မတ်မလီု၊ မာတ် ၂၆
ပ္ဍဲတွဵုရးဍုၚ်မန် လ္တူဍုၚ်မတ်မလီု မွဲတ္ၚဲဓဝ် ဒးဒုၚ်ဗ္တိုက်ကဵုဒရုၚ် ၜါဝါတုဲ ကံၚ်ဇြဳပၞာန် သၠုၚ်ပ္တိုန်လဝ် ပရေၚ်ဂီုကၠီု အပ္ဍဲဍုၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
နူဏေံတေံ ပ္ဍဲဂိတုမာတ် ၂၄ အခိၚ်လဒေါဝ်တ္ၚဲ ၁၂ နာဍဳဂှ် ဂကောံဇြဟတ်ပၠန်ဂတးတံ ထောံလဝ်မခတိုဟ် သၞေဟ်က္ၜၚ်ကျာမတ်မလီု နကဵုဒရုၚ်ရ။
အပ္ဍဲပရေၚ်ဗ္တိုက်ဂှ် ဂၠံၚ်သၞေဟ်က္ၜၚ်ကျာဂှ် လီုလာ်ဇီုကပိုက်အာညိညတုဲ စမြိုၚ်ကောန်ဒပ်ဗၠာဲသၟိၚ် ကေတ်လဝ်ဂီုကၠီုတံ ဇီုကပိုက်လီုလာ်အာလဝ် ဟွံမွဲပုဟ်ဂှ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ပ္ဍဲကဵုတ္ၚဲဂှ်ရ ပ္ဍဲကဵုကွာန်ခအံက်ကြေဟ် ဍုၚ်မတ်မလီု အပ္ဍဲသေန်တာယေန်သၞာၚ်ကောန်ဍုၚ်အရၚ် ကံၚ်ဇြဳပၞာန် သိုၚ်ခၞံဒၟံၚ်ဂှ် ထပ်ဒးဒုၚ်ဗ္တိုက်လဝ်ကဵု က္ၜၚ်ကျာသၟတ်ဒရုၚ် ဗ္ဂပ်စုတ်လဝ်မဝ်တာတဲဂှ်ရ။
ဟိုတ်နူပရေၚ်ဗ္တိုက်ဏံတုဲ ကံၚ်ဇြဳပၞာန် ပတေၚ်ဓရတ်ဂီုကၠီု အပ္ဍဲဍုၚ်တုဲ ထ္ၜးဇြဟတ်ဂေတ်ဂေၚ်ဒၟံၚ်ကီု၊ ကၟာတ်ဆိုအ်ဂၠိုက်ဂၠါဲတံကီု ကေုာံ စၟဳတ်စရၚ်ကၟုဲတံဂှ် ကၠောန်ကၠုၚ်ဒၟံၚ်အဆက်က်ရောၚ် ညးဒေသမတ်မလီုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“နူဏေံတေံ ဍေံတံ ထုဲထံၚ်ဒၟံၚ် အလုံဍုၚ်မွဲတုဲ ဂီုကၠီုတံ ဂၠိုၚ်ကၠုၚ်တၟာဂလိုၚ်ရ။ သီုဒပ်ပၞာန်၊ သီုဗၠာဲသၟိၚ်၊ သီုပျူသဝ်ထဳ၊ ပျူသဝ်ထဳဂှ် လၟုဟ်ဒှ်အာသီုယူနဳဝှမ်။ နူဏေံတေံဂှ် ဂလိုၚ်ပ္တိုန်လဝ် ဂီုကၠီုတၟာဂလိုၚ်တုဲ နူဗ္တံဂှ်လေဝ် ပပဵုပ္တိုန်လဝ်ပရေၚ်ဂီုကၠီုတုဲ အရာပ်လ္ၚဵုတံဂှ်လေဝ် စၟဳတ်လဝ်စရၚ်ကၟုဲတံနွံရ” သာ်ဝွံ ညးဒေသမတ်မလီုမွဲတၠ လဴထ္ၜးလဝ်ရ။
အတိုၚ်ဂလာန်ညးဒေသလ္တူဍုၚ်တံဂှ်မ္ဂး ကံၚ်ဇြဳပၞာန်ဝွံ ပ္ဍဲကဵုဒၞါဲၝောံခန်တွဵုရးဍုၚ်မန်၊ ဗ္ဒါဲရုၚ် EPC အရာပ်မာန္တလေဝ်၊ ကုန်ကျာ်သြၚ်လာန်၊ ဒၞါဲက္ဍိုပ်သၞေဟ်(ညောင်ပင်ဆိပ်ကမ်း) တံကဵု ဒၞါဲလုပ်တိတ်ဍုၚ်တံဂှ် ထပ်ပပဵုပ္တိုန်လဝ်ဂီုကၠီုရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ပ္ဍဲဒၞါဲဂၠံၚ်ပိသွာၚ်ပန်သွာၚ်တံကဵု ဒၞါဲဟွံထေၚ်လဝ်တံဂှ် စၟဳတ်ကၠုၚ်ဒၟံၚ် အဆက်က်တုဲ မ္ၚးနူကဵုဂေတ်ကၚ် နကဵုကယျိုၚ်အရာပ်ဂှ် မၚ်တောပ်ဗ္တိုက်ကၠုၚ်အပ္ဍဲဍုၚ်တံလေဝ် နွံကၠုၚ်ဂှ် ညးဒေသတံ ဟီုဂးကၠုၚ်အိုတ်ရ။
ပ္ဍဲကဵုကၞောတ်သၞာံတုဲကၠုၚ်တေံဂှ်လေဝ် ဌာန်ဂအုပ်ပၞာန်ရးအဂၞဲ ကေုာံ သ္ၚိဒတန်ဝန်ဇၞော်တံ ဒးဒုၚ်ဗ္တိုက်ကဵုဒရုၚ်တုဲ လ္ပာ်ကံၚ်ဇြဳပၞာန် သၠုၚ်ပ္တိုန်လဝ်ပရေၚ်ဂီုကၠီုရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး ဒပ်ပၠန်ဂတးတံ လုပ်စိုပ်ဗ္တိုက် ဍုၚ်မတ်မလီုမာန်ရောၚ် ဟိုတ်နူပရိုၚ်ဏံတုဲ အပ္ဍဲဒပ်ဂှ်လေဝ် တြးလဝ်ဒပ်တံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ