚ်အာဟွံသေၚ်ပုဟ်။ ပြဝဏံဂှ် ပိုယ်တံ ဒစဵုဒစး သ္ကာတ်တ်မြဟ်ဟ်ရဏောၚ်။ ညအ်ဂှ် ဒှ်ဟွံထေက်ပုဟ်။ ကၠောန်လေဝ် ကၠောန်ဟွံထေက်ပုဟ်” သာ်ဝွံ သ္ဂးရ။
ကံၚ်ဇြဳပၞာန်ဂှ် လၟေၚ် (၁) ယိုက်ဂၠေၚ်လျိုၚ်ပၞာန်ဂှ် အတးလောန်တှ်ေ စအာဏောၚ်တုဲ လၟေၚ်မွဲမွဲမ္ဂး မၞိဟ် ၅၀၀၀ ၊ မွဲသၞာံမ္ဂး မၞိဟ် ၆၀၀၀၀ ဂွံလုပ်ယိုက်ဂၠေၚ်လျိုၚ်ပၞာန်ဂှ် ကော်အာဏောၚ် ထ္မံက်ပ္တိတ်ဟီုဂးလဝ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် ပ္ဍဲသၞာံ ၂၀၁၀ လက်ထက်ဥူတာန်ယှိုဲ တၠအဝဵုပၞာန်တြေံဂှ်မ္ဂး မၞိဟ်တြုံ နူအာယုက် ၁၈ စဵုကဵု ၄၅ သၞာံ၊ မၞိဟ်ဗြဴ နူအာယုက် ၁၈ စဵုကဵု ၃၅ သၞာံ အောန်အိုတ် နူ ၂ သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ် မဒှ်ရ။
ညံၚ်ဂွိုအ်ဒးယိုက်ဂၠေၚ်လျိုၚ်ပၞာန် ထ္ၜးဟိုတ်နာနာတုဲ ပါဲဒလေတ်ဂှ်ကီု၊ ညံၚ်ဂွိုအ်ဒးလုပ်ပၞာန် မၞိဟ်ပ္တိတ်ဇြဟတ်တံဂှ် အောန်အိုတ် ဒဏ်ထံၚ် ၁ သၞာံ စဵုကဵု ၅ သၞာံ ဖျေံစၟတ်ဒုဟ်ဒဏ်မာန်ရောၚ် စၞောန်ပျးလဝ်ရ။
ညးဒုၚ်တာလျိုၚ်ပရေၚ်ပၞာန် ဒပ်ပၠန်ဂတးဍုၚ်မန် MSRF သ္ဂံၚ်တၠနာဲဂှ် လ္ပာ်ကံၚ်ဇြဳပၞာန် အခိၚ်ခြာဟွံလအ်ဏံ သွက်ဂွံလုပ်ပၞာန် ဟိုတ်နူကော်ကၠုၚ်မာန်ဂှ်ရ နကဵုသၟတ်တံ ဂွံပံၚ်ကောံ ဇြဟတ်ပၠန်ဂတးတံဂှ် ဒှ်အခိၚ်ခိုဟ်အခါပြဲရဂှ် ဟီုရ။
“သွက်ဂွံကလေၚ်ပၠောပ်လမျီု ပၠန်ဂတးမန်ပိုယ်တံဂှ် သၟတ်တံဂှ်တှ်ေ နလညာတ်သမ္တီဇကုဇကု ကၠုၚ်စိုပ်ပံၚ်တောဲတုဲ ဂွံပၠန်ဂတးဂှ် ဒှ်အခိၚ်ခိုဟ် အခါပြဲရဏောၚ်။ ပိုယ်တံဂှ်တှ်ေ ဟီုစကောန်ဍုၚ်အရၚ်ဘဝတုပ်တံရ။ ကောန်ဍုၚ်အရၚ်တၞဟ်ဟ်တံဂှ်တှ်ေ အခိၚ်ညးတံလုပ်ဒၟံၚ်ပေါဲဗ္တိုက် ဂွံထပိုတ်ရိုဟ်ကၞက်ကံၚ်ဇြဳပၞာန် နကဵုဇြဟတ်ဂှ် နကဵုသၟတ်မန်ပိုယ်တံ ညံၚ်ရဴကောန်ဍုၚ်အရၚ်တၞဟ်သ္အာၚ်တံကီု ပံၚ်တောဲပါလုပ်တုဲ ဒးပၠန်ဂတးကီုဏောၚ် မဒှ်ရ” သာ်ဝွံ သ္ဂးရ။
ဂကောံရပ်လွဟ်ကောန်ဍုၚ်အရၚ်တံကဵု ဂကောံဇြဟတ်ပၠန်ဂတးတံဂှ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ် အလုံညးဍုၚ်ကွာန်မွဲ သွက်ဂွံဒစဵုဒစး ဗ္တိုက်သရိုဟ်ဂှ်ကီု ကၠုၚ်စိုပ်ပံၚ်တောဲ ပ္ဍဲဂကောံဒပ်ပၠန်ဂတးတံတုဲ သွက်ဂွံယိုက်ဂၠေၚ်လျိုၚ်ပၞာန်ဂှ် ကော်ဘိက်ဒၟံၚ်တံ နွံဒၟံၚ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ညးသၟတ်ဒေသ နူအပ္ဍဲတွဵုရးဍုၚ်မန်တံဝွံ တိတ်စ္ဍးအာဍုၚ်သ္အာၚ်တံ ဍုၚ်သေံတံ လၟိဟ်ဗွဲမဂၠိုၚ်ဂၠေၚ်တုဲ ဒးဒုၚ်ရပ်ဒၟံၚ် လၟေၚ်ၚ်တ္ၚဲတံ နွံဒၟံၚ်ရ။
အတိုၚ်ဂလာန် ဂကောံသုတေသန ISP-Myanmar ဂှ်မ္ဂး ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ဂၠံၚ်တရဴဖောအ်ဗြေဝ်တောတက်ကၟိန်ဍုၚ် ဂၠိုၚ်ကဵုတၞောဝ်ဒတောဝ် ဒှ်အာလက္ချန်လဟုတ်မာန်ရောၚ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ