မတ်မလီု၊ ဖေဖဝ်ဝါရဳ ၂၉
ဒဒန် (မိုးကောၚ်း) မၞုံပွိုၚ်ဍုၚ်သဓီု တွဵုရးဍုၚ်မန် ဒးဒုၚ်ဖံက်ဗ္တိုဟ်ပလီုပလာ်တုဲ ပ္ဍဲကဵုပွိုၚ်ဍုၚ်ဗွဲမဂၠိုၚ် ဒှ်တိုန်ဓဝိၚ်ညးသ္ကအ်အိုတ်တုဲ ဟိုတ်နူပၠံၚ်ရာန်ကၠေၚ်စက်တံဂှ်ရ ကၠေၚ်အိုတ်က္တဵုဒှ်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန် (မိုးကောၚ်း) နွံဒၟံၚ်လ္တူဂၠံၚ်ကွဳစက် လ္ဂုၚ်−မတ်မလီုဂှ်ဝွံ ပ္ဍဲဂိတုဖေဖဝ်ဝါရဳ ၂၈ အခိၚ်နူဂယး ဗၞတ် ၁ နာဍဳဂှ် ဒးဒုၚ်ဖံက်ဗ္တိုဟ်ပလီုပလာ်လဝ်တုဲ အလုံဒဒန်မွဲတၞုၚ် သရိုဟ်စှ်ေလီုလာ်အာလဝ်တုဲ ပရေၚ်ဆက်စၠောံအာကၠုၚ် ပိုတ်သ္ကုတ်အာရ။
ဟိုတ်နူဒဒန်သရိုဟ်စှ်ေလီုလာ်အာလဝ်တုဲ ဆေၚ်ကၠေၚ်စက် ဍုၚ်မတ်မလီုကီု ပ္ဍဲကဵုပွိုၚ်ဍုၚ်ဗွဲမဂၠိုၚ်ဂှ် ပၠံၚ်ရာန်ဒၟံၚ်ကၠေၚ်စက်ညးသ္ကအ်တုဲ ကၠေၚ်ပိုတ်က္တဵုဒှ်ဒၟံၚ်တုဲ ထပ်ဒးဂဗဒၟံၚ်ကဵု အကာဲအရာ ဒးမၚ်ရေၚ်ရာန်ဒၟံၚ်ကၠေၚ် အခိၚ်ဗွဲမလအ်လ ပၠန်ရ။
ဟိုတ်နူကၠေၚ်စက်ပိုတ်ဒၟံၚ်တုဲ နူကဵုဆေၚ်ကၠေၚ်စက်တံဂှ် ကွဳလိုန်ဓာတ်မွဲဖ္ဍိုက်မ္ဂး ကွက် ၅၀၀၀ ဒ္ကေဝ်၊ ကွဳသၠာပိမွဲဖ္ဍိုက် ၁၀၀၀၀ ဒ္ကေဝ်၊ ကွဳစက်မွဲဖ္ဍိုက် ၃၀၀၀၀ ဒ္ကေဝ်ဂှ် သွံကဵုဒၟံၚ် နကဵုသၞောတ်ဗ္ၜတ်ဂှ် ဂွံတီကေတ်ရ။
“ဟိုတ်နူပရေၚ်ဒဒန်ဏံတုဲ ကွဳစက်ကၠေၚ်ကၠုၚ်ဟွံဂွံတုဲ ဆေၚ်ကၠေၚ်နွံဒၟံၚ်အပ္ဍဲဍုၚ်တံဂှ် ရာန်ဒၟံၚ်ကၠေၚ်တံရ။ လဒေါဝ်တ္ၚဲ ၜိုတ် ၁၁ နာဍဳ စုတ်ကၠေၚ် ပ္ဍဲ Denko ဂှ် ကၠေၚ်အိုတ်အာယျဟီုလဝ်ရ။ ကွဳစက်မွဲဖ္ဍိုက်ဂှ်တှ်ေ ၉၂ ရဏောၚ်ဂွံ။ သွံကဵုကွက်ပိဠက်။ ကွဳလိုန်ဓာတ်ဂှ်တှ်ေ ၅၀၀၀ ဓဝ်ရဂွံ” သာ်ဝွံ ညးဒေသမတ်မလီုမွဲတၠ လဴထ္ၜးလဝ် တၚ်ဆဵုဂဗ မ္ဒးရာန်ကၠေၚ်တံဂှ်ရ။
ကၠေၚ်စက်ပိုတ်ဂှ် ပ္ဍဲကဵုပွိုၚ်ဍုၚ်မတ်မလီု၊ ၜါသွာၚ်၊ ကျာ်မြဟ်၊ မုဟ်ဍုၚ်၊ ဇြပ်ဗု၊ ရေဝ်၊ ပံၚ် ကေုာံ ပွိုၚ်ဍုၚ်သဓီု ဒၞါဲလ္ၚဵုတံဂှ် ထပ်က္တဵုဒှ်ဒၟံၚ် ဇၞော်ကဵုဇြဟတ်ရ။
ကြဴနူဒဒန် (မိုးကောၚ်း) ဒးဒုၚ်ဖံက်ဗ္တိုဟ်တုဲဂှ် ကွဳစက်ဖ္ဍိုက်ကၠေၚ်တံကီု ကွဳစက်ဖ္ဍိုက်ဗၞိက်တံဝွံ ကၟာတ်ဆိုအ်ဒၟံၚ် ဂၠံၚ်လုပ်ဍုၚ်ၜဳကလေၚ်တုဲ ကွဳစက်သ္ၚိတံကဵု ယာန်ဍောတ်တ်တံဂှ်တှ်ေ အာကၠုၚ်ဒၟံၚ် နူကဵုဂၠံၚ်သ္ပဝ် ကွာန် (မိုးကောၚ်း) ဂှ် နွံဒၟံၚ်ရောၚ် ဂွံတီကေတ်ရ။
ဒဒန် (မိုးကောၚ်း) ဒးဒုၚ်ဖံက်ဗ္တိုဟ်တုဲ ကွဳစက်ဖ္ဍိုက်ဗၞိက်တံ ကၠုၚ်ဟွံဂွံဂှ်ရ ပ္ဍဲကဵုဗွဝ်ဖျာၜဲ တွဵုရးဍုၚ်မန်ဂှ် ပရေၚ်ရာန်ၜဲတံ ဒေါအ်ဒေၚ်အာလဝ်ရောၚ် သၟာဗၞိက်ၜဲမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တ္ၚဲဏံ ပိုယ်တံ ဒးရေၚ်လဝ်ကွဳစက်တံ မွဲလစုတ်ရ။ ဒးရေၚ်ဒၟံၚ်တုဲ ဒေါအ်လဝ် ရာန်ၜဲဂှ်မွဲလစုတ်။ ၜိုတ်ၜါတ္ၚဲရ။ ပ္ဍဲကဵုဂိုဝ်ဒံၚ်ပိုယ်တံဂှ်လေဝ် လ္ပာ်လုပ်ဂၠိုၚ်တုဲ ဒၞါဲဂွံစွံလေဝ် ဟွံမွဲပုဟ်” သာ်ဝွံ သ္ဂးရ။
ဟိုတ်နူဒဒန်(မိုးကောၚ်း) သရိုဟ်လီုလာ်အာလဝ်တုဲ အခိၚ်လၟုဟ် လ္ပာ်ကံၚ်ဇြဳပၞာန် သွက်ဂွံထ္ပက်ဒဒန်ယာယဳ ပလေဝ်ပလေတ်ဒၟံၚ်ရောၚ် ဂွံတီကေတ် အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံရ။
အပ္ဍဲလၟေၚ်ဒဒှ် ဒဒန် (မိုးကောၚ်း) ဒးဒုၚ်ဖံက်ပလီုပလာ်ဂှ် သ္ၚိဒၟံၚ် ၂ မ၊ ဗ္ဒမ်ဖျာ ၂ ဇီုကပိုက်လီုလာ်အာလဝ်တုဲ ညးဍုၚ်ကွာန်ကောန်အရာပ်မွဲတၠလေဝ် ဇီုကပိုက်ကလိဂွံလဝ်ဝပ်ဂှ် ညးဒေသတံ ဟီုဂးလဝ်ရ။
စပ်ကဵုဒဒန် (မိုးကောၚ်း) လီုလာ်ဂှ်တုဲ ဂကောံလဵုမွဲမှ လလောၚ်ပ္တိတ်လဝ်ပရိုၚ်ဂှ်ဟွံမွဲဏီကီုလေဝ် ရဲထံက်ဂလာန်ဒပ်ပၞာန်တံဂှ် ဇြဟတ်ပၠန်ဂတးတံ ကၠောန်လဝ်ရောၚ် တြးဒၟံၚ်ဝါဒတံ နွံဒၟံၚ်ရ။
ဒဒန် (မိုးကောၚ်း) သရိုဟ်လီုလာ်အာဂှ်ဝွံ နွံဒၟံၚ် လ္တူဂၠံၚ်ကွဳစက် လ္ဂုၚ်−မတ်မလီု ဆက်စၠောံလဝ် ပွိုၚ်ဍုၚ်သဓီု ကဵု ၜဳကလေၚ်ဂှ်တုဲ သီုကဵုဒှ်ဒဒန်အဓိက သွက်ပရေၚ်သွံရာန်ဗၞိက်မွဲရ။
ပရိုၚ်−သြၚ်လောန်တိုၚ်(မ်)
ဗီု−CJ