ယာန်ဗျေဝ်၊ ဖေဖဝ်ဝါရဳ ၂၉
စနူအခိၚ်သီအဝဵု စဵုကဵုလၟုဟ် ပ္ဍဲဍုၚ်ဗၟာ ဒပ်ကံၚ်ဇြဳပၞာန် ဗ္တိုက်ကၠုၚ်သွာၚ်ပရေၚ်ထတ်ယုက်ဂှ် နွံလဝ် စဵုကဵု ၁၂၀၀ ပြၚ်ရောၚ် ဂွံတီကေတ် အတိုၚ်စရၚ် ဌာနဝန်ဇၞော်ပရေၚ်ထတ်ယုက် အလဵုအသဳညဳသၟဟ်ဂကူ NUG ရ။
ဟိုတ်နူကံၚ်ဇြဳပၞာန်တုဲ သွာၚ်ပရေၚ်ထတ်ယုက် ရုၚ်ဂဥုဲ၊ ဗ္ဒမ်ဂဥုဲ ဒးလီုလာ်အာ ၃၀၀ ပြၚ်ကဵု ကောန်ကလောန်ပရေၚ်ထတ်ယုက် ၁၀၄ တၠ ဒးဒုၚ်ဂစိုတ်လဝ်တုဲ ၁၃၀ ပြၚ် ဇီုကပိုက်ကလိဂွံလဝ်ဝပ်ဂှ် ပ္ဍဲဂိတုဖေဖဝ်ဝါရဳ ၂၈ တေံ လလောၚ်ပ္တိတ်ကၠုၚ်ရ။
ပ္ဍဲကဵုလၟေၚ်ဒဒှ် ကံၚ်ဇြဳပၞာန် ကလိလောန်လဝ်ဂှ် အတိုၚ်တၚ်လလောၚ်တြး ဒပ်ပၞာန်ရခေၚ် AA လလောၚ်ပ္တိတ်လဝ်ဂှ်မ္ဂး ပ္ဍဲဂိတုဖေဖဝ်ဝါရဳ ၂၇ ဂှ် ထောံဂြာတ်လဝ်မခတိုဟ် ရုၚ်ဂဥုဲမေန်ဖူ ပွိုၚ်ဍုၚ်မေန်ပျာ နကဵုက္ၜၚ်ကျာဂျက်မွဲဖ္ဍိုက် နကဵုတၚ်ရန်တၟံနွံနွံဂှ်ရ စမြိုၚ်ရုၚ်ဂဥုဲဗွဲမဂၠိုၚ် ဒးဇီုကပိုက်လီုလာ်လဝ်ရောၚ် ထ္မံက်ထ္ၜးလဝ်ရ။
ပ္ဍဲကဵုရုၚ်ဂဥုဲဏံ ညးဍုၚ်ကွာန်ကောန်အရာပ်ဒုဟ်ဒဏ်ဟွံမွဲ မလွဳလွတ်ဒၟံၚ်ယဲတံ ညးဒုၚ်ကာရုၚ်ဂဥုဲတံ ဇီုကပိုက်ကလိဂွံလဝ်ဝပ် ဗွဲမသ္ကာတ်မြဟ်တံ နွံလဝ်တုဲ မွဲလ္ပာ်ဂှ်ပၠန် ဒှ်ဒၟံၚ်ရုၚ်ဂဥုဲ လွဳလွတ်ကဵုဒၟံၚ် ဂၠုဲပၞာန် ကောန်ဒပ်ကံၚ်ဇြဳပၞာန်တံ၊ ကောန်ဇာတ်ညးတံရောၚ် ဂွံတီကေတ်ရ။
ပ္ဍဲဂိတုဖေဖဝ်ဝါရဳ ၂၀ ဂှ်လေဝ် ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ် ကုဍုၚ် (ရမ်းဗြဲ) ဒေသရခေၚ် နကဵုက္ၜၚ်ကျာဗ္တိုက် နကဵုမခတိုဟ်ဇြဟတ်ပလီုသ္ကာတ်ဂှ် ရုၚ်ဂဥုဲၝောံဍုၚ်မွဲ၊ ဘာသဳလ ကေုာံ စမြိုၚ်သ္ၚိဒၟံၚ်တံ ဇီုကပိုက်လီုလာ်အာလဝ်ဏီရ။
သ္အာၚ်နူဂှ်ပၠန် ရုၚ်ဂဥုဲညးဍုၚ်ကွာန် မၞုံဍုၚ်ကဝ်လေန်၊ ရးသက်ကိုၚ်ဂှ်လေဝ် ပ္ဍဲဂိတုဖေဖဝ်ဝါရဳ ၉ တေံ ကံၚ်ဇြဳပၞာန် ဗ္တိုက်ဂြာတ်ဖျေံလဝ်မခတိုဟ် ၄ မ နကဵုပၞာန်ကျာတုဲ အလုံရုၚ်ဂဥုဲမွဲ ဇီုကပိုက်လီုလာ်အာလဝ် ဇၞော်ကဵုဇြဟတ်တုဲ မၞိဟ်ယဲ ကေုာံ ညးယိုက်ဝန်ပရေၚ်ထတ်ယုက်တံ ပါဲဒလေတ်ဂွံလဝ် ဗွဲမဂတာပ်အခိၚ်တုဲ ပရေၚ်ဇီုကပိုက်ဟွံမွဲလဝ်ရ။
ကံၚ်ဇြဳပၞာန်ဝွံ သ္ပကၠေံမၛ္ဇဟ် ကုဂျဳနဳဗာကောန်ဝေန်ယှေန်၊ တၚ်သ္ဂုတ်သွာတ် ကံၚ်ဇြဳဂီုကၠီု ကုလသမဂ္ဂ၊ သၞောဝ်ဍုၚ်သ္အာၚ် ဆေၚ်စပ်ကဵုပရေၚ်ဗ္စာရဏာမၞိဟ် ကေုာံ သၞောဝ်အပ္ဍဲဍုၚ်မ္ၚးဍုၚ်တံဂှ်တုဲ ကလိလောန်ဒၟံၚ် ပရေၚ်ဗ္တိုက် မပ္တဝ်က္ဍိုပ်ကဵု ညးဍုၚ်ကွာန်ဒုဟ်ဒဏ်ဟွံမွဲတံကဵု သွာၚ်ပရေၚ်ထတ်ယုက်တံ ဂၠိုၚ်ၚ်ကဵုဝါ ဗွဲမဓဇန်ကြမ်ကြဂှ် NUG သ္ဂးရ။
နကဵုဌာနဝန်ဇၞော်ပရေၚ်ထတ်ယုက် NUG ဂှ် ကဵုဒပ်ပၞာန်ရခေၚ်၊ ညးဍုၚ်ကွာန်ရခေၚ်တံဂှ်ကီု၊ ပါလုပ်သီုကဵုရးသက်ကိုၚ် ကဵုညးဍုၚ်ကွာန်ကောန်ဍုၚ်အရၚ် အလုံဍုၚ်တံဂှ်လေဝ် တံၚ်တောဲဗန်ကအ်ဒတူလိုၚ်အာ လ္ပာ်ဓဝ်ဍာံ မွဲကရောံမွဲစွံတုဲ ဗ္တိုက်ပ္တိတ်ပၠန်ဂတးဒၟံၚ် ကံၚ်ဇြဳပၞာန်ရောၚ် သ္ဂးရ။
ဟိုတ်ဂှ်ရ ကောန်ရဲတဝ်ခွါကံၚ်ဇြဳပၞာန်သီုဖအိုတ် ကုညးမကလိလောန် လ္တူသွာၚ်ပရေၚ်ထတ်ယုက်တံဂှ် ကေတ်အာအရေဝ် နကဵုသၞောဝ်ညးဍုၚ်ကွာန် ဗွဲမစိုပ်တရဴသ္ကာတ်မြဟ်ဏောၚ်တုဲ ညံၚ်သ္ဂောံကလိဂွံဓဝ်ဍာံဂှ် ရေၚ်တၠုၚ်အာဏောၚ် ဌာနဝန်ဇၞော်ပရေၚ်ထတ်ယုက် NUG လလောၚ်ပ္တိတ်ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−AA