နေဗျဳဒဝ်၊ မာတ် ၁
အပ္ဍဲသီအဝဵုပွိုၚ်ပိသၞာံဏံ ကၠောန်သ္ပလဝ်အပြံၚ်အလှာဲ ကုပူဂဵုကဆံၚ်လ္တူ ၁၅၂ တၠ မပါလုပ်လဝ် ပ္ဍဲကဵုယန္တယာအုပ်ဓုပ် ကေုာံ ကောန်ဂကောံကံၚ်ဇြဳ က္ဍိုပ်သ္ကိုပ်ပၞာန် မဒက်ပ္တန်လဝ်ဂှ်ဝွံ ပ္ဍဲအရာဖျေံဒၞါဲဝါဲတံကဵု ပါ်ပရအ်တာလျိုၚ်တံဂှ် ဗီုပြၚ်ညိၚ်ဝတ်ဟွံမွဲပုဟ်ဂှ် လိက်ဒုၚ်စဳရေၚ် ISP-Myanmar သ္ဂးရ။
အတိုၚ်လိက်ဒုၚ်စဳရေၚ်ဂှ်မ္ဂး အပ္ဍဲသီအဝဵုပွိုၚ်ပိသၞာံဏံ စပ္တံနူကဵုကောန်ဂကောံကံၚ်ဇြဳ၊ ဝန်ဇၞော်၊ ဒုဝန်ဇၞော် ပ္ဍဲကဵုယန္တယာအုပ်ဓုပ်တံ စဵုကဵုကဆံၚ်သ္ကိုပ်ဝန်ဇၞော်တွဵုရး ကေုာံ ရးဒေသ မကဵုလဝ်ယၟု ကံၚ်ဇြဳအုပ်ဓုပ်ကၟိန်ဍုၚ်တံဂှ် ပါလုပ်ဒၟံၚ်ရ။
နကဵုတၚ်ထ္ၜးဟိုတ်စရၚ်မာဲဗၠေတ် ပ္ဍဲပေါဲရုဲမာဲဂှ်တုဲ ဒပ်ပၞာန် သီကေတ်လဝ်အဝဵုကၟိန်ဍုၚ်တုဲဂှ် ဒက်ပ္တန်လဝ် ကံၚ်ဇြဳပၞာန်တုဲ နဒဒှ်ကောန်ဂကောံကံၚ်ဇြဳတံဂှ် ကောန်ပၞာန်ကဝက်၊ လ္ပာ်အရာပ်ကဝက် ထ္မံက်လဝ်ရုပ်ရဴရောၚ် လိက်ဒုၚ်စဳရေၚ်ဂှ် သ္ဂးရ။
ပ္ဍဲကဵုကောန်ဂကောံကံၚ်ဇြဳ ဒက်ပ္တန်လဝ်ဂှ် လ္ပာ်ပၞာန် ၉ တၠ ကေုာံ လ္ပာ်အရာပ် ၁၀ တၠ အပံၚ်ဖအိုတ် ၁၉ တၠ ထပ်ပပဵုပ္တိုန်လဝ်အဆံၚ်ၚ်တုဲ ပ္ဍဲဂိတုဖေဖဝ်ဝါရဳ သၞာံ ၂၀၂၂ ဂှ် လ္ပာ်ပၞာန် ထပ်ပပဵုပ္တိုန်လဝ် ဒုသ္ကိုပ်ဗိုလ်ဇၞော်မွဲတၠဂှ်ရ လ္ပာ်ပၞာန်၊ လ္ပာ်အရာပ် ဒှ်အာ ၁၀ တၠစၟအ်အ်ရ။
ပ္ဍဲသၞာံ ၂၀၂၃ ဏံဂှ် မွဲသၞာံဓဝ် ကၠောန်သ္ပလဝ်အပြံၚ်အလှာဲ စဵုကဵုပိဝါတုဲ ပ္ဍဲကဵုအပြံၚ်အလှာဲ အလန်ပထမတေံ ကောန်ဂကောံကံၚ်ဇြဳ သၟာပရေၚ်ဍုၚ်ကွာန်လ္ပာ်အရာပ် လညာတ်ဟွံတုပ် ကုက္ဍိုပ်သ္ကိုပ်ပၞာန်လ္ၚဵုတံဂှ် ကဵုဒေါအ်ဇူတုဲ ထ္ပက်လဝ်အဇာ မၞိဟ်တၟိရ။
အလန်ဒုတိယဂှ်လေဝ် ကောန်အရာပ် ကောန်ဂကောံကံၚ်ဇြဳတံဂှ် ထပ်ကဵုဇူလဝ်တုဲ ပ္ဍဲအလန်တတိယဂှ် မၞိဟ်ပတှ်ေက္ဍိုပ်သ္ကိုပ်ပၞာန် ကောန်ဂကောံကံၚ်ဇြဳ ဒုသ္ကိုပ်ဗိုလ်ဇၞော်ၜါတၠ စလာဘ်ဗဇဴတုဲ ဒးဒုၚ်ပ္တိတ်လဝ်ဂှ်ရ ထ္ပက်လဝ်အဇာ ကုရဲလ္ပာ်ပၞာန်ၜါတၠပၠန်ရ။
လက္ကရဴအိုတ် သၞာံ ၂၀၂၄ ဂိတုဖေဖဝ်ဝါရဳ အခိၚ်ပပဵုပ္တိုန်အာယုက်ဂှ် ၜိုန်ရသၠာဲလဝ်မၞိဟ်ဟွံမွဲကီုလေဝ် အပ္ဍဲပွိုၚ်ပိသၞာံဏံ ကလေၚ်ပလေဝ်ပလေတ်ဒက်ပ္တန်လဝ် ကံၚ်ဇြဳပၞာန်ဂှ် ဂွံကၠုၚ်ပန်ဝါ မဒှ်ရ။ မၞိဟ်ပါလုပ်လဝ် ပ္ဍဲကဵုကံၚ်ဇြဳဏံ ၃၃ တၠ နွံလဝ်တုဲ အပြံၚ်အလှာဲဒၞါဲ ၂၂ ဝါ ကေုာံ မၞိဟ်ဒးဒုၚ်ကဵုဒေါအ်ဇူ နွံလဝ် စဵုကဵု ၁၅ တၠဂှ် ထ္မံက်ထ္ၜးလဝ် ပ္ဍဲလိက်ဒုၚ်စဳရေၚ်ဂှ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ယန္တယာအုပ်ဓုပ်ကံၚ်ဇြဳပၞာန်ဝွံ ဒၟါနူအပြံၚ်အလှာဲဂၠိုၚ်လောန်ဂှ်ရ ဒှ်ကာလအပြံၚ်အလှာဲဂၠိုၚ် ဒၟါနူကောန်ဂကောံကံၚ်ဇြဳတံ၊ သၞာဲဒဴတံ စလာဘ်ဒ္ဂေတ်လီု သီုကဵုဖျေံလွဟ်လက်နက်တံရောၚ်ဂှ် သ္ၚဳဂၠိပ်လဝ်ရ။
“အခိၚ်ကာလတ္ၚဲဏံ ယန္တယာအုပ်ဓုပ်ကံၚ်ဇြဳပၞာန်ဂှ် ဒၟါနူအပြံၚ်အလှာဲဂၠိုၚ်ကွေံကွေံတုဲ ဍုၚ်ကွာန်ဟွံညိၚ်ဝတ်ကီု၊ ရဲနွံဒၟံၚ်ပ္ဍဲကံၚ်ဇြဳပၞာန်တံ စလာပ်ဒ္ဂေတ်လီုတံဂှ် မံက်တိတ်ကၠုၚ်ရ။ ဟိုတ်ဂှ်ရ ဒလေတ်ဟွံဂွံ ဒးကေတ်ထောံအရေဝ်။ မွဲပၠန်ဂှ် အလဵုသၞာဲဒဴကဆံၚ်လ္တူတေံ အလဵုသ္ကိုပ်ဗိုလ်တံ စလာပ်ဗဇဴ၊ ဖျေံလွဟ်ဒုၚ်ကျတံ ဂၠိုၚ်ကၠုၚ်တုဲ ဗွဲမစှ်ေကဵုသဘာဝ ပါလုပ်သီုကဵုကံၚ်ဇြဳပၞာန် အပြံၚ်အလှာဲသ္ကိုပ်ရး၊ သ္ကိုပ်ဒပ်တံဂှ် ဒှ်ကာလအပြံၚ်အလှာဲဂၠိုၚ်ကွေံကွေံဏောၚ်ဂှ် အဲ မ္ဒးသ္ၚဳဂၠိပ်ဏာရ” သာ်ဝွံ သ္ဂးရ။
မွဲလ္ပာ်ဂှ်ပၠန် က္ဍိုပ်သ္ကိုပ်ပၞာန်ဝွံ အပ္ဍဲပွိုၚ်ပိသၞာံ ပလေဝ်ကၠုၚ်လဝ် ဂကောံအလဵုအသဳ ၆ ဝါတုဲ ပ္ဍဲကဵုဏံ လှာဲမၞိဟ်ကီု၊ ဆုဲပြံၚ်ဒၞါဲဝါဲတံကီုဂှ် ၅၆ ဝါ ကေုာံ မၞိဟ်ပူဂဵု ၅၄ တၠ နွံလဝ်ရောၚ် လိက်ဒုၚ်စဳရေၚ် ISP-Myanmar ထ္မံက်ထ္ၜးလဝ်ရ။
လၟေၚ်ဌာနဝန်ဇၞော် ပြံၚ်လှာဲပလေဝ်ကၠုၚ်ဂၠိုၚ်အိုတ်ဂှ်ဝွံ ဒှ်ဌာနဝန်ဇၞော် ရုၚ်အလဵုအသဳကၟိန်ဍုၚ်တုဲ ပလေဝ်ပြံၚ်လှာဲလဝ် စဵုကဵုဒ္စါံဝါရ။ အလန်လက္ကရဴအိုတ် ပ္ဍဲပလေဝ်ဒက်ပ္တန်လဝ်ဂှ် လှဲပ္တိုန်လဝ် ဌာနဝန်ဇၞော် ရုၚ်ဥက္ကဌကံၚ်ဇြဳအုပ်ဓုပ်ကောပ်ကာဲကၟိန်ဍုၚ် နူစၟတ်(၁) စဵုကဵု စၟတ် (၄) ရ။
ပ္ဍဲကဵုအပြံၚ်အလှာဲဌာနဝန်ဇၞော်တံဂှ် ရုၚ်ဂကောံအလဵုအသဳကၟိန်ဍုၚ်တုဲမ္ဂး ဌာနဝန်ဇၞော်သၟာကမၠောန်၊ ဟဝ်တေဝ် ကေုာံ အာကၠုၚ်တရဴ၊ ဇြဟတ်ဓာတ်တံ ကေုာံ ဂကောံဒုၚ်ကာညးဍုၚ်ကွာန်ကၟိန်ဍုၚ်၊ ကဝ်မယှေန်ဗ္တိုက်သရိုဟ်ဗက်စအဂတိတံဂှ် ဒှ်ဒုတိယဂၠိုၚ်အိုတ်တုဲ ပြံၚ်လှာဲလဝ် စဵုကဵုပိဝါရ။
ပရိုၚ်−သြၚ်လောန်တိုၚ်(မ်)
ဗီု−MOI