ကအ်ဗိန်၊ မာတ် ၂၆
ဟိုတ်နူပေါဲဗ္တိုက်သီဗ္ဒိုပ်ဗၠာဲသၟိၚ်ကအ်ဗိန် ပ္ဍဲပွိုၚ်ဍုၚ်ကအ်ကြိက် တွဵုရးကရေၚ်ဂှ်တုဲ ညးဒေသဂၠိုၚ်ကဵုလ္ၚီ ဟွံအောန်နူကဵု ၆ ကွာန် ဒးဂြိပ်ဒဴပါဲဒလေတ်ဒၟံၚ်ဂှ် ဂွံတီကေတ် အတိုၚ်ဂလာန်ညးဒေသပါဲဒဴဘဲပၞာန်တံရ။
စနူဂိတုမာတ် ၂၄ အခိၚ်နူဂယး ၇ နာဍဳဂှ်တုဲ ဒပ်ပံၚ်ကောံဇြဟတ်ပၠန်ဂတးရပ်လွဟ် မန် ကေုာံ ကရေၚ်တံ လုပ်စိုပ်ဍိုက်ဗ္တိုက်လဝ် ဗ္ဒိုပ်ဗၠာဲသၟိၚ်တိဍာ်ကအ်ဗိန်ရ။
ဗ္ဒိုပ်ဗၠာဲသၟိၚ်ကအ်ဗိန် မ္ဒးဗ္တိုက်လဝ်ပွိုၚ်မွဲတ္ၚဲဂှ် ပ္ဍဲဂိတုမာတ် ၂၅ အခိၚ်လဒေါဝ်တ္ၚဲ ၜိုတ် ၁ နာဍဳဂှ် ဒပ်ပံၚ်ကောံဇြဟတ်ပၠန်ဂတးတံ သီဂွံလဝ်ရ။
အတိုၚ်ဂလာန် ပရိုၚ်တမ်ရိုဟ်ဗလးတိတံဂှ်မ္ဂး လ္ပာ်ကံၚ်ဇြဳပၞာန် ပစူအလာံဗု ဖျေံလဝ်လွဟ် ဒုၚ်ကျတုဲ သီဂွံလဝ် အလုံဗ္ဒိုပ်မွဲရ။
ဟိုတ်နူပေါဲဗ္တိုက်တုဲ ညးဍုၚ်ကွာန် နူ ၆ ကွာန်ဟွံက ဗ္ဒါဲဗ္ဒါဲကွာန်ကအ်ဗိန်တံဂှ်ဝွံ နူဂၠံၚ်ဍာ်၊ ဂၠံၚ်ကုန် မွဲကဆံၚ် ဒးဂြိပ်ဒဴပါဲဒလေတ်ဒၟံၚ် ပ္ဍဲကဵုကွာန် ဒၞါဲဗၠးဘဲ သ္ၚိမသကလောကောဒေံ၊ ဘာလကျာ်တံရ။
ပြဟ်ဟ်ဏံ ညးဍုၚ်ကွာန်ကောန်အရာပ် ဒးဘဲပၞာန်တံဝွံ နွံပၟိက်ဒၟံၚ်ကဵု သ္ၚု ကေုာံ ဍာ်သုၚ်တံရောၚ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ပါဲဒဴဘဲပၞာန်မွဲတၠ ဟီုရ။
“ပရေၚ်စသုၚ်မံၚ်စံၚ်ဂှ်တှ်ေ ကျာတ်ညိ။ အဓိကဂှ်တှ်ေ သ္ၚုရဏောၚ်။ အဏံဂှ် သွဂှ်တှ်ေ ဗီုဒှ်ဂှ် စဂွံမံၚ်။ သ္ၚုကဵု ဍာ်သုၚ်ရဏောၚ်။ အဏံဂှ် ဒှ်ဒၟံၚ်ၜဳကြုၚ်တုဲ ဍာ်သုၚ်ဂှ် ဂွံသုၚ်ဂှ် ဟွံပြေပြံၚ်ပုဟ်။ ဍုန်ဍာ်ဂမ္တဴတုဲ ဗဂံက်ထောံတုဲမှ သုၚ်ဂွံရ” သာ်ဝွံ သ္ဂးရ။
အပ္ဍဲပေါဲဗ္တိုက်ၜါလ္ပာ်ဂှ် ဟိုတ်နူပရေၚ်ပန်ပှော်ဗ္တိုက်ကံၚ်ဇြဳပၞာန် နူကဵုဂၠံၚ်ကုန်၊ ဂၠံၚ်ဍာ်တံဂှ်တုဲ ညးဍုၚ်ကွာန်ကောန်အရာပ် ဟွံအောန်နူကဵု ၅ တၠ ဇီုကပိုက်ကလိဂွံလဝ်ဝပ်ဂှ် ဂွံတီကေတ် ဇရေၚ်ညးဒေသတံရ။
သ္အာၚ်နူဂှ်ပၠန် စမြိုၚ်ဘာသာ မပ္တံကဵုဘာလကျာ်၊ ဘာသဳလ ကေုာံ သ္ၚိဒၟံၚ်ကောန်အရာပ် မၞုံအပ္ဍဲကွာန်ကအ်ဗိန်၊ ကအ်ပံက်တံ ဇီုကပိုက်လီုလာ်အာတံလေဝ် နွံဒၟံၚ်ဂှ် ဂွံတီကေတ်ရ။
ပရေၚ်ဗ္တိုက်ဗ္ဒိုပ်ဗၠာဲသၟိၚ်တိဍာ်ကအ်ဗိန်ဂှ် သီုဗော်ဍုၚ်မန်တၟိ AD ၊ ဒပ်ပၞာန်ဗၠးၜးဍုၚ်မန် MLA ကေုာံ ကရောၚ်ပၞာန်ကၠဗုကဵု ကရောၚ်ပၞာန်သ္ပဝ် မဒှ်ဒပ်သၟဝ်တဲ ဗော်သွးကောန်ဂကူကရေၚ် KNU တံလေဝ် ပါလုပ်ဒၟံၚ်ရ။
ဗ္ဒိုပ်ဗၠာဲသၟိၚ်ကအ်ဗိန်ဂှ်ဝွံ ပ္ဍဲသၞာံတုဲကၠုၚ်တေံ ၜိုတ်လဒေါဝ်ဂိတုဂျာန္နဝါရဳဂှ်လေဝ် ဟိုတ်နူပရေၚ်ဗ္တိုက် ဒပ်ပံၚ်ကောံရပ်လွဟ်ကရေၚ်တံတုဲ ကောန်ဒပ်မၞုံအပ္ဍဲဗ္ဒိုပ်ဗၠာဲသၟိၚ်တံ ဂြိပ်တိတ်အာတုဲ ဒပ်ပၠန်ဂတးတံ စံၚ်ပတူလဝ် ဗ္ဒိုပ်ဗၠာဲသၟိၚ်ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ