လ္ဂုၚ်၊ ဖေဖဝ်ဝါရဳ ၂၈
အလဵုအသဳ သ္ကိုပ်သ္ကဒၟံၚ် ပၠန်ဂတးက္ညၚ် ဒဒှ်ရလဇုဲလဇ ဇြိုၚ်ဇြုဲဒၟံၚ် ဟွံဂွံဂှ် သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလ ကဵုလဝ်သတိ ပ္ဍဲကောံဓရီုအလဵုအသဳ မကၠောန်ဗဒှ်လဝ် ပ္ဍဲဂိတုဖေဖဝ်ဝါရဳ ၂၇ တေံရ။
သွဟ်ပၞာန်ပၠန်ဂတးတံဂှ် နတဲဏံ ထ္ၜးပျးကဵု ပြာပြာကတ်တ်မာန်မှဟေၚ် ဘဲဒဒိုက်ညးဍုၚ်ကွာန်တံ ဂွံဗၠးၜးဗွဲမပြဟ်မာန်ဏောၚ်တုဲ ဂွံပလှ်ဖျေံဂကောံပၞာန်တံ ဗွဲမပြဟ်မာန်ဂှ်ဝွံ ပၟိက်ဇၞော်ဒၟံၚ်ဗွဲမလောန်ရောၚ် သ္ဂးရ။
ဟိုတ်ဂှ်ရ သွဟ်ပၞာန်ပၠန်ဂတးတံ ဂွံအံၚ်ဇၞး လဇုဲလဇအာက္ဍၚ် ဒဒိုက်ဘဲညးဍုၚ်ကွာန်တံ ဂၠိၚ်သ္ၚောဲက္ဍၚ်ဟီုဂှ် ဒးပသတိဂှ်လေဝ် သမ္မတယာယဳ ထပ်ကဵုသတိ ဟီုဂးလဝ်ရ။
ညံၚ်ရဴပရေၚ်ပၞာန် ၁၀၂၇ ဂှ်ကီု သွဟ်ပေါဲအံၚ်ဇၞး ပရေၚ်ပၞာန်ပၠန်ဂတးတံဂှ် ပ္ဍဲကဵုဒေသတိဍာ်ဂမၠိုၚ် ဂွံသၠဲပ္တိုန်မာန် ကောန်ဂကောံအလဵုအသဳဂမၠိုၚ် သွက်ဂွံပ္တိတ်ဇဲလွဳ ဗွဲတၟေၚ် ဖ္တိုက်ဖ္အောဝ်လဝ်တုဲ အခိၚ်ကောပ်ကာဲ ကိစ္စပရေၚ်ဍုၚ်ကွာန်ဂှ် ညံၚ်ဂွံဍာံပြမြက်ဇက် ဒးကၠောန်ဏောၚ်ဂှ် ညးသ္ဂးရ။
သ္အာၚ်နူဂှ်ပၠန် ပ္ဍဲကဵုဂကောံအလဵုအသဳညဳသၟဟ်ဂကူဂှ် ဒှ်အလဵုအသဳဂကူပံၚ်ကောံ သေံ၊ ကချေၚ်၊ ကရေၚ်၊ ကရေၚ်ဍာဲ၊ မန်၊ ဗၟာ၊ တအာၚ်၊ ချေၚ်တံ ပါလုပ်မွဲရောၚ် ဟီုပ္တိတ်လဝ် ပ္ဍဲကောံဓရီုဂှ်ရ။
ဟိုတ်ဂှ်ရ စၟအ်ကောန်ဂကောံအလဵုအသဳ လ္ပရန်ကဵုပရေၚ်ဂကူဇကုသၟးမွဲဓဝ်တုဲ သွက်ဂွံသရောပ်သ္ၚဳရံၚ်အာ အလုံပရေၚ်ဍုၚ်အိုဿီုဂှ် နွံတဴပၟိက်ဗွဲတၟေၚ်ရောၚ် သမ္မတယာယဳ ဖ္တိုက်ဖ္အောဝ်လဝ်ရ။
ကၠောန်ၜိုတ်သာ်ဏံမှဟေၚ် ပ္ဍဲကဵုလၟေၚ်ကမၠောန် ဂွံဒက်ပ္တန်ကၟိန်ဍုၚ်ဖေဝ်ဒရာအနာဂတ်ဂှ် ဆက်အာတရဴ နကဵုဇြဟတ်ညဳသၟဟ်ဂကူ ဗိုန်န်ဗတ်တ်မာန်ဏောၚ်တုဲ နကဵု NUG လ္ဂောံကဵုပရေၚ်ဍုၚ်ကွာန် ညံၚ်ဂွံကိတ်ညဳကဵု ဂကောံဇြဟတ်ပၠန်ဂတးဗလးတိတံဂှ် ဒးဆက်ပ္တိတ်အာဇြဟတ်ဏောၚ်ဂှ် ဟီုဂးလဝ်ရ။
နကဵု NUG အခိၚ်လၟုဟ် လ္ဂောံကဵုပရေၚ်ဍုၚ်ကွာန်၊ ပရေၚ်ပၞာန်ဂှ် ဒက်လဝ်မဟာမိတ် ကုဂကောံကချေၚ် KIO, ဂကောံချေၚ် CNF, ဂကောံကရေၚ်ဍာဲ KNPP , ဂကောံကရေၚ် KNU တံတုဲ တုဲကၠုၚ်ခြာဟွံလအ်ဂှ်လေဝ် တုပ်လဝ်စိုတ် ကုဂကောံမန် NMSP-AD နဒဒှ်မဟာမိတ်ရ။
ပရိုၚ်−သြၚ်လောန်တိုၚ်(မ်)
ဗီု−NUG