ဗိက်၊ ဖေဖဝ်ဝါရဳ ၂၉
ပ္ဍဲထံၚ်ဗိက် ရးတၞၚ်သဳဂှ် ကောန်ထံၚ် ၁၅၀ တၠ ဒးဒုၚ်ဆုဲပြံၚ်ထံၚ်တုဲ ပ္ဍဲကဵုဂှ် ကောန်ထံၚ်ပရေၚ်ဍုၚ်ကွာန် ဗ္ဒါဲ ၁၀၀ ပါလုပ်မာန်ရောၚ် ဂွံတီကေတ် ဇရေၚ်ဇာဇၞိက်ကောန်ထံၚ်ပရေၚ်ဍုၚ်ကွာန် အလုံဍုၚ်ဗၟာ PPNM ရ။
ဂကောံဒပ်ပံၚ်ကောံကံၚ်ဇြဳပၞာန် ကေုာံ သၟိၚ်တၠအဝဵုထံၚ်တံဝွံ ပ္ဍဲဂိတုဖေဖဝ်ဝါရဳ ၂၈ အခိၚ်နူဂယး ၜိုတ် ၃ နာဍဳဂှ် ဆုဲပြံၚ်လဝ် ကောန်ထံၚ် ၁၅၀ ဇရေၚ်ထံၚ်ကအ်သံၚ် နကဵုက္ၜၚ်ရ။
ဆုဲပြံၚ်လဝ်ကောန်ထံၚ်တံ ဟွံသေၚ်ကဵုအခိၚ်ဂှ် ကောန်ဇာတ်ဂြောဝ်ဂတာညးတံလေဝ် ဟွံဂွံတီကေတ်လဝ်ပုဟ်ဂှ် ညးမၞုံအခေါၚ်ဟီုဂး PPNM ကိုဝ်တိုက်ထောန်ဥူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဆုဲပြံၚ်ထံၚ်ဂှ်ဝွံ လ္ပာ်ကံၚ်ဇြဳပၞာန် မကျကၠုၚ်ဒၟံၚ်ပၞာန်ဂှ် ပါဲပ္တိတ်ကောန်ထံၚ်တံဂှ်တုဲ သွက်ဂွံဍဵုဍိုက် ဗွဲမတေၚ်ဂြတ် ကၠောန်ကၠုၚ်မာန်ဏောၚ် ညးသ္ဂးရ။
တုဲကၠုၚ် ပ္ဍဲဂိတုဖေဖဝ်ဝါရဳ ၁၄ တေံဂှ်လေဝ် ကံၚ်ဇြဳပၞာန်ဝွံ အလန်ပထမကိုပ်ကၠာအိုတ် ဆုဲပြံၚ်လဝ် ကောန်ထံၚ်ဗိက် ဗ္ဒါဲ ၃၀၀ ပ္ဍဲကဵုထံၚ်ကအ်သံၚ်ရ။
ဟိုတ်နူပလံၚ်ထောံလဝ် ကောန်ထံၚ်တံ ဒၞါဲသ္ၚောဲသ္ၚောဲတံဂှ်တုဲ နကဵုကောန်ဇာတ်ဂမၠိုၚ် ဟိုတ်နူအကာဲအရာဂၠံၚ်ဍာန်တံကဵု ပေါဲဗ္တိုက်တံတုဲ ဂွံကၠုၚ်ဆဵု ပလံၚ်ဇွောံမပ္ဍဲထံၚ်ဂှ် ခက်ခုဲကၠုၚ်မာန်ရောၚ် ညးမရီုဗၚ်ရေၚ်တၠုၚ်ကဵုဒၟံၚ် ပရေၚ်ကောန်ထံၚ်ပရေၚ်ဍုၚ်ကွာန်တံ သ္ဂးရ။
မွဲလ္ပာ်ဂှ်ပၠန် ဒပ်ကံၚ်ဇြဳပၞာန်ဝွံ နကဵုတၚ်စောဲစပ်ဂြိပ်တိတ် အဃောပြံၚ်ထံၚ်ဂှ် ပန်ဂစိုတ်ထောံ ကောန်ထံၚ်ပရေၚ်ဍုၚ်ကွာန်တံ လၟေၚ်ဒဒှ်သာ်ဏံလေဝ် က္တဵုဒှ်ဒၟံၚ်မွဲဏှမွဲဏှရ။
အတိုၚ်လိက်ဒုၚ်စဳရေၚ် ဇာဇၞိက်ကောန်ထံၚ်ပရေၚ်ဍုၚ်ကွာန်အလုံဍုၚ်ဗၟာ PPNM ဂှ်မ္ဂး အပ္ဍဲသၞာံ ၂၀၂၃ တုဲကၠုၚ်တေံ ပ္ဍဲကဵုထံၚ်စာတ်တံဂှ် ဟွံဂွံအခေါၚ်လွဳလွတ်ယဲတုဲ ကောန်ထံၚ်ပရေၚ်ဍုၚ်ကွာန် ၁၇ တၠ ချိုတ်အာလဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ