ကျာ်မြဟ်၊ ဖေဖဝ်ဝါရဳ ၂၈
ပ္ဍဲဒေသၜါသွာၚ်၊ ပွိုၚ်ဍုၚ်ကျာ်မြဟ် တွဵုရးဍုၚ်မန်ဂှ် ပေါဲဗ္တိုက်ဟွံမွဲရတုဲ ညးဒေသတံ မိက်ဂွံစဴသ္ၚိအိုတ်ကီုလေဝ် ဒပ်ကံၚ်ဇြဳပၞာန် ဖျေံလဝ်ဒပ်ပ္ဍဲကွာန်တံ ဟွံကဵုလုပ်ကွာန်ဂှ်ရ ဟွံဂွံစဴဌာန်ဒၟံၚ်အိုတ်ဏီပုဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဟိုတ်နူပေါဲဗ္တိုက် သၞေဟ်ကၚ်ဒဒန်အတ္ထရံ ကေုာံ ဗ္ဒိုပ်ဗၠာဲသၟိၚ်ၜါသွာၚ် မစက္တဵုဒှ်လဝ် ပ္ဍဲဂိတုနဝ်ဝေမ်ဗာ ၁၀ သၞာံတုဲကၠုၚ်တေံဂှ်တုဲ ညးဒေသၜါသွာၚ် ဂၠိုၚ်ကဵုဠက် ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ် ဗ္ဒါဲ ၄ ဂိတုနွံကၠုၚ်ယျ မဒှ်ရ။
ဆ္ဂး ပေါဲဗ္တိုက်ၜါသွာၚ်ဝွံ သၞာံတုဲကၠုၚ် ကြဴနူဂိတုဒဳဇြေမ်ဗာ ၂၉ တုဲဂှ် ဒပ်ကံၚ်ဇြဳပၞာန် ကလေၚ်ထိၚ်ကေတ် ဒေသၜါသွာၚ်ဂှ်တုဲ ပေါဲဗ္တိုက်ဟွံက္တဵုဒှ် ဂွံကၠုၚ် ဗ္ဒါဲၜါဂိတုရ။
ဟိုတ်နူပေါဲဗ္တိုက်ဟွံမွဲရတုဲ ဂွံကလေၚ်စဴဌာန်ဒၟံၚ်ဂှ် ညးဇၞော်ဒေသတံ အာစိုပ်အာတ်မိက်လဝ် ဇရေၚ်ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲဗ္ဒိုပ်ၜါသွာၚ်ကီုလေဝ် လ္ပာ်ဒပ်ပၞာန်ဂှ် ယဝ်မံၚ်ဂွံတှ်ေ ကလေၚ်ကဵုပရိုၚ်ဏောၚ် ဒဒှ်ရဟီုလဝ်ဂှ် ဂွံတီကေတ် အတိုၚ်ဂလာန်ညးဒေသတံရ။
ညးဍုၚ်ကွာန်ပါဲဒလေတ်ဘဲပၞာန်ၜါသွာၚ်တံဂှ် ဟွံကဵုအခေါၚ်ဂွံကလေၚ်မံၚ် ပ္ဍဲကွာန်ဏီကီုလေဝ် သွက်ဂွံကဵုအခေါၚ်ကေတ်ကပေါတ်သှ်ေဒၟံၚ်ပ္ဍဲသ္ၚိတံ၊ ဂွံကဵုအခေါၚ်ရံၚ်စံၚ်သ္ၚိတံဂှ် စၟဳစဒၟံၚ်ရ။
အခိၚ်လၟုဟ် ညးဍုၚ်ကွာန်ပါဲဒဴဘဲပၞာန်ၜါသွာၚ်တံဝွံ တ္ၚဲပါဲဒဴဘဲပၞာန်ဂၠိၚ်သ္ၚောဲကၠုၚ်ဗက် နွံပၟိက်ကၠုၚ်ကဵု အရီုဗၚ်ပရေၚ်ဗ္စာရဏာမၞိဟ် ပါလုပ်သီုကဵုဂဥုဲဇဗ၊ စၞစ၊ ဒၞါဲမံၚ်စံၚ်တံဂှ် သၠုၚ်တိုန်ဒၟံၚ်ရောၚ် ဂွံတီကေတ်ရ။
အတိုၚ်ဂလာန်ညးဒေသတံဂှ်မ္ဂး ဒပ်ကံၚ်ဇြဳပၞာန်ဝွံ ညးဍုၚ်ကွာန်ဒေသ လုပ်စိုပ်ကၠုၚ် အပ္ဍဲကွာန်ၜါသွာၚ်တံဂှ် ပန်ပှော်ဒၟံၚ်ကဵုသေနာတ်တံရောၚ် သ္ဂးရ။
ဒပ်ကံၚ်ဇြဳပၞာန် ကလေၚ်ထိၚ်ဒက်လဝ် ဒေသၜါသွာၚ်ဂှ်ဝွံ ကၠတ်ဂၠံက်ကေတ်ဏာလဝ် ကပေါတ်မၞုံကဵုၚုဟ်မး ပ္ဍဲသ္ၚိဒၟံၚ်ညးဒေသ နူကဵုကွာန် ၅ ကွာန် ပါလုပ်သီုကဵုၜါသွာၚ်၊ တၟံဗြဴတံ ဗ္ဒါဲၜါလ္ၚီဂှ် ဂွံတီကေတ် နူကဵုညးဒေသတံရ။
ဟိုတ်နူပေါဲဗ္တိုက်ၜါသွာၚ် လအ်ကၠုၚ်ပွိုၚ် ၅၀ တ္ၚဲဂှ်တုဲ ညးဍုၚ်ကွာန်ဒေသ ဗ္ဒါဲ ၃၀၀၀၀ နူကဵု ၂၀ ကွာန်ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဂွံတီကေတ် ဇရေၚ်ညးမရီုဗၚ်ကဵုဒၟံၚ်ပရေၚ်ပါဲဒဴဘဲပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ