ဍာ်ဗု၊ မာတ် ၁
ရးတၞၚ်သဳ ပွိုၚ်ဍုၚ်ဍာ်ဗု ပ္ဍဲကဵုဒေသ (ကံပေါက်) ဂှ် ပါလုပ်သီုကဵုအ္စာၝောံ CDM မွဲတၠဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ် ညးဒေသ ၃ တၠ ပ္ဍဲကဵုဂိတုဖေဖဝ်ဝါရဳ ၂၈ အခိၚ်ဗ္တံဂှ် ဂွံတီကေတ် အတိုၚ်ဂလာန်ညးဒေသတံရ။
ကောန်ဒပ်ကံၚ်ဇြဳပၞာန်တံဝွံ လုပ်စိုပ်ရပ်ဒက်လဝ် အ္စာၝောံ CDM ဒဝ်မဳမဳဇြဝ် အာယုက် ၄၈ သၞာံ ဒၟံၚ်အရာပ်ခိုၚ်သဇၚ်၊ ကိုဝ်နာၚ် ညးဒဳကွဳစက် ကမ္ပဏဳ PTT ဒၟံၚ်အရာပ်မဂ္ဂၚ် ကေုာံ သမ္ဘာညး ဒဝ်မေဒေတံ ပ္ဍဲသ္ၚိရ။
ဒပ်ကံၚ်ဇြဳပၞာန်ဂှ် အ္စာၝောံ CDM ဒဝ်မဳမဳဇြဝ်ဂှ်ဝွံ နကဵုတၚ်စောဲစပ် ဗ္တောန်ကဵုဒၟံၚ်လိက် ပ္ဍဲကဵုပရေၚ်ပညာ NUG လ္တူအောန်လာၚ်ဂှ်ကီု၊ ကိုဝ်နာၚ် သမ္ဘာညးတံၜါတၠဂှ်ဝွံ ထံက်ပၚ်ကဵုဒၟံၚ် PDF တံဂးတုဲ ရပ်ဒက်ဏာလဝ်ရ။
မၞိဟ်ရပ်ဒက်ဏာတံဂှ် စၟဳတ်ဒၟံၚ် ပ္ဍဲဌာန်ဂအုပ်ဒပ်ဍာ်မောရဝတဳ ကံၚ်ဇြဳပၞာန်တုဲ ကဵုဂြောဝ်ဂတာတံလေဝ် ဟွံဂွံအဆက်ဏီပုဟ်ဂှ် ဂွံတီကေတ်ရ။
ပ္ဍဲဒေသ (ကံပေါက်) အပ္ဍဲဂိတုဏံ ပါလုပ်သီုကဵုအ္စာၝောံ CDM တံဂှ် ညးဍုၚ်ကွာန်ကောန်အရာပ် ဟွံအောန်နူကဵု ၂၀ တၠ ဒးဒုၚ်ရပ်ဒက်လဝ်တုဲ ဗွဲမဂၠိုၚ်ဂှ်ဝွံ ဒးဒုၚ်ပံက်လဝ်ဂဗုတ် နကဵုၝောံပိုဒ် သၞောဝ်ဗ္တိုက်သ္အးပကီုပရာပ်တံရ။
ပ္ဍဲကဵုဒေသ (ကံပေါက်) ဒၞါဲချဳဒရာၚ်ဒစဵုဒစး သၞောတ်တၠအဝဵုပၞာန် ဇြဟတ်ခိုဟ်ဂှ် မ္ၚးနူအမိၚ်တိတ်ဗ္တံဟွံဂွံဂှ် ဒပ်ကံၚ်ဇြဳပၞာန် သၞောတ်ဗ္ၜတ်လဝ် သီုကဵုအခေါၚ်ဍိုက်ကွဳလိုန်ဓာတ် မၞိဟ်တြုံၜါတၠ ဍိုက်ကွဳလိုန်ဓာတ်တုပ်ပ်ဟွံဂွံတံရ။
အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ ပ္ဍဲရးတၞၚ်သဳ ညးဍုၚ်ကွာန်ကောန်အရာပ် ဗ္ဒါဲ ၁၆၀၀ ဒးဒုၚ်ရပ်ဒက်လဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ