နေဗျဳဒဝ်၊ မာတ် ၂၇
အသေအဟာန်တ္ၚဲဒပ်ပၞာန် မရနုက်ကဵု ၇၉ ဝါ ပ္ဍဲဂိတုမာတ် ၂၇ ဏံဂှ် ဟိုတ်နူအကာဲအရာရာသဳဥတုတုဲ ပြံၚ်လှာဲကၠောန်ဗဒှ်အာ အခိၚ်ဇိုၚ်သဝ်တ္ၚဲဏောၚ်ဂှ် လ္ပာ်ကံၚ်ဇြဳပၞာန် သ္ဂးကၠုၚ်ရ။
ကၠာတေံ တ္ၚဲဒပ်ပၞာန်ဗၟာဂှ် ကၠောန်ဗဒှ်လဝ် အခိၚ်နူဂယးကီုလေဝ် သၞာံဏံ ဒၟါနူရာသဳဥတုအေဝ်နဳညဵုတုဲ ဒးကၠောန်ဗဒှ်အာ အခိၚ်ဇိုၚ်သဝ်တ္ၚဲကဵု အခိၚ်ဗ္တံဂှ် သ္ကိုပ်ဗိုလ်ဇြဝ်မေန်ထောန် ညးမၞုံအခေါၚ်ဟီုဂး ကံၚ်ဇြဳပၞာန် ဟီုဂးကၠုၚ်လဝ် နူကဵုပလာတ်ဝှမ်တြးဝါဒမွဲကဆံၚ် ပ္ဍဲဂိတုမာတ် ၂၆ တေံရ။
သ္အာၚ်နူဂှ်ပၠန် အခိၚ်ဗ္တံ အသေအဟာန်ပၠဒပ် တ္ၚဲဒပ်ပၞာန်ဗၟာ မကၠောန်ဗဒှ်အာသၞာံဏံဂှ် က္ၜၚ်ကျာ၊ က္ၜၚ်ကျာသၞေၚ်ဝဲ၊ ပဝ်ယာန်တုဲရှ်ေသှ်ေ ထ္ၜးအစောံစရာဲတံ ပါလုပ်ကၠုၚ်ဏောၚ် သ္ဂးလဝ်ကီုလေဝ် ကၠောန်ဗဒှ်အာ နကဵုဗီုပြၚ်လဵုရောဟီုဂှ် ကဵုလဝ်သမ္တီ ဟွံမွဲရ။
အတိုၚ်ဂလာန် ဗွိုၚ်ဒပ်ပၞာန်တံဂှ်မ္ဂး အသေအဟာန်ပၠဒပ် တ္ၚဲဒပ်ပၞာန်ဂှ် ပြံၚ်လှာဲကၠောန်ဗဒှ်အာ အခိၚ်ဇိုၚ်သဝ်တ္ၚဲကဵု အခိၚ်ဗ္တံဂှ်ဝွံ ဒၟါနူအကာဲအရာပရေၚ်ဂီုကၠီုဒှ်မာန်ဂှ် သ္ၚဳဂၠိပ်ဟီုဂးဒၟံၚ်တံလေဝ် နွံဒၟံၚ်ရ။
ဆ္ဂး ကံၚ်ဇြဳပၞာန်ဂှ် အသေအဟာန်တ္ၚဲဒပ်ပၞာန်ဂှ် ပ္ဍဲလက်ထက်တၠအဝဵုပၞာန်တြေံ ဥူနေဝေန်တေံ နူသၞာံ ၁၉၅၄ စဵုကဵု ၁၉၆၇ ပွိုၚ် ၁၄ သၞာံ ကေၚ်ကၠောန်ဗဒှ်လဝ် အခိၚ်ဇိုၚ်သဝ်တ္ၚဲရောၚ်ဂှ် ဟီုရ။
တုဲကၠုၚ် ပ္ဍဲဂိတုမာတ် ၂၂ တေံဂှ်လေဝ် ကရောၚ်ပၞာန် သ္ဂောံလုပ်အာ ပ္ဍဲအသေအဟာန်တ္ၚဲဒပ်ပၞာန်ဂှ် အလဵုဒုက္ဍိုပ်သ္ကိုပ်ပၞာန် ဒုသ္ကိုပ်ဗိုလ်ဇၞော်သဵုဝေန် ကၠုၚ်စိုပ်စၟဳတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI