ဘုတ်ပြၚ်း၊ မာတ် ၂၄
ဒပ်ပံၚ်ကောံဇြဟတ်ပၠန်ဂတးတံ ဗ္တိုက်သီဂွံလဝ် ဗ္ဒိုပ်ကုန်ဒဵုကံၚ်ဇြဳပၞာန် တိုၚ်တာဝါ မိုၚ်ကလိုဝ်ဝေ ပ္ဍဲပွိုၚ်ဍုၚ်ဘုတ်ပြၚ်း ရးတၞၚ်သဳဂှ် ဂွံတီကေတ် ဇရေၚ်ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်ဘုတ်ပြၚ်းတံရ။
ဗ္ဒိုပ်ကုန်ဒဵုကံၚ်ဇြဳပၞာန် တိုၚ်တာဝါ မိုၚ်ကလိုဝ်ဝေ ဗွဲဒိုဟ်ပလိုတ် ကွာန်ဗာန်ကလဝ် ကေုာံ ကွာန် (ပြည်ကြီးမဏ္ဍိုၚ်) ဇြဟတ်ဒပ်ၜိုတ် ၃၀ ဖျေံလဝ်သ္ဇိုၚ်ဂှ် ဒပ်ပၞာန်ကဝ်တူလေဝ် KTLA ကေုာံ ဒပ်ပံၚ်ကောံစဵုဒၞါညးဍုၚ်ကွာန် ပွိုၚ်ဍုၚ်ဘုတ်ပြၚ်းတံ စဗ္တိုက်လဝ် ပ္ဍဲဂိတုမာတ် ၂၂ အခိၚ်လဒေါဝ်တ္ၚဲ ၜိုတ် ၁၁ နာဍဳဂှ်ရ။
အပ္ဍဲပေါဲဗ္တိုက်ၜါလ္ပာ် က္တဵုဒှ်လဝ် လလအ်ပွိုၚ် ၄ နာဍဳဂှ် ကောန်ဒပ်ကံၚ်ဇြဳပၞာန် ဇီုကပိုက်ပြဟ်လလုဲတံ ဂၠိုၚ်တုဲ ထောံလသာဗ္ဒိုပ် သီုကဵုဂြိပ်တိတ်တံဂှ်ရ သီဂွံလဝ် အတိုၚ်ဗ္ဒိုပ်မွဲရ။
အပ္ဍဲပေါဲဗ္တိုက်သီဗ္ဒိုပ်ဂှ် နူကဵုဗ္ဒိုပ်ဒပ်ကံၚ်ဇြဳပၞာန် ဖျေံသ္ဇိုၚ်ဘုတ်ပြၚ်း အကြာဘိုၚ်ပန်ပှော်ကဵုလဝ်လွဟ်ဇၞော် ဟွံပိုတ်သ္ကုတ်ဂှ် အခိၚ်ဇိုၚ်သဝ်တ္ၚဲ ၜိုတ် ၃ နာဍဳဝိုက်ဂှ် သီဂွံလဝ် ကုန်ဗ္ဒိုပ်ဏံဒတုဲဂှ် ညးတာလျိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်ဘုတ်ပြၚ်းမွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပေါဲဗ္တိုက်သီဗ္ဒိုပ်ဂှ် နူဒပ်ကံၚ်ဇြဳပၞာန်တံဂှ် သီဂွံလဝ် ၆၀ မမ (စိန်ပြောၚ်) မွဲဇကိုအ်၊ MA49 မွဲဇကိုအ်၊ MA3 ၜါဇကိုအ်၊ သီုမခတိုဟ်၊ လွဟ်လက်နက်မကမ် ကေုာံ ကပေါတ်အရပ်စပ်ပၞာန်တၞဟ်ဟ်တံဂှ် သ္ဂးရ။
ပပ္တံနူသၞာံဏံမံက်တုဲ ပ္ဍဲရးတၞၚ်သဳ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံစဵုဒၞါညးဍုၚ်ကွာန်တံဂှ် ပေါဲဗ္တိုက်ၜါလ္ပာ် သ္ကာတ်မြဟ်လဝ်တုဲ ဒပ်ကံၚ်ဇြဳပၞာန်လေဝ် ရပ်စပ်စကာပၞာန်ကျာတံတုဲ ဆက်ဗ္တိုက်ဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်လဝ်ဂှ်မ္ဂး ပ္ဍဲရးတၞၚ်သဳ အပ္ဍဲသၞာံဏံ ဒပ်ပံၚ်ကောံဇြဟတ်ပၠန်ဂတးတံ ဗ္တိုက်သီဂွံလဝ် ဗ္ဒိုပ်ဒပ်ကံၚ်ဇြဳပာန် ဟွံအောန်နူကဵု ၅ ဗ္ဒိုပ်ရ။
ပရိုၚ်−သြၚ်လောန်တိုၚ်(မ်)
ဗီု−ပကဖ ဘုတ်ပြၚ်း