ကအ်ကြိက်၊ မာတ် ၂၇
ပ္ဍဲပေါဲဗ္တိုက်လ္တူဍုၚ်ကအ်ကြိက် တွဵုရးကရေၚ်ဂှ် ကောန်သ္ဂံၚ် PDF ၄ တၠ ပြဟ်လလုဲတုဲ ၆ တၠ ကလိဂွံလဝ်ဝပ်ဂှ် ဂကောံဇြဟတ်ပၠန်ဂတးတံ လလောၚ်ပ္တိတ်လဝ်ပရိုၚ် ပ္ဍဲဂိတုမာတ် ၂၆ တေံရ။
ပ္ဍဲဂိတုမာတ် ၂၅ တေံ ကရောၚ်ပၞာန်ကၠဗု ကေုာံ ကရောၚ်ပၞာန်နာ်ဗု သၟဝ်တဲဒပ်ပၞာန်စဵုဒၞါညးဍုၚ်ကွာန် PDF တံ လုပ်စိုပ်ဗ္တိုက်လဝ် ဘာလ္တူဒဵု၊ ဒၞါဲပၟိက်ဇၞော် ပ္ဍဲဍုၚ်၊ ဗ္ဒိုပ်ဗၠာဲသၟိၚ် စၟတ် (၃) ဒပ်ကံၚ်ဇြဳပၞာန်ဖျေံလဝ်ဒပ် ပ္ဍဲကဵုဍုၚ်ကအ်ကြိက်ဂှ်တုဲ ပေါဲဗ္တိုက်ၜါလ္ပာ်သ္ကာတ်မြဟ်လဝ်ရ။
အပ္ဍဲပေါဲဗ္တိုက်ၜါလ္ပာ်ဂှ် ဒပ်ကံၚ်ဇြဳပၞာန် ဗၞတ် ၁၅ တၠ ချိုတ်အာလဝ်တုဲ ဗွဲမဂၠိုၚ် ကလိဂွံလဝ်ဝပ်ဂှ် ဂွံတီကေတ် အတိုၚ်တၚ်လလောၚ်တြး ကရောၚ်ပၞာန်ကၠဗုရ။
ကောန်သ္ဂံၚ် ၄ တၠ ပြဟ်လလုဲအာ လ္ပာ် PDF တံဂှ်ဝွံ ဒှ်ကောန်သ္ဂံၚ် နူကဵုကရောၚ်ပၞာန်နာ်ဗုတံတုဲ ပြဟ်လလုဲအာလဝ် အပ္ဍဲပေါဲဗ္တိုက်ဍုၚ်ကအ်ကြိက် မာတ် ၂၄ တေံဂှ် ကရောၚ်ပၞာန်နာ်ဗု လလောၚ်ပ္တိတ်လဝ် ပ္ဍဲဂိတုမာတ် ၂၅ တေံရ။
အတိုၚ်တၚ်လလောၚ်တြး Hydra Column ဂှ်မ္ဂး စနူဂိတုမာတ် ၂၃ တေံတုဲ ဒၞါဲဒပ်ကံၚ်ဇြဳပၞာန် ထိၚ်ဒက်လဝ် အပ္ဍဲဍုၚ်ကအ်ကြိက်တံဂှ် ဂကောံဇြဟတ်ပၠန်ဂတးဂမၠိုၚ် ပါလုပ်သီုကဵု Hydra Column တံ ထ္ပက်ပၞာန်ဗ္တိုက်ဒၟံၚ် နူကဵုဒိုဟ်နာနာဂှ် ဂွံတီကေတ်ရ။
အပ္ဍဲပေါဲဗ္တိုက်ဂှ် ပရေၚ်ဇီုကပိုက်ပြဟ်လလုဲ ၜါလ္ပာ်တံ နွံလဝ်တုဲ လ္ပာ်ကံၚ်ဇြဳပၞာန် ရပ်စပ်လွဟ်ဇၞော် ကေုာံ တရဴကျာတံဂှ်တုဲ စွံပွန်ဗ္တိုက်ဒၟံၚ် သ္ၚိဒၟံၚ်ညးဍုၚ်ကွာန်တံရောၚ်ဂှ် ဂွံတီကေတ် အတိုၚ်တၚ်လလောၚ်တြး Hydra Column ရ။
ပ္ဍဲကဵုဍုၚ်ကအ်ကြိက်ဂှ် နကဵုဂကောံဇြဟတ်ပၠန်ဂတးပံၚ်ကောံတံ သၠုၚ်ပ္တိုန်အသိၚ်ပရေၚ်ပၞာန်တုဲ ပေါဲဗ္တိုက်က္တဵုဒှ်ဒၟံၚ် ဗ္တံတ္ၚဲဟွံပိုတ်တုဲ နကဵုညးဍုၚ်ကွာန်ဒေသကအ်ကြိက်တံ ဟွံဂွံအခေါၚ်မွဲသာ် လ္ပတတ်ကၠောံအာကၠုၚ်ညိဂှ် ကရောၚ်ပၞာန်ကၠဗု လလောၚ်ပ္တိတ်ကဵုလဝ်သမ္တီရ။
ဟိုတ်နူပေါဲဗ္တိုက်သီဍုၚ်ကအ်ကြိက် က္တဵုဒှ်လဝ် ပ္ဍဲဂိတုဒဳဇြေမ်ဗာ ၁ တုဲကၠုၚ်တေံတုဲ သ္ၚိဒၟံၚ်ညးဒေသ မၞုံအပ္ဍဲဍုၚ်တံ ဂၠိုၚ်ကဵုကၠံ ပၟတ်တူလီုလာ်အာလဝ်တုဲ ညးဒေသ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−White Dragon