သၚ်ခဠပူရဳ၊ မာတ် ၂၄
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ပ္ဍဲပယျဵုသေံဗၟာ ကောန်ဍုၚ်ဗၟာသက်သဳဟွံမွဲတံ ဒးဒုၚ်ရပ်ဒၟံၚ် ဂၠိုၚ်ကဵုကၠံ အဆက်က်ဂှ် ညးမရီုဗၚ်ကဵုဒၟံၚ် ပရေၚ်ကောန်ကလောန်ဆုဲပြံၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် လက်ထက်တၠအဝဵုတြေံ ဥူတာန်ယှိုဲဂှ် ဟိုတ်နူကံၚ်ဇြဳပၞာန်ပၞာန်သီအဝဵု ပၠောပ်ထောံလမျီု ပ္ဍဲဂိတုဖေဖဝ်ဝါရဳ ၁၀ တေံလွာဲဂှ်တုဲ ညးသၟတ်ဂမၠိုၚ်ဝွံ ဂြိပ်တိတ်ပါဲဒလေတ်အာ ဍုၚ်သ္အာၚ်တံ နကဵုဂၠံၚ်ဍာန်နာနာသာ်ရ။
ပ္ဍဲကဵုဏံ ကောန်ဍုၚ်ဗၟာ ဂ္စါန်လုပ်စိုပ်ဍုၚ်သေံ ဍုၚ်ဇိုၚ်ဝုတ်ဒိုဟ် နကဵုနဲဟွံလုပ်သၞောဝ်တံဂှ်ဝွံ ပယျဵုသေံ−ဗၟာ လ္ပာ်ကအ်သံၚ်−ရနံၚ်ကီု၊ ခရိုၚ်တက် ဍုၚ်ဗြဝတဳ သြၚ်လ္ပာ်တေံဂှ်ကီု ပယျဵုကျာ်ပိ ပ္ဍဲတွဵုရးကာန်ချနပူရဳတံဂှ် ဒးဒုၚ်ရပ်ဒက်ဒၟံၚ် အဆက်က်ရ။
ဥူအံၚ်ကျဝ် ညးမကဵုဒၟံၚ်အရီုဗၚ် ပရေၚ်ကောန်ကလောန်ဆုဲပြံၚ်ဍုၚ်ဗၟာ စိုပ်ဍုၚ်သေံဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကောန်ဍုၚ်ဗၟာ အာယုက် ၁၈ လ္ပာ်လ္တူတံဝွံ လုပ်စိုပ်ဒၟံၚ်ဍုၚ်သေံ ဍုၚ်ဇိုၚ်ဝုတ်ဒိုဟ် နကဵုဂၠံၚ်ဍာန်လုပ်ဂွံတံ အရိုဟ်ဟ်တ္ၚဲဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ရပ်ဂွံဒၟံၚ် အဆက်က်ဟီုဂှ် ပိုယ်တံလေဝ် ဂွံဆဵုညာတ်ဒၟံၚ် ပ္ဍဲပရိုၚ်သေံကီုရ။ ဆ္ဂး နကဵုလၟိဟ်ချိုတ်တ်ပၠိုတ်တ် ဂွံကၠောန်မာန်ဂှ် ဝါတ်ဂါတ်ကွေံကွေံဏောၚ်။ မူဟိုတ်ရောတှ်ေ လ္ၚဵုတံဂှ် လလောၚ်ပ္တိတ်ပရိုၚ်ဟွံမွဲမွဲသာ် ရပ်ဒက်ကေတ်အရေဝ်တုဲ ပလံၚ်ဖျဴပယျဵုနွံတုဲ ပရူပရာလ္ၚဵုတံဂှ်တှ်ေ လလောၚ်ပ္တိတ်ဗွဲမလုပ်သၞောဝ် ဟွံမွဲရ။ ချိၚ်သရောပ်တုဲ ဟီုဂွံဂှ်တှ်ေ ကောန်ဍုၚ်ဗၟာ လုပ်စိုပ်ဒၟံၚ်ဍုၚ်သေံ အရိုဟ်တ္ၚဲ နကဵုဂၠံၚ်ဍာန်နာနာတံဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ဖျေံလဝ်တှ်ေတုဲဂှ်တုဲ အပ္ဍဲဍုၚ် ညးသၟတ်အာယုက် ၁၈ လ္ပာ်လ္တူတံ လုပ်စိုပ်ကၠုၚ်ဒၟံၚ်ဍုၚ်သေံ အရိုဟ်တ္ၚဲဟီုဂှ် ဂွံဆဵုကေတ်ဒၟံၚ် မံက်က်ထေၚ်ၚ်ရ” သာ်ဝွံ သ္ဂးရ။
ပ္ဍဲဂိတုမာတ် ၂၂ တေံ သၟိၚ်တၠအဝဵုသေံတံ ရပ်ဂွံလဝ် ကောန်ဍုၚ်ဗၟာတၞးလိက်ဟွံမွဲ ရဲလုပ်စိုပ်ကၠုၚ်ဍုၚ်သေံ နကဵုဂၠံၚ်ဟွံလုပ်သၞောဝ် နူကဵုဍုၚ်ကျာ်ပိ ပယျဵုသေံ−ဗၟာ ၁၇ တၠတုဲ ထိၚ်ဒဝ်လဝ် ပ္ဍဲကဵုဗ္ဒိုပ်ဗၠာဲသၟိၚ် သၚ်ခဠပူရဳဂှ် ဂွံတီကေတ်ရ။
သ္အာၚ်နူဂှ်ပၠန် ပ္ဍဲဂိတုမာတ် ၁၉ ဂှ်လေဝ် ကောန်ဍုၚ်ဗၟာတၞးလိက်ဟွံမွဲ ဂ္စါန်လုပ်ပ္ဍဲတွဵုရးကာန်ချနဘူရဳ ဍုၚ်သေံ နူကဵုဍုၚ်ကျာ်ပိ ၁၀၀ တၠပြၚ်ဂှ်လေဝ် ဒပ်ဗၠာဲသၟိၚ်သေံတံကဵု ဒပ်မၚ်ပယျဵုတံ ရပ်ဂွံလဝ် အကြာဂၠံၚ်ကဵု ပ္ဍဲဒၞါဲသၞေဟ်ကၚ်စၟဳတ်တံရ။
ညးဒးဒုၚ်ရပ်ဂမၠိုၚ်ဝွံ အတိုၚ်သၞောဝ်လဝက အလဵုအသဳသေံဂှ်မ္ဂး စွံပ္ဍဲအချုက်ယာယဳတုဲ ကၠောန်သ္ပသၟာန်သၟုက်စၟဳတ် အရာမနွံပၟိက်တံတုဲမ္ဂး ပလံၚ်ဖျဴလဝ်ဍုၚ်ဗၟာ ဒဒှ်ရကလေၚ်လုပ်စိုပ်ဍုၚ်သေံဟွံဂွံဂှ် ဥူအံၚ်ကျဝ် လဴထ္ၜးလဝ်ရ။
ကံၚ်ဇြဳပၞာန်ဂှ် သွက်ဂွံကလေၚ်ဗပေၚ်ဇြဟတ်ကောန်ပၞာန် မလေၚ်ဒိုက်အာတံမာန်ဂှ် ပ္ဍဲကဵုတွဵုရး ကေုာံ ရးဒေသတံဂှ် သ္ကိုပ်အုပ်ဓုပ်ကွာန်အရာပ်တံ ကံက်ကၠုၚ်စရၚ် ညးလုပ်ပၞာန်ဂွံတံ ကေုာံ ကံက်မာဲတံဂှ် ကၠောန်သ္ပကၠုၚ်ရ။
ပ္ဍဲအကာဲအရာသာ်ဏံ ညးသၟတ်သှ်ေဒၟံၚ် အပ္ဍဲဍုၚ်တံဝွံ သွက်ဂွံပါဲဒလေတ် သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်တုဲ အကြာသၟိၚ်တၠအဝဵုသေံတံ ပတေၚ်ဓရတ်လဝ် ပရေၚ်ဂီုကၠီုဂှ် ပ္တိတ်ကၠုၚ်ဇြဟတ် ဂွံတတ်ကၠောံပယျဵုတံ သၠုၚ်တိုန်ကၠုၚ်ရ။
ဥူအံၚ်ကျဝ်ဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ သၟတ်ဍုၚ်ဗမာ လုပ်ကၠုၚ်ပ္ဍဲဍုၚ်သေံတံဂှ် ဗ္စာရဏာပရေၚ်မၞိဟ်တုဲ သွက်ဂွံကၠောန်ကဵုတၞးလိက်သက်သဳ မံၚ်တန်တဴကၠောန်ကလောန်တံ ဗွဲမလုပ်သၞောဝ်ဂှ် အာတ်မိက်လဝ် အလဵုအသဳသေံရောၚ် ဟီုရ။
“နကဵုပိုယ်တံ ပ္ဍဲဂိတုမာတ် ၈ တ္ၚဲ International Women Day တေံဂှ် ပိုယ်တံ အာတ်မိက်လဝ် အလဵုအသဳသေံ ဗ္စာရဏာပရေၚ်မၞိဟ် လ္တူသၟတ်တၞောဝ်တၟိ လုပ်စိုပ်ကၠုၚ် အပ္ဍဲဍုၚ်သေံ ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တံဂှ်တုဲ သွက်ဂွံကၠောန်ကဵု တၞးလိက်သက်သဳမံၚ်စံၚ်၊ သ္ဂောံမၚ်မွဲရံၚ်စံၚ်တံတုဲ သွက်ဂွံကဵုအခေါၚ်ကၠောန်ကလောန်တံ မဒှ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် သၟတ်ဍုၚ်ဗၟာ လှုဲမာန်တံဂှ်လေဝ် ဂွံအာစိုပ်ဍုၚ်သေံ နကဵုဂၠံၚ်မလုပ်သၞောဝ်ဂှ် မၞိဟ်ကေတ်လဝ်တ္ၚဲချိၚ်သွက်ဝဳဇြာဂှ်လေဝ် ဂၠိုၚ်လောန်ဂှ်ရ အာတ်ပ္တိုန်အလဵုမၞိဟ်ကဵု သၞောတ်အောန်လိုၚ်တံဂှ် မွဲတ္ၚဲ မၞိဟ် ၂၀၀ တၠရဟေၚ် ရုၚ်ကလုတ်သေံ လ္တူဍုၚ်လ္ဂုၚ် ဒုၚ်ကဵုဒၟံၚ်တဲရ။
အတိုၚ်လိက်ဒုၚ်စဳရေၚ် ဂကောံသုတေသန ISP-Myanmar ဂှ်မ္ဂး ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကရောံညးသၟတ်တံ တိတ်စ္ဍးဍုၚ်သေံ နကဵုဂအုံဗွဝ်ဂှ် ဂၠံၚ်တရဴဖောအ်ဗြေဝ်တောတက်ကၟိန်ဍုၚ် ဂၠိုၚ်ကဵုတၞောဝ်ဒတောဝ် ဒှ်အာလ္ပာ်လဟုတ်မာန်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Twitter