ရေဝ်၊ မာတ် ၂၆
အပ္ဍဲပရေၚ်ဗ္တိုက် သၞေဟ်ကၚ်စၟဳတ်ဒဒန်ခါန်သေံ ကံၚ်ဇြဳပၞာန် မၞုံအကြာကွာန်ဇီုသာဲကဵု ကွာန်သၞေဟ်ဇုက် ပွိုၚ်ဍုၚ်ရေဝ် တွဵုရးဍုၚ်မန်ဂှ် ကောန်ဒပ်ၜါတၠ ပြဟ်လလုဲအာတုဲ ၜါတၠ ကလိဂွံလဝ်ဝပ်ဂှ် က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုရ။
သၞေဟ်ကၚ်ဒဒန်ခါန်သေံ ဒပ်ကံၚ်ဇြဳပၞာန် ကေုာံ ဒပ်စဵုဒၞါၜိုဟ်လလမ်ကောန်ဂကူမန်တံ ဖျေံလဝ်ဒပ်ဂှ် ပ္ဍဲဂိတုမာတ် ၂၅ အခိၚ်နူဂယး ၆ နာဍဳ ဒပ်လကိုဟ်ဍုၚ်ရေဝ်တံ လုပ်စိုပ်ဍိုက်ဗ္တိုက်လဝ်ရ။
အပ္ဍဲပရေၚ်ဗ္တိုက် က္တဵုဒှ်လဝ် ပရေၚ်ပန်ပှော် လလအ်ပွိုၚ်မွဲနာဍဳပြၚ်ဂှ် ကောန်ဒပ်ၜါလ္ပာ် ဇီုကပိုက်ချိုတ်တံ နွံလဝ်ရ။
ပ္ဍဲပရေၚ်ဗ္တိုက်ဏံ လ္ပာ်ကံၚ်ဇြဳပၞာန် ၅ တၠ ချိုတ်တုဲ မၞိဟ်ကလိဂွံလဝ်ဝပ်လေဝ် နွံဂှ် က္ဍိုပ်သ္ကိုပ်လကိုဟ်ဍုၚ်ရေဝ် ချူပ္တိုန်လဝ် ပ္ဍဲမုက်လိက်ဇာဇၞိက်ပရေၚ်မၞိဟ်ညးရ။
အခိၚ်ပေါဲဗ္တိုက်ဒှ်မံၚ်ဂှ် ဌာန်ဂအုပ်ကောပ်ကာဲပရေၚ်ပၞာန်ကံၚ်ဇြဳပၞာန် စၟတ် (၁၉) ဖျေံသ္ဇိုၚ်ရေဝ်ဂှ် ဘိုၚ်ပန်ကဵုလဝ်လွဟ်ဇၞော်တုဲ ဒတုံဗ္တိုဟ်ထ္ကးအာလဝ် အပ္ဍဲကၠအ်ထၜိုတ် ဗ္ဒါဲဒဒန်ခါန်သေံဂှ်ရ။
ဟိုတ်နူပေါဲဗ္တိုက်ဂှ်တုဲ သ္ကုတ်ဂၠံၚ်ရေဝ်−ဇြပ်ဗု ကွာန်ဇီုသာဲဂှ် ဒးကၟာတ်လဝ်ယာယဳတုဲ အခိၚ်နူဂယး ၜိုတ် ၁၀ နာဍဳဂှ် ကလေၚ်အာကၠုၚ်ဒၟံၚ် အတိုၚ်တြေံယျဂှ် ဂွံတီကေတ် ဇရေၚ်ညးဒေသတံရ။
သၞေဟ်ကၚ်ဒဒန်ခါန်သေံ အာတ်ဒၟံၚ်သြန် ပ္ဍဲညးဍုၚ်ကွာန်အာတရဴတံ ဂၠိုၚ်ကဵုဆဂှ်ဝွံ အပ္ဍဲကာလသီအဝဵု ဟွံအောန်နူကဵု ၃ ဝါ ဒးဒုၚ်ဗ္တိုက်လဝ်တုဲ ဇီုကပိုက်ပြဟ်လလုဲအာတံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−လကိုဟ်ဍုၚ်ရေဝ်