ဘာအၚ်၊ ဖေဖဝ်ဝါရဳ ၂၈
ဒပ်မၚ်ပယျဵုကရေၚ် BGF နုက်တိတ်လဝ် နူကဵုသၟဝ်တဲကံၚ်ဇြဳပၞာန်ဝွံ ပ္ဍဲကဵုကွာန် နူကဵုပွိုၚ်ဍုၚ်လိုၚ်ဗၠဲတံဂှ် ကော်ပ္ကောံပ္ကေဝ်ဒၟံၚ်ကောန်ဒပ်တၟိတၟိတံတုဲ ကဵုဒၟံၚ်သီုကဵုဘာပၞာန်တံဏောၚ်ဂှ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ညးဒေသတံရ။
စနူလဒေါဝ်ဂိတုဖေဖဝ်ဝါရဳတုဲ မၞိဟ်တြုံနူအာယုက် ၁၈ သၟဝ် ၄၅ သၞာံ မံၚ်ဒၟံၚ်ပ္ဍဲကွာန် အပ္ဍဲပွိုၚ်ဍုၚ်လိုၚ်ဗၠဲဂှ် ဒပ် BGF ကော်ပ္ကောံပ္ကေဝ်ဒၟံၚ် ကောန်ဒပ်တၟိတုဲ ကွာန်မွဲကွာန်မ္ဂး အောန်အိုတ် နူ ၁၀ တၠ ဂၠိုၚ်အိုတ် ၂၅ တၠ ဒးကဵုဒၟံၚ်ရ။
အတိုၚ်ဂလာန် တမ်ရိုဟ်ပရိုၚ်အပ္ဍဲဒေသဂှ်မ္ဂး သၟတ်ဟွံမိက်ယိုက်ဂၠေၚ်လျိုၚ်ပၞာန် ပ္ဍဲဇရေၚ်ဒပ် BGF တံဂှ်ဝွံ ပါဲဒလေတ်တိတ်အာ လ္ပာ်ဍုၚ်သေံတံ နွံဒၟံၚ်ဂှ် သ္ဂးရ။
ဒပ် BGF ပ္ဍဲအရာထိၚ်ဒက် မၞိဟ်တြုံသၟတ် မပ္ကောံပ္ကေဝ်လဝ်ကောန်ဒပ်တၟိတံဂှ် ဖျေံကဵုဒၟံၚ်ဘာ ပ္ဍဲကဵုကွာန်(ကြာအၚ်း) ၊ ပွိုၚ်ဍုၚ်လိုၚ်ဗၠဲ၊ တွဵုရးကရေၚ်ဂှ်တုဲ ပ္ဍဲကဵုတန်ဗ္တောန်ဂှ် မ္ၚးနူကဵုသ္ဇိုၚ်ကွတ်ပၞာန်ဂှ် တန်ဗ္တောန်ဂဥုဲ၊ တန်ဗ္တောန်လွဟ်ဇၞော်တံ ဒှ်တမ် ပါလုပ်ဂှ် ဂွံတီကေတ် နူကဵုဂလာန် ညးမစုက်လုက်ကဵု BGF တံရ။
မ္ၚးနူပွိုၚ်ဍုၚ်လိုၚ်ဗၠဲဂှ် လ္ပာ်ပွိုၚ်ဍုၚ်ဗြဝတဳ၊ ကမမံၚ်၊ ဘာအၚ်တံဂှ်လေဝ် ဒပ် BGF ဂွံကော်ကောန်ဒပ်တံဂှ် ကၠုၚ်စိုပ်စန်ဒက်ဒၟံၚ်တံ နွံဒၟံၚ်ရောၚ် ပရိုၚ်တမ်ရိုဟ်အပ္ဍဲဒေသတံ ဟီုရ။
ဒပ်မၚ်ပယျဵုကရေၚ် BGF ဝွံ ပ္ဍဲဂိတုဂျာန္နဝါရဳတုဲကၠုၚ်တေံ နုက်တိတ်ထောံ နူကဵုနဒဒှ်သၟဝ်တဲကံၚ်ဇြဳပၞာန်တုဲဂှ် ဂွံကလေၚ်ဗပေၚ်ဇြဟတ်ဒပ်တံဂှ် ပ္ကောံပ္ကေဝ်ကၠုၚ်ကောန်ဒပ်တၟိတံရ။
ကောန်ဒပ် ဒးဒုၚ်ပ္ကောံပ္ကေဝ်ကောန်ဒပ်တၟိတံဂှ်ဝွံ ယဝ်ရဘာပၞာန်တုဲမ္ဂး ဒးကေတ်တာလျိုၚ် ပ္ဍဲဒပ် BGF ဏောၚ်တုဲ ဂွံကလေၚ်စဵုဒၞါ ကွာန်တံလေဝ် ဒှ်မာန်ဂှ် ညးမစုက်လုက်ကဵု BGF တံ ဟီုရ။
လ္ပာ်ကံၚ်ဇြဳပၞာန် အခိၚ်သ္ပဒတန်လလောၚ်ပ္တိတ် သၞောဝ်ယိုက်ဂၠေၚ်လျိုၚ်ပၞာန်ဂှ် ဒပ်မၚ်ပယျဵုကရေၚ် BGF ဟိုတ်နူကော်ပ္ကောံပ္ကေဝ်ဒၟံၚ်ကောန်ဒပ်တၟိဂှ်ရ သၟတ်ဒေသ မၞုံအပ္ဍဲတွဵုရးကရေၚ်ဗွဲမဂၠိုၚ်ဝွံ ဒးတိတ်စ္ဍးပါဲဒလေတ်ဒၟံၚ် လ္ပာ်ဍုၚ်သေံ နကဵုလၟိဟ်ဗွဲမဂၠိုၚ်ဂၠေၚ်တံ နွံဒၟံၚ်ရ။
ဂကောံဒပ် BGF ကရေၚ် နုက်တိတ်အာ နူကဵုသၟဝ်တဲကံၚ်ဇြဳပၞာန်ဂှ်ဝွံ ကလေၚ်ဒက်ပ္တန်အာ နဒဒှ်ဒပ်ပၞာန်ကောန်ဂကူကရေၚ် KNA ဏောၚ် ပရိုၚ်ဂမၠိုၚ် မံက်တိတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media