နေဗျဳဒဝ်၊ မာတ် ၂၆
ကံၚ်ဇြဳပၞာန် ကျဗြံကၠုၚ်ဒၟံၚ် အပ္ဍဲပေါဲဗ္တိုက်ထပိုတ်ရိုဟ်ကၞက်သၞောတ်တၠအဝဵုပၞာန် မက္တဵုဒှ်ဒၟံၚ် အလုံဍုၚ်မွဲဂှ်ဝွံ ဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန် ဇၟာပ်ကောန်ဍုၚ် ဒးလုပ်ပၞာန်ဂှ်တုဲ ပ္တိတ်ကၠုၚ်ဒၟံၚ်ဇြဟတ် သွက်ဂွံထ္မံက်ရုပ်ရဴ ပ္ဍဲကဵု ၁၇၂ ပွိုၚ်ဍုၚ်ရ။
အတိုၚ်တၚ်နၚ် ဂကောံသုတေသန Data For Myanmar ဂှ်မ္ဂး ကြဴနူလလောၚ်တြး ဒဒှ်ရသၞောဝ်ယိုက်ဂၠေၚ်လျိုၚ်ပၞာန် လမျီုစလုပ်အာ တုဲကၠုၚ်ပ္ဍဲဂိတုဖေဖဝ်ဝါရဳ ၁၀ တုဲကၠုၚ်တေံဂှ်တုဲ ကံၚ်ဇြဳပၞာန် ထ္မံက်ကၠုၚ်ဒၟံၚ်ရုၚ်ရဴ သၞောဝ်ဏံ ဗွဲမပြဟ်ရ။
အတိုၚ်တၚ်နၚ် Data For Myanmar ပ္ကောံပ္ကေဝ်လဝ် စဵုကဵုဂိတုမာတ် ၂၂ ဏံဂှ်မ္ဂး ပ္ဍဲကဵုပွိုၚ်ဍုၚ် ၁၇၂ ပွိုၚ်ဍုၚ်ဂှ် ကံက်ဒၟံၚ်စရၚ်၊ ကံက်ဒၟံၚ်မာဲ သွက်ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်ဂှ်ကီု၊ ကော်စိုပ် သွက်ဂွံပၠောပ်စရၚ် နဒဒှ်ညးအာယုက်စိုပ်တုဲသွက်ဂွံယိုက်ဂၠေၚ်လျိုၚ်ပၞာန်တံဂှ် ကၠောန်ၜိုတ်ဒၟံၚ်ရ။
ပ္ဍဲကဵုဏံ ပွိုၚ်ဍုၚ်ဗွဲမဂၠိုၚ် အပ္ဍဲတိဍာ်ကံၚ်ဇြဳနေဗျဳဒဝ်၊ ဒၞါဲလၟိဟ်မၞိဟ်ဂၠိုၚ် ပ္ဍဲရးဨရာဝတဳ၊ ရးလ္ဂုၚ်၊ ရးဗဂေါတံဂှ်ကီု၊ ပ္ဍဲကဵုပွိုၚ်ဍုၚ် နူကဵုတွဵုရး ကေုာံ ရးဒေသသှ်ေတံဂှ်လေဝ် စထ္မံက်ဒၟံၚ်ရုပ်ရဴရ။
ပ္ဍဲကဵုပွိုၚ်ဍုၚ်လ္ၚဵု နူကဵုပွိုၚ်ဍုၚ် ပေါဲဗ္တိုက်မက္တဵုဒှ်ဒၟံၚ်တံဂှ် ကဵုက္ဍိုပ်ရေၚ်တၠုၚ်ဒၟံၚ် အရာပ်လ္တူဍုၚ်တံကဵု ကွာန်ဗ္ဒါဲဗ္ဒါဲတံဂှ်တုဲ နဲဥပဒေ သွက်သၞောဝ်ယိုက်ဂၠေၚ်လျိုၚ်ပၞာန်တံဂှ် လလောၚ်ပ္တိတ်လဝ် ဗွဲမလုပ်သၞောဝ် ဟွံမွဲဏီရ။
ဟိုတ်ဂှ်ရ စပ်ကဵုလၟေၚ်ကမၠောန်အဆံၚ်ၚ် ထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ညးဍုၚ်ကွာန်တံ ဒစဵုဒစးပါ်ပါဲဒၟံၚ်တံလေဝ် မံက်တိတ်ဒၟံၚ်ဂှ် Data For Myanmar သ္ဂးရ။
မွဲလ္ပာ်ဂှ်ပၠန် ပ္ဍဲကဵုလၟေၚ်ကမၠောန် ကံက်စရၚ် ညးလုပ်ပၞာန်ဂွံတံဂှ် သ္ကိုပ်အုပ်ဓုပ်ကွာန်၊ သၞာဲဒဴ၊ က္ဍိုပ်သ္ၚိကၠံ မ္ဒးရေၚ်တၠုၚ်ဒၟံၚ် အဓိကတံဂှ် ဂကောံပၠန်ဂတးတံ ပသောၚ်သ္အးထောံဒၟံၚ်တံလေဝ် နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ၜိုတ်က္ဍစိုပ် ပ္ကောံပ္ကေဝ်လဝ်ဂှ်မ္ဂး နူဂိတုမာတ် ၁၈ စဵုကဵု ၂၄ ပ္ဍဲကဵုရးမာန္တေလေဝ်၊ မဂွဵု၊ သက်ကိုၚ်၊ ဗဂေါ၊ ရခေၚ် ကေုာံ တွဵုရးဍုၚ်မန်တံဂှ် သ္ကိုပ်အုပ်ဓုပ်၊ က္ဍိုပ်သ္ၚိကၠံ ကေုာံ တခဳအုပ်ဓုပ်ကာနာနာ ဖ္တိုက်ဖ္အောဝ် ကေုာံ ကံက်စရၚ်သွက်ဂွံလုပ်ပၞာန်တံ ဟွံအောန်နူကဵု ၁၀ တၠ ဒးဒုၚ်ပန်ဂစိုတ်လဝ်တုဲ ဒးချိုတ်အာလဝ်ရ။
ဂကောံရပ်လွဟ်ကောန်ဍုၚ်အရၚ်လ္ၚဵုတံကဵု ဂကောံဒပ်ပၠန်ဂတးရပ်လွဟ်တံဂှ် ယဝ်ရကၠောန်သ္ပကၠုၚ်ဗွဲအနိၚ်အထက် ကုကောန်အရာပ်အပ္ဍဲဒေသတံ ညံၚ်ဂွံယိုက်ဂၠေၚ်လျိုၚ်ပၞာန်ဂှ်မ္ဂး ဆက်ကၠောန်အာ ပရေၚ်ကေတ်ဒုဟ်ဒဏ် ကုဂကောံအုပ်ဓုပ်သၟဝ်တဲကံၚ်ဇြဳပၞာန်တံဏောၚ်ဂှ် ကဵုလဝ်သတိရ။
ပရိုၚ်−သြၚ်လောန်တိုၚ်(မ်)
ဗီု−MOI