ကအ်ကြိက်၊ ဖေဖဝ်ဝါရဳ ၂၇
အပ္ဍဲပေါဲဗ္တိုက်ဍုၚ်ကအ်ကြိက် တွဵုရးကရေၚ်ဂှ် ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပၞာန် ကေုာံ သၞေဟ်ကၚ် ၉ တုဲ တိဍာ်လ္တူဍုၚ် ၆၀ တၟံကၠံ အုပ်ဓလီုထိၚ်ဒက်ဂွံလဝ်ယျဂှ် ဒေသပၞာန်သ္ကုတ်သၠုၚ်ကျာ ၊ ဒပ်ပၞာန်စဵုဒၞါညးဍုၚ်ကွာန် NUG လလောၚ်ပ္တိတ်လဝ်ပရိုၚ် ပ္ဍဲဂိတုဖေဖဝ်ဝါရဳ ၂၆ တေံရ။
ဗ္ဒိုပ်သၞေဟ်ကၚ်၊ ဗ္ဒိုပ်ဖျေံသ္ဇိုၚ် ဒပ်ကံၚ်ဇြဳပၞာန် မၞုံအပ္ဍဲဍုၚ်ကအ်ကြိက် ကေုာံ ဂၠံၚ်ဘာအၚ်−ဗြဝတဳ ( သ္ကုတ်ဂၠံၚ်အာယှ) တိဍာ်ဒပ်မဟာ ၆ KNU ဂှ် စနူသၞာံ ၂၀၂၃ ဂိတုဒဳဇြေမ်ဗာ ၁ တုဲကၠုၚ်တေံတုဲ ဒပ်ပံၚ်ကောံဒရုၚ် KNLA, PDF, SOF တံ စထ္ပက်ပၞာန်ဗ္တိုက်လဝ်တုဲ ရေၚ်တၠုၚ်လဝ် ပရေၚ်ပၞာန်ပံၚ်တောဲရောၚ်ဂှ် သ္ဂးရ။
စနူဂိတုဒဳဇြေမ်ဗာ ၁ စဵုကဵုဂိတုဖေဖဝ်ဝါရဳ ၂ အပ္ဍဲကာလပရေၚ်ပၞာန်ပံၚ်တောဲဂှ် သီဂွံလဝ် ဗ္ဒိုပ်ကအ်ဏိ ကံၚ်ဇြဳပၞာန် မၞုံသၠုၚ်ကျာကအ်ကြိက်ဂှ်ကဵု သၞေဟ်ကၚ်ဒဒန်လှိုၚ်ဝ၊ သၞေဟ်ကၚ် (ကြာပန်း) ၊ သၞေဟ်ကၚ်စၟတ် (၃) မၞုံသၟဝ်ကျာကအ်ကြိက်၊ ဗ္ဒိုပ်ဖျေံသ္ဇိုၚ် မဖျေံလဝ်ဒပ် ပ္ဍဲကဵုသုသာန် (ကမိုၚ်ကုန်း) လ္တူဂၠံၚ်ဇၞော်အာယှတံ မဒှ်ရ။
သ္အာၚ်နူဂှ်ပၠန် ဒၞါဲဖျေံလဝ်ဒပ် ပ္ဍဲဘာဗ္တောန်လိက် မၞုံအရာပ်ချံၚ်ဒံၚ်ကအ်ကြိက်ဂှ်ကီု၊ ဗ္ဒိုပ်ဗၠာဲသၟိၚ် (တောၚ်ကြာအၚ်း) ၊ ဗ္ဒိုပ် (ရေကူးကန်) လ္တူဂၠံၚ်အာယှ၊ ကေုာံ ဗ္ဒိုပ်သၞေဟ်ကၚ်ဆေၚ်ကၠေၚ်တံဂှ် ဒပ်ပံၚ်ကောံ KNLA တံ လုပ်စိုပ်ဗ္တိုက်သီဂွံလဝ်တုဲ ကၠောန်သ္ပရေၚ်တၠုၚ် ၚးတးဒၟံၚ်တိဍာ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် ဂၠံၚ်အာယှ ဘာအၚ်−ဗြဝတဳဂှ်ကဵု လ္တူဍုၚ်ကအ်ကြိက် ၆၀ တၟံကၠံဂှ် ထိၚ်ဒက်အုပ်ဓလီုဂွံလဝ်ရောၚ် ဌာနလလောၚ်ပရိုၚ် ဒေသပၞာန်သၠုၚ်ကျာ NUG လလောၚ်ပ္တိတ်ကဵုလဝ်သမ္တီရ။
အပ္ဍဲပေါဲဗ္တိုက်ဍုၚ်ကအ်ကြိက်ဂှ် လ္ပာ်ဒပ်ကံၚ်ဇြဳပၞာန် လၟိဟ်မၞိဟ်ဒုၚ်ကျဖျေံလွဟ် ၁၄ တၠ နွံတုဲ ၃၀ တၠ ချိုတ်အာလဝ်တုဲ မၞိဟ်ကလိဂွံဝပ်ဗွဲမဂၠိုၚ်ဂၠေၚ် ကေုာံ သီဂွံလဝ် လွဟ်လက်နက် ၄၆ ဇကိုအ်တုဲ ကောန်သ္ဂံၚ်လ္ပာ်ဒပ်ပၠန်ဂတးတံဂှ် ၇ တၠ ပြဟ်လလုဲအာလဝ်ရ။ ဟိုတ်နူပရေၚ်ဗ္တိုက်ထောံမခတိုဟ် ကံၚ်ဇြဳပၞာန်ဂှ်တုဲ ညးဍုၚ်ကွာန် ၃ တၠ ဒးဆောံလေၚ်အာလဝ်လမျီုဂှ် ဂွံတီကေတ် အတိုၚ်တၚ်လလောၚ်တြးဂှ်ရ။
အပ္ဍဲပေါဲဗ္တိုက်ကအ်ကြိက်ဂှ် လ္ပာ်ဒပ်ကံၚ်ဇြဳပၞာန် သုၚ်စောဲလွဟ်ဇၞော် ကေုာံ ဒရုၚ်တံတုဲ အရိုဟ်ဟ်တ္ၚဲ ပန်ပှော်ဒၟံၚ်တုဲ သ္ၚိမၞိဟ်ဒၟံၚ်တံဂှ်လေဝ် စံၚ်ပလီုပလာ်လဝ်တုဲ ကပေါတ်ကညောတ်ညးဍုၚ်ကွာန်ပိုၚ်တံဂှ်လေဝ် ကၠတ်ဂၠံက်ကေတ်ဒၟံၚ်တံ နွံဒၟံၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဟိုတ်နူပေါဲဗ္တိုက်ကအ်ကြိက်တုဲ ညးဍုၚ်ကွာန်ဒေသ ဂၠိုၚ်ကဵုလ္ၚီ ဒးပါဲဒလေတ်ဒၟံၚ်တုဲ ဂကောံအုပ်ဓုပ်ပွိုၚ်ဍုၚ် KNU ကဵု ဌာနဂီုကၠီုညးဍုၚ်ကွာန် MOD တံ ပံၚ်တောဲတုဲ ရီုဗၚ်ထိၚ်ဒဝ်ကဵုလဝ်တံ နွံဂှ် ကဵုလဝ်သမ္တီ ပ္ဍဲတၚ်လလောၚ်တြးဂှ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ကၠဗု