မတ်မလီု၊ ဖေဖဝ်ဝါရဳ ၂၉
ကောံဓရီုကံၚ်ဇြဳဖေဝ်ဒရာဍုၚ်မန် MSFC အလန်ဒုတိယ မမံက်ဂတဝ်ကၠုၚ် အပ္ဍဲကာလပၠန်ဂတးက္ညၚ်ဏံဂှ် ပ္ဍဲဂိတုဖေဖဝ်ဝါရဳ ၂၈ တေံ စကၠောန်ဗဒှ်လဝ် ပ္ဍဲကဵုတိဍာ်ဗၠးၜးမွဲဒၞါဲဂှ် ဂွံတီကေတ်ရ။
ပ္ဍဲကဵုကောံဓရီုဏံဂှ် ပ္တိုန်ထ္ၜးလၟေၚ်ကမၠောန်ပွိုၚ်မွဲသၞာံကီု၊ သ္ၚဳဂၠိပ်တုဲ ဖျေံစၟတ်အာ လၟေၚ်ကမၠောန်ဂတတေံကီု၊ ကောန်ဂကောံ MSFC ကေုာံ ဇြဟတ်ပၠန်ဂတး ဖျေံသ္ဇိုၚ်အပ္ဍဲဍုၚ်မန်တံ သွက်ဂွံပံၚ်တောဲပါလုပ် ပ္ဍဲကဵုပရေၚ်ဖေဝ်ဒရာဍုၚ်မန်ဂှ် ရန်တၟံလဝ်ရ။
သ္အာၚ်နူဂှ်ပၠန် တၚ်ရန်တၟံပရေၚ်ဍုၚ်ကွာန် MSFC ၊ ဗီုတိထ္ၜးဂၠံၚ်ပရေၚ်ဍုၚ်ကွာန်တံဂှ် သွက်ဂွံဆက်ထ္မံက်ရုပ်ရဴ ကဵုက္ဍိုပ်သ္ကိုပ်ပံၚ်ကောဲဂှ်ကီု၊ နကဵုညးဍုၚ်ကွာန်တံ သွက်ဂွံတီညာတ်ကေတ် ပရူ MSFC ဂၠိုၚ်ၚ်ဂှ်ကီု၊ ကေုာံ သွက်ဂွံဖျေံတၚ်သ္ဂုတ်သွာတ် စပ်ကဵုကိစ္စပရူပရာ အခေါၚ်စၞောန်ပျးအပိုၚ် ကေုာံ အခေါၚ်ကဆံၚ်တုပ်သၟဟ်ကောန်ဂကူ အပ္ဍဲဍုၚ်မန်တံဂှ် နွံဒၟံၚ်ရ။
သွက်ဂွံတိုန်စိုပ်ကောံဓရီုဂှ် ကော်ဘိက်လဝ် သီုဇြဟတ်ပၠန်ဂတးပရေၚ်ဍုၚ်ကွာန် ဖျေံသ္ဇိုၚ်တွဵုရးဍုၚ်မန်တံ၊ ဇြဟတ်ပၠန်ဂတး ရပ်လွဟ်ကောန်ဍုၚ်အရၚ်တံ၊ ဂကောံပၠန်ဂတးက္ညၚ် ကေုာံ ဂကောံမှာဇန်တံရ။
ကံၚ်ဇြဳဖေဝ်ဒရာဍုၚ်မန် MSFC ဂှ် ပ္ဍဲသၞာံ ၂၀၂၁ သီလဝ်အဝဵု အပ္ဍဲဂိတုဨပရဴဂှ် စဒက်ပ္တန်လဝ် နဒဒှ်ကမ္မတဳပံၚ်တောဲရေၚ်တၠုၚ် အခိၚ်ကာလအကြာ MSICC တုဲ ကြဴနူကၠောန်ဗဒှ်ကောံဓရီုအလန်ပထမ ပ္ဍဲသၞာံ ၂၀၂၃ ဂိတုဂျာန္နဝါရဳတုဲဂှ် ပြံၚ်လှာဲထောံလွေဟ် နဒဒှ်ဖေဝ်ဒရာယူနေတ်တွဵုရးမွဲရ။
ပ္ဍဲကဵုကောံဓရီုအလန်ပထမဂှ် ကရောံတၚ်ရန်တၟံပရေၚ်ဍုၚ်ကွာန် MSFC ၊ ဗီုတိထ္ၜးဂၠံၚ်ပရေၚ်ဍုၚ်ကွာန်တံဂှ် သ္ပဒတန်လဝ် သၞောဝ်သ္ဇိုၚ်ဒက်ပ္တန်မာန်လဝ်တုဲ အခိၚ်ကာလအကြာ၊ ကာလပၠန်ဂတးဏံ သွက်ဂွံရပ်စပ်စကာဂှ်လေဝ် ဖျေံစၟတ်လဝ် သီုကဵုပရေၚ်ခၞံသၞောဝ်၊ ပရေၚ်စဳရေၚ်သၞောဝ်ဓဝ် ကေုာံ ပရေၚ်အုပ်ဓုပ် အဝဵုပိတန် မဒှ်ရ။
ကံၚ်ဇြဳဖေဝ်ဒရာဍုၚ်မန်ဝွံ ဒက်ပ္တန်လဝ် ဒပ်ပၠန်ဂတးဍုၚ်မန် MSRF နဒဒှ်ဒပ်ရပ်လွဟ်ဖျေံသ္ဇိုၚ်ဍုၚ်မန်တုဲ ပ္ဍဲကဵုအလဵုအသဳညဳသၟဟ်ဂကူ NUG ဂှ်လေဝ် ဝန်ဇၞော်ပိတၠ ကေုာံ ပ္ဍဲ NUCC ဂှ် ညးစၞးပိတၠ ပါလုပ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MSRF