ကအ်ကြိက်၊ မာတ် ၂၄
ပပ္တံနူဂိတုမာတ် ၂၃ အခိၚ်နူဂယးဂှ်တုဲ ပ္ဍဲပွဳပွူဒဵု( ရၚ်ကွဲ) သ္ကုတ်သၟဝ်ကျာကအ်ကြိက် တိဍာ်ဒပ်မဟာ ၇ KNU ဂှ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ ပေါဲဗ္တိုက်သ္ကာတ်မြဟ်လတ်ရောၚ် ဂွံတီကေတ် အတိုၚ်ဂလာန်ပရိုၚ်တမ်ရိုဟ်ဗလးတိရ။
ဗ္ဒိုပ်ဒဵု ( ရၚ်ကွဲ) ဒပ်ကံၚ်ဇြဳပၞာန်ဖျေံလဝ်ဒပ် ပ္ဍဲကွာန်မျပတိုၚ် ပွိုၚ်ဍုၚ်ကအ်ကြိက် တွဵုရးကရေၚ် မဒှ်ပွိုၚ်ဍုၚ်နဘူ ခရိုၚ်ဘာအၚ် ဒပ်မဟာ ၇ KNU ဂှ် ဒပ်ပံၚ်ကောံ KNLA တံ လုပ်စိုပ်ဗ္တိုက်လဝ်တုဲ ပေါဲဗ္တိုက်ၜါလ္ပာ် က္တဵုဒှ်လဝ် ဗွဲမသ္ကာတ်မြဟ်ရ။
ပ္ဍဲကဵုဒၞါဲပေါဲဗ္တိုက်ဒှ်ဂှ် က္ၜၚ်ကျာမွဲဖ္ဍိုက် ကၠုၚ်စိုပ်ပဝ်ယာန်လဝ်တုဲ ပ္ဍဲကဵုကွာန်မျပတိုၚ် ဗ္ဒါဲဗ္ဒိုပ်ဒဵု ( ရၚ်ကွဲ) ဂှ် ကရောၚ်ပၞာန်ကံၚ်ဇြဳပၞာန် လုပ်စိုပ်ကၠုၚ်တုဲ ညးဒေသတံ ဒးဂြိပ်ဒဴပါဲဒလေတ်လဝ် အတိုၚ်ကွာန်မွဲဂှ် ဂွံတီကေတ် ဇရေၚ်ညးဒေသတံရ။
အခိၚ်လၟုဟ် ပ္ဍဲကဵုဘာလကျာ်ကွာန်မျပတိုၚ်ဂှ် ကောန်ဒပ်ကံၚ်ဇြဳပၞာန်တံ လုပ်စိုပ်ဖျေံလဝ်ဒပ် ဗွဲမဂၠိုၚ်ဂၠေၚ်တုဲ ကွာန်မျပတိုၚ်၊ နံၚ်ထပ္ပံ၊ ခိုဘိုၚ်း တံဒှ်တမ် ဟွံအောန်နူကဵု ၃ ကွာန် ဒးပါဲဒဴဒၟံၚ်ဘဲပၞာန်ရ။
ဗ္ဒိုပ်ဒဵု ( ရၚ်ကွဲ) ပေါဲဗ္တိုက်ဒှ်ဂှ်ဝွံ နွံဒၟံၚ် ဗ္ဒါဲကွာန်မျပတိုၚ် လ္တူဂၠံၚ်ဇၞော် နဘူ−တံတားကျိုး (ကအ်ကြိက်) ဂှ်တုဲ ခြာဒၟံၚ်ကဵု ဗွဲဒိုဟ်နေရတိ ဍုၚ်ကအ်ကြိက် ၁၀ မိုၚ်ပြၚ်ရ။
ပ္ဍဲဗ္ဒါဲပွဳပွူဒဵု ( ရၚ်ကွဲ) ဂှ် ပေါဲဗ္တိုက်သ္ကာတ်မြဟ်ဒၟံၚ်တုဲ သ္ကုတ်ဂၠံၚ်ကွဳစက် ဗြဝတဳ−ထိုအ်ဂဝ်ကိုဝ်−ကြုၚ်ဒဵု ပ္ဍဲဂၠံၚ်ကၞောတ်ၜဳကြုၚ်ဒဵုဂှ် ပြဟ်ဟ်ဏံ လ္ပအာကၠုၚ်အိုတ်ညိဂှ် ကဵုသမ္တီဟီုပ္ကန်လဝ် ညးဍုၚ်ကွာန်ဒေသတံ နွံဒၟံၚ်ရ။
ပ္ဍဲကဵုထလဳဂရာမ်ချာန်နေဝ်ကံၚ်ဇြဳပၞာန်တံဂှ် ဟိုတ်နူလုပ်စိုပ်ဗ္တိုက်ကၠုၚ် ဗ္ဒိုပ်ဒဵု ( ရၚ်ကွဲ) ဗ္ဒါဲကွာန်မျပတိုၚ် နကဵုဇြဟတ်ဗွဲမဂၠိုၚ်ဂၠေၚ်ဂှ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ ဗ္ဒိုပ်ဒပ်ဏံဝွံ ဟိုတ်နူဒှ်ဗ္ဒိုပ်ဇြဟတ်ဍိုန်လျမွဲတုဲ နွံပၟိက်ဒၟံၚ်ကဵု အရီုဗၚ်ပန်ပှော်ပၞာန်ကျာရောၚ်ဂှ် ချူထ္မံက်ထ္ၜးလဝ်ရ။
ဗ္ဒိုပ်ဒဵု ( ရၚ်ကွဲ) ဝွံ နွံဒၟံၚ် အကြာဍုၚ်ဒပ် နဘူ ကေုာံ ဌာန်ဂအုပ်ကောပ်ကာဲပရေၚ်ပၞာန်ကံၚ်ဇြဳပၞာန် ဖျေံသ္ဇိုၚ်ဍုၚ်ကအ်ကြိက် စၟတ် ၁၂ ဂှ်တုဲ ဒှ်ဒၞါဲဒပ်မၚ်ပယျဵုကရေၚ် ကေုာံ ကံၚ်ဇြဳၜိုဟ်လလမ်ကရေၚ် PC တံ အာကၠုၚ်ချဳဒရာၚ်ကီုရ။
ပရိုၚ်−သြၚ်လောန်တိုၚ်(မ်)
ဗီု−Social Media